លោក ជិន សុខង៉េង៖ គេមិនអាចយកវ័យមកធ្វើខ្នាតវាស់បទពិសោធន៍ និងសមត្ថភាពឡើយ

បទយកការណ៍ / បទសម្ភាសន៍

លោក ជិន សុខង៉េង៖ គេមិនអាចយកវ័យមកធ្វើខ្នាតវាស់បទពិសោធន៍ និងសមត្ថភាពឡើយ

10, Jun 2017 , 5:19 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ មានភាពភ្ញាក់ផ្អើលមួយបានកើតឡើង ដែលធ្វើឲ្យមហាជនស្ទើរមិនជឿ បន្ទាប់ពីលោក ជិន សុខង៉េង ដែលទើបមាន អាយុត្រឹម២៦ឆ្នាំ បានឈរឈ្មោះ និងដណ្តើមតំណែងជាចៅសង្កាត់សាលាកំរើកថ្មី នៅក្រុងសៀមរាប។ ជិន សុខង៉េង មិនយល់ស្របទេ ចំពោះមតិដែលលើកឡើងថា ក្មេងគ្មានបទពិសោធន៍ គ្មានសមត្ថភាពដឹកនាំ។ សុខង៉េង ពន្យល់ថា គេមិនអាចយកខ្នាតអ្វីមួយ មកវាស់ពីបទពិសោធន៍ និងសមត្ថភាពឡើយ តែផ្ទុយទៅវិញ ក្មេងអាចធ្វើអ្វីមួយប្រសើរជាងមនុស្សចាស់ក៏ថាបាន។

មានស្រុកកំណើតនៅខេត្តកំពង់ចាម យុវជន ជិន សុខង៉េង មានបងប្អូនចំនួន២នាក់ ហើយ លោកគឺជាកូនច្បង។ លោកបញ្ចប់ថ្នាក់វិទ្យាល័យនៅឆ្នាំ២០០៩ និងបន្តរៀនថ្នាក់ មហាវិទ្យាល័យនៅសាលាវិទ្យាសាស្ត្រសុខាភិបាល ហៅកាត់សាលាក្រហម ឯកទេសជំនាញ កុមារ។ ក្រោយបញ្ចប់ការសិក្សានៅឆ្នាំ២០១៥ សុខង៉េង បានចូលប្រឡូកក្នុងនយោបាយភ្លាម បន្ទាប់ពីគេបានចូលរួមជាក្រុមយុវជនគណបក្សសង្គ្រោះជាតិ តាំងពីឆ្នាំ២០១២មក។ សុខង៉េង បានចុះមកដឹកនាំក្រុមយុវជននៅខេត្តសៀមរាបនៅឆ្នាំ២០១៥ ហើយនៅឆ្នាំ២០១៧នេះ គេក៏មានឳកាសឈរឈ្មោះដណ្តើមតំណែងចៅសង្កាត់សាលាកំរើក ក្នុងក្រុងសៀមរាប។

តើយុវជន ជិន សុខង៉េង មានគោលនយោបាយបែបណាខ្លះ ដើម្បីដឹកនាំ និងអភិវឌ្ឍន៍ សង្កាត់សាលាកំរើក? សូមស្តាប់បទសម្ភាសខាងក្រោមនេះដូចតទៅ៖

អ៊ីសា រ៉ហានី៖ លោក សុខង៉េង នៅពេលដែលលោកដឹងពីលទ្ធផល ដែលលោកជាប់ជាចៅសង្កាត់សាលាកំរើក តើពេលនោះ លោកមានអារម្មណ៍បែបណា?

ជិន សុខង៉េង៖ ជាបឋមខ្ញុំសូមគោរពបងប្អូនប្រជាពលរដ្ឋទូទាំងប្រទេស ជាពិសេសបងប្អូន និងយុវជននៅសង្កាត់សាលាកំរើក ដែលបានបោះឆ្នោតគាំទ្រគណបក្សសង្គ្រោះជាតិ ជាពិសេសគាំទ្ររូបខ្ញុំ និងសហការីនៅសង្កាត់សាលាកំរើក ដែលទទួលបានជោគជ័យដ៏ត្រចេះត្រចង់នៃការបោះឆ្នោតក្រុមប្រឹក្សាឃុំ-សង្កាត់នាពេលកន្លងមក។ លទ្ធផលនេះ គឺបង្ហាញពី ប្រជាពលរដ្ឋដែលចង់ឲ្យមានការផ្លាស់ប្តូរ ដែលនៅសង្កាត់សាលាកំរើក គាត់ឆ្លុះបញ្ចាំងពីភាព អវិជ្ជមាននៃការដឹកនាំកន្លងរបស់អាជ្ញាធរ។ ហើយទាំងអស់នេះឆ្លុះបញ្ចាំងអំពី តថភាពពិតនៃ សង្គមផងដែរក្នុងការរួមចំណែកក្នុងការផ្លាស់ប្តូរមេដឹកនាំ ដែលដឹកនាំយូរ។ ខ្ញុំមានអារម្មណ៍ថា នៅសង្កាត់ខ្ញុំត្រូវបានផ្លាស់ប្តូរមេដឹកនាំ ហើយខ្ញុំមានសេចក្តីសប្បាយចិត្ត ជាមួយប្រជាពលរដ្ឋ ជាពិសេសពលរដ្ឋនៅសង្កាត់សាលាកំរើក មានសេចក្តីត្រេកអរ ចំពោះការផ្លាស់ប្តូរនេះ ព្រោះពួកគាត់ចង់បានមេដឹកនាំថ្មី ចង់ឲ្យសង្កាត់របស់គាត់មានការអភិវឌ្ឍឆាប់រហ័ស។

អ៊ីសា រ៉ហានី៖ ចំណុចដំបូង នៅពេលលោកក្លាយជាចៅសង្កាត់ពេញលេញ តើអ្វីដែលលោកគិតថាជាចំណុចអទិភាពដែលត្រូវធ្វើមុនគេ?

ងិន សុខង៉េង៖ ចំណុចអាទិភាពដែលយើងត្រូវបម្រើជូនពលរដ្ឋ គឺទីមួយ ផ្នែកសេវារដ្ឋបាល យើងនឹង ធ្វើកំណែទម្រង់សេវារដ្ឋបាលចាស់ ឲ្យក្លាយជាសេវារដ្ឋបាលមួយដែលបម្រើពលរដ្ឋល្អ ដោយមិនពុករលួយ។ ទីពីរ គឺធ្វើឯកសារជូនពលរដ្ឋ ដោយទាន់ពេលវេលា តាមពេលកំណត់នៃច្បាប់។ ទីបី ពាក់ព័ន្ធទៅនឹងកត្តាដែលយើងរៀបចំសេវារដ្ឋបាលដើរបានល្អ ដែលធ្វើឲ្យប្រជាពលរដ្ឋទាំងអស់ អាចទទួលយកបាន។ ហើយ អ្វីដែលយើងត្រូវធ្វើបន្តទៀត តាមផែនការដែរ គឺទាក់ទងទៅនឹងការងារបរិស្ថាន។ បរិស្ថានជា កត្តាសំខាន់បំផុត ក្នុងការចូលរួមចំណែកអភិវឌ្ឍន៍ជីវភាពរស់នៅរបស់ប្រជាពលរដ្ឋក្នុងសង្កាត់សាលាកំរើក ព្រោះថា សង្កាត់សាលាកំរើកគឺជាសង្កាត់មួយនៅក្នុងក្រុងសៀមរាប ដែលប្រជាពលរដ្ឋគឺពឹងផ្អែកលើវិស័យទេសចរណ៍។ បើសិនយើងអត់បាន ផ្អែកទៅលើកត្តា បរិស្ថានដែលកេងចំណេញពីផលសេដ្ឋកិច្ចនៃការអភិវឌ្ឍវិស័យទេសចរណ៍ជូនពលរដ្ឋទេ គឺការអភិវឌ្ឍយើងមិនបានជោគជ័យទេ។ កត្តាមួយទៀត គឺបញ្ហាដែលយើងត្រូវសិក្សា គឺបញ្ហាប្រឈម ទាក់ទងទៅនឹងប្រព័ន្ធលូ ប្រព័ន្ធផ្លូវ ដែលត្រូវដោះ ស្រាយផងដែរ។ កន្លងមកប្រជាពលរដ្ឋមានការរអ៊ូរទាំទៅនឹងការរៀបហេដ្ឋារចនាសម្ព័ន្ធនៅ ក្នុងសង្កាត់នេះ។ ខ្ញុំសូមបញ្ជាក់ថា គណបក្សសង្គ្រោះជាតិ នឹងរៀបចំសិក្សាអំពីបញ្ហាទាំងអស់នេះ ដើម្បីយកមកជជែក ហើយបង្កើតវេទិកាសេរីមួយដើម្បីស្រង់មតិប្រជាពលរដ្ឋ ដើម្បីយើង សិក្សាពីបញ្ហា ដើម្បីយើងរកមូលហេតុទាំងអស់ហ្នឹង គឺយើងត្រូវធ្វើការដោះស្រាយបញ្ហា។

អ៊ីសា រ៉ហានី៖ ដោយសារលោកនៅក្មេង ខ្ញុំនៅឆ្ងល់ថា ហេតុអ្វីប្រជាពលដ្ឋទាំងចាស់ ទាំងក្មេង បោះឆ្នោតគាំទ្រ និងផ្តល់ទំនុកចិត្តដល់លោក លោកមានអ្វីពិសេស?

ងិន សុខង៉េង៖ ព្រោះថាពីមុន គេគិតថា ក្មេងអត់មានសមត្ថភាពទេ ក្មេងអត់មានបទពិសោធន៍ ទេ ប៉ុន្តែរហូតមកដល់បច្ចុប្បន្ននេះ គឺសង្គម ជាពិសេសបច្ចេកវិទ្យាទំនើប យុវជនមានការ រៀនសូត្រជ្រៅជ្រះ ពួកគាត់មិនដែលធ្វើការងារទាំងអស់ហ្នឹង មិនមែនអត់មានបទពិសោធន៍ទេ ព្រោះពួកគាត់មិនធ្វើការកន្លែងហ្នឹង តែធ្វើនៅកន្លែងផ្សេង អ៊ីចឹងបទពិសោធន៍របស់គាត់ មាននៅកន្លែងផ្សេង ចុះបើបញ្ញវន្តទាំងអស់ ដែលគាត់ចង់ចូលរួមអភិវឌ្ឍន៍សង្គម ពួកគាត់នឹងរៀបចំខ្លួន ដើម្បីអភិវឌ្ឍន៍មូលដ្ឋានរបស់គាត់។ ហើយខ្ញុំសូមបញ្ជាក់ថា រឿងបទពិសោធន៍ រឿងសមត្ថភាព យើងមិនអាចយកខ្នាតអ្វីយកមកវាស់ទេ។ ដើម្បីយកខ្នាតមួយយកមកវាស់ថា អ្នកណាមួយមានសមត្ថភាព អ្នកណាមួយប្រកបដោយគុណភាព គឺយើងត្រូវបើកឱកាសឲ្យយុវជនដឹកនាំនៅមូលដ្ឋាន ឲ្យពួកគាត់មានឱកាសក្នុងការដឹកនាំ ទើបការងារទាំងអស់ជោគជ័យ។ អ៊ីចឹងយើងមិនអាចវាយតម្លៃអ្នកណាម្នាក់ថា អត់មានបទពិសោធន៍ អត់ដែលដឹកនាំនៅថ្នាក់ភូមិឃុំ ប៉ុន្តែពួកគាត់ធ្លាប់ដឹកនាំនៅថ្នាក់លើហ្នឹងទៀត។

អ៊ីសា រ៉ហានី៖ តើលោកមានចំណុចពិសេសអ្វីខ្លះ ទើបគណបក្សឲ្យលោកឈរឈ្មោះនៅលេខរៀងទីមួយ?

ងិន សុខង៉េង៖ ខ្ញុំមានលក្ខណៈពិសេស ហើយសហការីខ្ញុំក៏មានចំណុចពិសេសផ្សេងៗគ្នា។ ប៉ុន្តែខ្ញុំ ចង់បញ្ជាក់ថា ខ្ញុំធ្លាប់ដឹកនាំស្ថាប័នយុវជន ជាស្ថាប័នធំនៅទូទាំងខេត្ត ហើយខ្ញុំក៏ធ្លាប់ជា ប្រធានការិយាល័យកិច្ចការបោះឆ្នោតទទួលបន្ទុកទូទាំងប្រទេសដែររបស់គណបក្ស ហើយខ្ញុំមិនមែនតែធ្វើការងារទាំងអស់ហ្នឹងទេ ខ្ញុំធ្លាប់ធ្វើការជាមួយអង្គការនានាដែលចូលរួមអភិវឌ្ឍន៍សង្គម។ ទាំងអស់នេះ ខ្ញុំនឹងរៀបចំបទពិសោធន៍របស់ខ្ញុំ រៀបចំចំណេះដឹងដែលខ្ញុំមាន ហើយកម្លាំងដែលខ្ញុំមានទាំងអស់ហ្នឹង យកទៅអភិវឌ្ឍន៍សង្កាត់មួយនេះឲ្យមានការអភិវឌ្ឍពិតប្រាកដ។ ហើយខ្ញុំសុំបញ្ជាក់ដែរថា យុវជនគឺគាត់កម្លាំងថ្មី។ កម្លាំងថ្មី គឺពោរពេញទៅដោយ សក្កានុពលក្នុងការអភិវឌ្ឍភូមិឃុំ។

អ៊ីសា រ៉ហានី៖ លោក សុខង៉េង ដោយសារលោករៀនចប់ថ្នាក់វេជ្ជសាស្ត្រជំនាញកុមារទេ តើហេតុអ្វីបានជាលោកចូលចិត្តនយោបាយ ហើយលោកគិតថា លោកមានសមត្ថភាពគ្រប់ គ្រាន់ទេក្នុងការដឹកនាំសង្កាត់សាលាកំរើក?

ងិន សុខង៉េង៖ រឿងទាក់ទងនឹងជំនាញ គឺជាផ្នែកមួយ ប៉ុន្តែគេនិយាយអំពីទេពកោសល្យរបស់ មនុស្ស ព្រោះទេពកោសល្យរបស់មមនុស្ស ហើយនឹងបទពិសោធន៍ដែលខ្ញុំ និងសហការីខ្ញុំ ទទួលបាននៅក្នុងសង្គម។ បទពិសោធន៍ទាំងអស់ហ្នឹង គឺខ្ញុំនឹងយកទៅអនុវត្តន៍នៅថ្នាក់ភូមិ សង្កាត់ ហើយមិនត្រឹមប៉ុណ្ណឹង ខ្ញុំនៅវ័យក្មេង ខ្ញុំអាចបន្តការសិក្សាផ្នែកផ្សេងៗទៀត ដែលអាច ធ្វើឲ្យសង្គមរបស់ខ្ញុំ មានការរីកចម្រើន។ ទីពីរ អ្នកនៅជុំវិញខ្ញុំ មិត្តភក្តិរបស់ខ្ញុំ សុទ្ធសឹងជា បញ្ញវន្ត គាត់នឹងផ្តល់ប្រឹក្សាជូនខ្ញុំជាច្រើនទៀត មិនត្រឹមតែនៅក្នុងបណ្តុំរបស់ខ្ញុំទេ ពួកគាត់នឹង រៀបចំ នឹងផ្តល់គំនិតយោបល់ផ្សេងៗទៀត ដើម្បីអភិវឌ្ឍន៍ភូមិឃុំនេះឲ្យមានការរីកចម្រើន។

អ៊ីសា រ៉ហានី៖ ទៅថ្ងៃខាងមុខ តើលោកមានមហិច្ឆតាបែបណាដែរចំពោះនយោបាយ ក្រៅពី តំណែងជាចៅសង្កាត់ ថា តើទៅថ្ងៃមុខលោកមានបំណងក្លាយជាតំណាងរាស្ត្រដែរឬទេ?

ងិន សុខង៉េង៖ រឿងមហិច្ឆតានរណាក៏មានដែរ។ ប្រសិននរណាម្នាក់និយាយថា ខ្លួនអត់ចង់ បានអី ធ្វើនយោបាយអត់ចង់បានអី អ្នកហ្នឹង កុហកហើយ។ ធ្វើនយោបាយគឺចង់បាន ចង់បាន តំណែង។ ប៉ុន្តែតំណែងហ្នឹងយកទៅបម្រើពលរដ្ឋ ដើម្បីប្រទេសជាតិ និងមាតុភូមិ មិនមែន យកតំណែងនោះ យកទៅគាបប្រជាពលរដ្ឋ យកទៅគំរាមកំហែងប្រជាពលរដ្ឋ យកទៅ ប្រព្រឹត្តិអំពើពុករលួយនោះទេ។ មហិច្ឆតា គឺសំដៅលើអ្វីដែលចង់បាន វាមានពីរធាតុផ្សំគឺ មហិច្ឆតាដែលចង់ដឹកនាំប្រជាពលរដ្ឋឲ្យមានការរីកចម្រើន មហិច្ឆតាចង់បាននូវលាភសក្ការ ផ្ទាល់ខ្លួន។
ហើយខ្ញុំសូមបញ្ជាក់ដែរថា ជាទូទៅគេសិក្សាស្រាវជ្រាវទៅឃើញថា ប្រទេសនៅ អឺរ៉ុបភាគច្រើន អ្នកដែលគេទទួលបានតំណែង គេគិតខ្លួនគេ គេថាគេទទួលបន្ទុកមួយហើយ គេត្រូវទទួលការរ៉ាប់រងជាច្រើន ត្រូវបម្រើពលរដ្ឋ។ ប៉ុន្តែខុសនៅអាស៊ីរបស់យើង កាលណា ទទួលបានតំណែង មានន័យថា ខ្លួនហ្នឹងត្រូវមានអំណាចលើប្រជាពលរដ្ឋ។ សម្រាប់ខ្ញុំ នឹង យកអ្វីដែលខ្ញុំលើកឡើងដំបូង ដែលខ្ញុំបានសិក្សាថាផលប៉ះពាល់ គឺខ្ញុំត្រូវតែយកការដែលខ្ញុំបម្រើពលរដ្ឋ ខ្ញុំអត់យកអ្វីដែលជិះជាន់ពលរដ្ឋ ព្រោះសព្វថ្ងៃ យើងត្រូវចាក់គ្រឹះប្រជាធិបតេយ្យ នៅថ្នាក់មូលដ្ឋាន ចឹងអ្នកបញ្ញាវន្តទាំងអស់ ត្រូវតែចុះមកមូលដ្ឋាន ដើម្បីឲ្យប្រជាធិបតេយ្យ ជាពិសេសការគោរពសិទ្ធិមនុស្ស ជាពិសេសអ្នកដែលចេះដឹងហ្នឹងត្រូវតែនៅជាប់ជាមួយ ប្រជាពលរដ្ឋ កាលណានៅជាប់ប្រជាពលរដ្ឋធ្វើឲ្យល្បឿននៃការអភិវឌ្ឍសេដ្ឋកិច្ចនៅក្នុងសង្គម របស់យើង កាន់តែមានប្រសិទ្ធភាពថែមទៀត៕