ជាតិ
អាជ្ញាធរអប្សរា៖ សំណង់ខុសច្បាប់នៅបរិវេណអង្គរត្រូវរុះរើជាបន្ទាន់
×
សៀមរាប៖ អាជ្ញាធរជាតិអប្សរា បានសម្តែងក្តីបារម្ភចំពោះការរីករាលដាលសំណង់ខុសច្បាប់ក្នុងឧទ្យានអង្គរ អំឡុងពេលមុនបោះឆ្នោតជ្រើសរើសក្រុមប្រឹក្សាឃុំ-សង្កាត់ អាណត្តិទី៤។ ក្តីបារម្ភនេះ បន្ទាប់ពីអាជ្ញាធរជាតិអប្សរារកឃើញថា មានសំណង់ខាងហោចណាស់ជាង៥០០ ត្រូវបានសាងសង់ក្នុងឧទ្យានអង្គរ ដែលសំណង់ខ្លះសង់កៀកសំណង់ប្រាសាទបុរាណ។
អាជ្ញាធរជាតិអប្សរា តាមរយៈទំព័រហ្វេសប៊ុកផ្លូវការរបស់ខ្លួនបានបង្ហាញក្តីបារម្ភយ៉ាងដូច្នេះថា៖ «ក្នុងកំឡុងពេលពីរសប្តាហ៍ចាប់ពីថ្ងៃទី២០ ខែឧសភា រហូតដល់ថ្ងៃទី២ ខែមិថុនា ឆ្នាំ២០១៧ កន្លងមកនេះ សកម្មភាពរំលោភសាងសង់ ចាក់ដីបំពេញខុសច្បាប់ក្នុងតំបន់១និងតំបន់២នៃរមណីយដ្ឋានអង្គរមានការកើនឡើងយ៉ាងគំហុកបង្កឲ្យមានការប៉ះពាល់យ៉ាងខ្លាំងដល់តម្លៃលេចធ្លោជាសកលនៃបេតិកភណ្ឌ ក៏ដូចជាកិច្ចការគ្រប់គ្រង អភិរក្សនិងអភិវឌ្ឍន៍ដោយចីរភាពនៃរមណីយដ្ឋានអង្គរ ដែលជាបេតិកភណ្ឌពិភពលោកនិងជាអត្តសញ្ញាណជាតិដ៏ថ្លៃថ្លានៃកម្ពុជា។ តំបន់១និងតំបន់២នៃរមណីយដ្ឋានអង្គរត្រូវបានកំណត់ដោយព្រះរាជក្រឹត្យលេខ០០១នស ស្តីពីការកំណត់និងការចាត់ចែងគ្រប់គ្រងតំបន់សៀមរាប អង្គរ ចុះថ្ងៃទី២៨ ខែឧសភា ឆ្នាំ១៩៩៤ ជាតំបន់គ្របដណ្តប់យ៉ាងច្រើនដោយប្រាសាទបុរាណ និងសំណល់បុរាណវិទ្យាដែលចាំបាច់ត្រូវការពារក្នុងកម្រឹតខ្ពស់បំផុត។ គួរកត់សម្គាល់ថា ព្រះរាជក្រឹត្យលេខ០០១នស គឺជាព្រះរាជក្រឹត្យដំបូងបង្អស់ដែលចុះព្រះហស្ថលេខាដោយព្រះមហាក្សត្រ ព្រះបរមរតនកោដ្ឋ បន្ទាប់ពីព្រះអង្គបានឡើងគ្រងរាជសម្បត្តិជាថ្មីម្តងទៀតនៅឆ្នាំ១៩៩៣»។
តាមរបាយការណ៍ដែលអាជ្ញាធរជាតិអប្សរាទទួលបានពីនាយកដ្ឋានសណ្តាប់ធ្នាប់ និងសហប្រតិបត្តិការ ដែលបានតាមដានកិច្ចការនេះ ទាំងការចាក់បំពេញដី និងការសាងសង់ សំណង់ខុសច្បាប់អំឡុងពេលមុនបោះឆ្នោត មានចំនួន ៥២៤ករណី ហើយសំណង់ទាំងនោះមានសង់កៀកនឹងកំផែងប្រាសាទបន្ទាយក្តីផងដែរ។ អាជ្ញាធរជាតិអប្សរាបានហៅសកម្មភាព ទាំំងនេះថា៖«…បានក្លាយជាសកម្មភាពអវិជ្ជមានដ៏ធ្ងន់ធ្ងរក្នុងការងារថែរក្សា ការពារ និងអភិរក្សរមណីយដ្ឋានអង្គរដែលសហគមន៍អន្តរជាតិនិងអង្គការយូណេស្កូតែងតែចាត់ទុកជាគំរូត្រូវយកតម្រាប់តាមជាលក្ខណៈអន្តរជាតិ ក៏ដូចជាធ្វើឲ្យអាប់អោនដល់កិត្យានុភាពរបស់កម្ពុជាក្នុងឆាកអន្តរជាតិលើវិស័យថែរក្សា ការពារបេតិកភណ្ឌ។ លើសពីនេះ សកម្មភាពខុសច្បាប់ទាំងនេះអាចរំខានដល់កិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការព្យាយាមបញ្ចូលប្រាសាទបុរាណខ្មែរមួយចំនួនទៀតជារមណីយដ្ឋានបេតិកភណ្ឌពិភពលោកផងដែរ»។
អាជ្ញាធរជាតិអប្សរា បានអំពាវនាវដល់ម្ចាស់សំណង់ ម្ចាស់ដីចាក់បំពេញខុសច្បាប់ទាំងអស់ ត្រូវរុះរើសំណង់ទាំងនោះជាបន្ទាន់ និងស្ម័គ្រចិត្ត និងដោយសា្មរតីសហការខ្ពស់។ ក្នុងករណីមិន ព្រមរុះរើ អាជ្ញាធរជាតិអប្សរា សហការជាមួយកម្លាំងចម្រុះនៃរដ្ឋបាលខេត្តសៀមរាប ដើម្បីចុះរុះរើ៕
Tag:
អង្គរ
សំណង់ខុសច្បាប់
© រក្សាសិទ្ធិដោយ thmeythmey.com