DS7 Crossback ដែលលោក ម៉ាក្រុង ជិះ មិនទាន់មានលក់នៅទីផ្សារឡើយ

រថយន្ត

អន្តរជាតិ

12, Jun 2017 , 8:39 pm

រូបភាព

នាពិធីឡើងកាន់តំណែងជាប្រធានាធិបតីបារាំង លោក អេម៉ានុយអែល ម៉ាក្រុង បានជិះរថយន្ត Renault Espace ទៅកាន់វិមាន Champs-Elysées បន្ទាប់មកលោកបានជិះក្នុងក្បួនរថយន្តយោធា ACMAT មុនពេលឡើងទៅលើរថយន្តបើកដំបូលដ៏ប្រណីតគឺរថយន្ត Citroën DS7 Crossback ដែលជារថយន្តផ្លូវការរបស់លោក។ បើតាមការផ្សាយរបស់សារព័ត៌មាន LCI លោកម៉ាក្រុង ទទួលបានរថយន្តនេះផ្តាច់មុខ ពោលគឺមុនពេលដែលវាបង្ហាញវត្តមាននៅលើទីផ្សារនៅខែមករា ឆ្នាំ២០១៨ ។

DS7 Crossback ជាម៉ូដែលថ្មីរបស់ក្រុមហ៊ុន Citroen ដែលផលិតនៅរោងចក្រ Mulhouse ក្នុងតំបន់ Haut-Rhin។ វាត្រូវបានផលិតឡើងជាពិសេសសម្រាប់លំដាប់ថ្នាក់ប្រធានាធិបតី និងមានបច្ចេកទេសសុវត្ថិភាពទៅតាមនិយាមអន្តរជាតិផងដែរ។ និមិត្តសញ្ញា DS ជាប់ជាមួយពណ៌ខៀវ ស និងក្រហម។

យោងតាមការផ្សាយរបស់ L’Express លោក ម៉ាក្រុង មិនមែនជាប្រធានាធិបតីទីមួយនោះឡើយដែលបានជ្រើសរើសយករថយន្ត Citroën។ កន្លងមក ប្រធានាធិបតីនៃសាធារណរដ្ឋទី៥បារាំងដូចជា លោក Charles de Gaulle លោក Georges Pompidou និងលោក Jacques Chirac ជាដើមសុទ្ធតែបានជ្រើសរើសយកម៉ាកក្នុងស្រុកមួយនេះ សម្រាប់ជិះក្នុងមួយតំណែងរបស់ខ្លួន។

ប្រធានាធិបតីដែលទើបផុតអណត្តិ លោក ហ្វ្រង់ស្វ័រ ហូឡង់ ក៏បានជ្រើសរើសយករថយន្ត Citroen DS ផងដែរកាលពីឆ្នាំ២០១២ ហើយលោកបានចាកពី Elysee ជាមួយនឹងរថយន្ត DS5 Hybrid 4 បន្ទាប់ពីពិធីផ្ទេរតំណែងរួច៕