ពិធីស្រាយបួសខ្មែរឥស្លាម៖ រដ្ឋាភិបាលរៀបចំថ្ងៃ១៥ បក្សសង្គ្រោះជាតិយកថ្ងៃទី២០ មិថុនា

ជាតិ

ពិធីស្រាយបួសខ្មែរឥស្លាម៖ រដ្ឋាភិបាលរៀបចំថ្ងៃ១៥ បក្សសង្គ្រោះជាតិយកថ្ងៃទី២០ មិថុនា

14, Jun 2017 , 8:39 am

រូបភាព

«កម្មវិធីពិសារអាហារស្រាយបួសឆ្នាំ២០១៤ ដែលរៀបចំឡើងដោយរាជរដ្ឋាភិបាលកម្ពុជា»។

ដោយ: អុីសា រ៉ហានី (Isa Rohany)

នៅឆ្នាំ២០១៧នេះ គឺជាឆ្នាំទី៤ហើយ ដែលប្រមុខរាជរដ្ឋាភិបាលកម្ពុជា បានប្រកាសរៀបចំពិធីអាហារស្រាយបួសជាមួយសាសនិកខ្មែរឥស្លាម នៅក្នុងខែបុណ្យរ៉ម៉ាឌន។ ក្រោយកិច្ចប្រជុំ គណកម្មាធិការរៀបចំអាហារស្រាយបួស បានកំណត់យកថ្ងៃទី១៥ មិថុនា ជាថ្ងៃកម្មវិធី។ ក្រៅពីនេះ គណបក្សសង្គ្រោះជាតិ ក៏បានប្រកាសពីការរៀបចំកម្មវិធីនេះដែរ។ បក្សសង្គ្រោះជាតិ កំណត់យកថ្ងៃទី២០ មិថុនា ជាថ្ងៃជួបជុំខ្មែរស្លាមដែលគាំទ្រគណបក្សសង្គ្រោះជាតិ។

តាមកិច្ចប្រជុំចុងក្រោយនៃកិច្ចប្រជុំរបស់គណកម្មាធិការរៀបចំអាហារស្រាយបួសរបស់រាជរដ្ឋាភិបាលកម្ពុជា អ្នកចូលរួមក្នុងពិធីឆ្នាំទី៤នេះ គឺមានអ្នកចូលរួមចំនួន ៤៥០០នាក់ ដែលក្នុងនោះមានមន្ត្រីរាជការ មន្ត្រីទូត ប្រធានអង្គការ ក្រុមហ៊ុន និងសាសនិកខ្មែរឥស្លាមទូទៅប្រទេសចូលរួម។ កម្មវិធីនេះ នឹងរៀបចំឡើងនៅសាសសន្និសីទកោះពេជ្រ នៅរសៀលថ្ងៃទី១៥ មិថុនា។ នេះបើតាមការបញ្ជាក់របស់លោក យ៉ូប អាស់អារី ដែលជាក្រុមការងាររៀបចំពិធី។

ដោយឡែក គណបក្សសង្គ្រោះជាតិវិញ ប្រធានចលនាខ្មែរឥស្លាមលោក អ៊ីសា ឧស្មាន បានសរសេរក្នុងបណ្តាញសង្គមហ្វេសប៊ុករបស់លោកថា ការជួបជុំពិសាអាហារស្រាយបួសរួម គឺធ្វើនៅថ្ងៃទី២០ មិថុនា។ តាមលោក ឧស្មាន ពិធីនេះក្រៅពីឯកឧត្តម កឹម សុខា ដែលជាប្រធាន គឺមានការចូលរួមពីសំណាក់លោក សម រង្ស៊ី ដែលជាអតីតប្រធានគណបក្ស តាមរយៈវីដេអូខន់ហ្វើរ៉ិន (Skype) ផងដែរ។ យ៉ាងណា ការរៀបចំនេះមិនទាន់កំណត់ចំនួនមនុស្ស និងទីតាំងជាក់ លាក់នៅឡើយ៕