អន្តរជាតិ
Brexit៖ ការចរចាចែកផ្លូវរវាងអឺរ៉ុបនិងអង់គ្លេស ចាប់ផ្ដើមនៅព្រុចសែល តំណាងចរចារបស់ចក្រភពអង់គ្លេស David Davis និងដៃគូអឺរ៉ុប Michel Barnier
× ការចរចាចែកផ្លូវគ្នារវាងសហភាពអឺរ៉ុប និងចក្រភពអង់គ្លេស បានចាប់ផ្ដើមហើយនៅថ្ងៃទី១៩ ខែមិថុនា នៅឯទីក្រុងព្រុចសែល ដើម្បីកំណត់លក្ខខណ្ឌនៃទំនាក់ទំនងថ្មីរវាងភាគីទាំងពីរក្រោយការចាកចេញរបស់អង់គ្លេស។ ដំណើរការចរចានេះ នឹងធ្វើឡើងរយៈពេល២ឆ្នាំ ហើយសហភាពអឺរ៉ុប ក៏ដូចជាអង់គ្លេស នឹងមានឱកាសនិយាយគ្នាឲ្យបានច្បាស់លាស់ពីទំនាក់ទំនងថ្មី ព្រោះមេដឹកនាំអឺរ៉ុប និងអង់គ្លេស សុទ្ធតែបានអះអាងថានេះជាដំណាក់កាលដែលមិនអាចបកក្រោយបាន។
តំណាងចរចារបស់ចក្រភពអង់គ្លេស បានចាប់ផ្ដើមការចរចាជាមួយដៃគូសហភាពអឺរ៉ុបរបស់ខ្លួនដើម្បីចាប់ផ្ដើមការពិភាក្សាលើការចាកចេញរបស់អង់គ្លេសពីសហភាពអឺរ៉ុប។ រដ្ឋមន្ត្រីទទួលបន្ទុកការចាកចេញរបស់អង់គ្លេស David Davis បានទៅដល់ទីក្រុងព្រុចសែល ដើម្បីជួបជាមួយសមភាគីអឺរ៉ុបរបស់លោក ក្នុងការកំណត់លក្ខខណ្ឌចាកចេញរបស់អង់គ្លេស និងទំនាក់ទំនងថ្មីរវាងភាគីទាំងពីរក្រោយការលែងលះចប់ស្ថាពរ។
ការចរចាចាប់ផ្ដើមនៅថ្ងៃទី១៩ ខែមិថុនា ធ្វើឡើងជិតមួយឆ្នាំក្រោយប្រជាជនអង់គ្លេសសម្រេចចិត្តបោះឆ្នោតជ្រើសរើសការចាកចេញក្នុងប្រជាមតិកាលពីថ្ងៃទី២៣ ខែមិថុនា ឆ្នាំ២០១៦ ។ ទាំងអង់គ្លេសផ្ទាល់ ទាំងសមាជិកសហភាពអឺរ៉ុបផ្សេងទៀត ភ្ញាក់ផ្អើលខ្លាំងនឹងលទ្ធផលប្រជាមតិនេះ ដែលជាការចាប់ផ្ដើមការកាត់ផ្ដាច់រាល់ទំនាក់ទំនងទាំងអស់រវាងអង់គ្លេស និងអឺរ៉ុប។ បើទោះជាពិបាកទទួលយកកក្ដី ភាគីទាំងពីរសុទ្ធតែបានសន្យាអនុវត្តតាមបំណងរបស់ប្រជាជនអង់គ្លេស។
នៅព្រុចសែល លោក David Davis ជួបដៃគូចរចាជនជាតិបារាំង Michel Barnier នៅស្នាក់ការគណៈកម្មការអឺរ៉ុប។ យ៉ាងណាក្ដី មន្ត្រីមកពីភាគីទាំងពីរក៏បានប្រាប់មុនដែរថា កុំសង្ឃឹមអ្វីៗសម្រេចក្នុងជំនួបលើកទីមួយនេះឲ្យសោះ។ នេះ ក៏ព្រោះតែពេលវេលានៅឆ្ងាយទៀតទម្រាំដល់ឆ្នាំ២០១៩ ដែលជាកាលបរិច្ឆេទចុងក្រោយនៃការចរចា ហើយម្យ៉ាងទៀតនោះ ភាគីទាំងសងខាងត្រូវចរចាលើចំណុចជាច្រើនចាប់ពីទំនាក់ទំនងពាណិជ្ជកម្ម និងការបង់ថ្លៃលែងលះរបស់អង់គ្លេសឲ្យអឺរ៉ុបជាដើម។
បើតាមទីភ្នាក់ងារព័ត៌មាន Reuters លោក David Davis ចាត់ទុកជំនួបលើកដំបូងនេះ គ្រាន់តែជាការចាប់ផ្ដើមកាងារដ៏លំបាកប៉ុណ្ណោះ។ ទោះជាការចរចាមិនងាយស្រួលក្ដី តំណាងរបស់អង់គ្លេសរូបនេះនៅតែចង់បានលទ្ធផលល្អប្រសើរដែលភាគីទាំងពីរទទួលយកបាន តាមរយៈការពិភាក្សាប្រកបគំនិតស្ថាបនា ខណៈអង់គ្លេសហាក់ដូចជាត្រៀមខ្លួនរួចរាល់ហើយសម្រាប់កាលៈទេសៈដ៏លំបាកនៅពេលខាងមុខនេះ។
ជាមួយគ្នានេះដែរ នាយករដ្ឋមន្ត្រី ថេរ៉េសា ម៉េយ៍ ដែលទើបបង្កើតរដ្ឋាភិបាលក្រោយការបោះឆ្នោតមុនអាណត្តិ ក៏នឹងជួបជាមួយបណ្ដាមេដឹកនាំរដ្ឋសមាជិកអឺរ៉ុបនៅសប្ដាហ៍នេះដែរ។ ប៉ុន្តែលោកស្រី ម៉េយ៍ នឹងមិនមានការចរចាជាមួយដៃគូអឺរ៉ុបរបស់លោកស្រីឡើយពេលជួបគ្នានៅព្រុចសែល។ នេះអាចជាសញ្ញាល្អសម្រាប់ការចរចាលែងលះ ព្រោះអីរយៈកន្លងមកអង់គ្លេស និងអឺរ៉ុបក៏ធ្លាប់បានឆ្លើយឆ្លងគ្នាខ្លាំងៗលើបញ្ហានេះដែរ៕
Tag:
Brexit
អឺរ៉ុប
អង់គ្លេស
© រក្សាសិទ្ធិដោយ thmeythmey.com