ជាតិ
គ.ជ.ប នឹងចាត់វិធានការលើអ្នកដែលចោទស្ថាប័ននេះថា ស្ថិតក្រោមការគ្រប់គ្រងបរទេស ប្រធាននាយកដ្ឋានផ្សព្វផ្សាយ និងទំនាក់ទំនងសាធារណៈនៃ គ.ជ.ប លោក ខន កែវមនោ (រូបឆ្វេង)
× ភ្នំពេញ៖ គណៈកម្មាធិការជាតិរៀបចំការបោះឆ្នោត (គជប) ព្រមានចាត់វិធានការផ្លូវច្បាប់ បើសិនជានៅមានការផ្សព្វផ្សាយចោទមកស្ថាប័ន គ.ជ.ប ថា ស្ថិតក្រោមការគ្រប់គ្រងរបស់បរទេសទៀតនោះ ។
ការព្រមានរបស់ គ.ជ.ប នេះ ក្រោយពីបានចេញលិខិតបើកចំហជាសាធារណៈមួយ ដោយស្នើទៅស្ថាប័នពាក់ព័ន្ធចាត់វិធានការតាមផ្លូវច្បាប់ លើអ្នកប្រើប្រាស់បណ្ដាញទំនាក់ទំនងសង្គម ចំពោះការបង្ហោះបំផ្លើសព័ត៌មានចោទថាស្ថាប័នខ្លួន ទាក់ទងនឹងការបោះឆ្នោតកាលពីថ្ងៃទី៤ កន្លងមកនេះ។
ប្រធាននាយកដ្ឋានផ្សព្វផ្សាយ និងទំនាក់ទំនងសាធារណៈនៃ គ.ជ.ប លោក ខន កែវមនោ បានឲ្យសង្កេតឃើញថា បន្ទាប់ពីគ.ជ.ប ចេញលិខិតចំហហើយ មិនទាន់មានការផ្សព្វផ្សាយបង្ខូចកេរ្តិ៍ឈ្មោះ គ.ជ.ប ទៀតទេ ។ គ.ជ.ប ក៏កំពុងតាមដានមើលការផ្សព្វផ្សាយទាំងឡាយដែរ។ ថ្លែងប្រាប់សារព័ត៌មានថ្មីៗ លោក កែវមនោ បានបញ្ជាក់ដូច្នេះថា៖«បើសិននៅមានករណីនេះទៀត យើងនឹងពិនិត្យមើលទិដ្ឋភាពច្បាប់ និងចាត់វិធានការតាមផ្លូវច្បាប់»។
ទាក់ទងនឹងបញ្ហានេះ ក្រសួងមហាផ្ទៃ អះអាងថា ក្រសួងមិនអាចមានចំណាត់ការតាមផ្លូវច្បាប់លើប្រព័ន្ធផ្សព្វផ្សាយដែលថា គ.ជ.ប ស្ថិតក្រោមការគ្រប់គ្រងរបស់បរទេសនោះទេ លុះត្រាតែគ.ជ.ប ដាក់ពាក្យប្ដឹងមកក្រសួង។
កាលពីថ្ងៃទី១៣ មិថុនា គជប បានសរសេរលិខិតចំហមួយថា មានទំព័របណ្តាញសង្គមមួយចំនួនដែលបានបង្ហោះព័ត៌មានថាស្ថាប័នជំនាញការបោះឆ្នោតមួយនេះ ស្ថិតក្រោមការគ្រប់គ្រងរបស់បរទេស ទាក់ទងនឹងការចេញចំនួនបណ្ដោះអាសន្ន នៃអ្នកដែលបានទៅបោះឆ្នោតក្រុមប្រឹក្សាឃុំ-សង្កាត់ កន្លងមកនេះ។ គជប ចាត់ទុកថា ព័ត៌មាននេះមានចរិតញុះញង់ បង្កាច់បង្ខូចឈ្មោះរបស់ស្ថាប័នខ្លួន។ ហើយស្នើឲ្យស្ថាប័នពាក់ព័ន្ធត្រូវចាត់វិធានការណ៍តាមផ្លូវច្បាប់ និងទប់ស្កាត់ជុំវិញការលើកឡើងនេះ ដើម្បីធានាបរិយាកាសល្អនៃការបោះឆ្នោត៕
© រក្សាសិទ្ធិដោយ thmeythmey.com