ជាតិ
អាជ្ញាធរអប្សរានឹងរៀបចំរម្លឹកខួប២៥ឆ្នាំដែលអង្គរចូលក្នុងបញ្ជីបេតិកភណ្ឌពិភពលោក
× សៀមរាប៖ ក្រោយការខិតខំប្រឹងប្រែងរបស់រាជរដ្ឋាភិបាលកម្ពុជា រមណីយដ្ឋានអង្គរដែលមានផ្ទៃក្រឡា ៤០១គីឡូម៉ែត្រ ត្រូវបានអង្គការយូណេស្កូ សម្រេចបញ្ចូលក្នុងបញ្ជីសម្បត្តិបេតិកភណ្ឌពិភពលោក ដែលត្រូវការពារដោយអន្តរជាតិ។ រមណីយដ្ឋានអង្គរ បានក្លាយជាសម្បត្តិបេតិកភណ្ឌពិភពលោកនៅថ្ងៃទី១៤ ខែធ្នូ ឆ្នាំ១៩៩២ ហើយឆ្នាំ២០១៧នេះ គឺខួប២៥ឆ្នាំ។
ក្នុងពិធីបើកកិច្ចប្រជុំអាយស៊ីស៊ី-អង្គរ នៅព្រឹកថ្ងៃទី២១ ខែមិថុនា អ្នកនាំពាក្យ អាជ្ញាធរជាតិអប្សរា លោក ឡុង កុសល បានប្រាប់អ្នកសារព័ត៌មានថា អាជ្ញាធរជាតិអប្សរា នឹងរៀបចំកម្មវិធីរម្លឹកខួប ២៥ឆ្នាំ ដែលរមណីដ្ឋានអង្គរ ចុះក្នុងបញ្ជីសម្បត្តិបេតិកភណ្ឌដែលត្រូវ ការការពារដោយអន្តរជាតិ។
លោក ឡុង កុសល បញ្ជាក់ថា ការរៀបចំពិធីនេះ គឺដើម្បីបង្ហាញពីមោទកភាពរបស់យើងទាំងអស់គ្នា ក្នុងនាមជាប្រជាពលរដ្ឋខ្មែរ ជូនដល់សកលលោក ឲ្យមានស្មារតីស្រឡាញ់ ថែរក្សា និងអភិរក្ស និងចូលរួមក្នុងការងារថែរក្សាមរតកដូនតាមួយនេះ។ យ៉ាងណា អ្នកនាំពាក្យអាជ្ញាធរជាតិអប្សរា មិនទាន់បញ្ជាក់ពីពេលវេលា និងទីកន្លែងធ្វើកម្មវិធីនៅឡើយ៕
© រក្សាសិទ្ធិដោយ thmeythmey.com