ជាតិ
ក្រសួងបរិស្ថានស្នើឲ្យភាគីពាក់ព័ន្ធសហការរៀបចំការអភិវឌ្ឍរមណីយដ្ឋានភ្នំគូលែន
× សៀមរាប៖ រយៈពេលជិត២ឆ្នាំមកហើយ ដែលរមណីយដ្ឋានភ្នំគូលែន ត្រូវបានរាជរដ្ឋាភិបាល សម្រេចបញ្ចប់អាណត្តិគ្រប់គ្រងពីក្រុមហ៊ុន នគរគោកធ្លក មកឲ្យក្រសួងបរិស្ថាន គ្រប់គ្រងជំនួស។ ការស្នើសុំរបស់ក្រសួងបរិស្ថាននៅពេលនោះ ដោយរំពឹងថា ខ្លួននឹងអាចស្តារព្រៃឈើនៅឧទ្យានភ្នំគូលែនបានឡើងវិញ ក្រោយសកម្មភាពកាប់ទន្ទ្រានព្រៃ មានសភាពខ្លាំងក្លា ដែលពិបាកនឹងទប់ស្កាត់។ របាយការណ៍របស់អង្គការអន្តរជាតិមួយ ដែលចេញផ្សាយកាលពីពេលថ្មីៗនេះ បានបង្ហាញឲ្យឃើញថា ព្រៃឈើទាំងមូលនៅលើភ្នំគូលែននៅសល់មិនដល់២០%ផង។
នៅក្នុងកិច្ចប្រជុំគណៈកម្មាធិការ អាយស៊ីស៊ី-អង្គរ ដែលរៀបចំធ្វើនៅព្រឹកថ្ងៃទី២១ មិថុនា នៅស្ថាប័នអាជ្ញាធរជាតិអប្សរា រដ្ឋមន្ត្រីក្រសួងបរិស្ថាន លោក សាយ សំអាល់ បានបង្ហាញ ដល់គណៈកម្មាធិការអំពីសក្កានុពលនានានៅលើភ្នំគូលែន ក្នុងនោះមានទាំងបុរាណដ្ឋាន និងព្រៃឈើ។ លោករដ្ឋមន្ត្រី បានរម្លឹកពីការងារមួយចំនួន ដែលក្រសួងបានខិតខំប្រឹងប្រែង ស្នើសុំឲ្យរាជរដ្ឋាភិបាលលុបក្រុមហ៊ុនឯកជន ដែលកំពុងគ្រប់គ្រងនៅទីនោះ។
តាមលោក សាយ សំអាល់ ក្រសួងគ្រោងនឹងរៀបចំស្ថាបនាផ្លូវមួយខ្សែទៀត ដើម្បីបញ្ចៀស ចរាចរណ៍ឡើងចុះលើភ្នំគូលែន។ ផ្លូវមួយខ្សែនោះ មានទីតាំងចាប់ពីព្រះអង្គធំ ចុះទៅស្រុក ស្វាយលើ។ កន្លងមក ចរាចរណ៍ឡើងចុះនៅភ្នំគូលែនមានតែមួយខ្សែ និងកំណត់ពេលឡើង ចុះផ្សេងគ្នាផងដែរ។ លោក សាយ សំអាល់ ក៏បានបញ្ជាក់ពីការផ្តាស់ប្តូរការតាំងទីរបស់ ប្រជាពលរដ្ឋ ដែលកំពុងរស់នៅលើភ្នំគូលែននេះផងដែរ ដោយក្រសួង និងគណៈកម្មការ ដោះស្រាយ នឹងរៀបចំកន្លែងថ្មីមួយនៅជើងភ្នំ ដើម្បីឲ្យពួកគេងាយស្រួលក្នុងការប្រកបរបររក ស៊ីនៅលើភ្នំ។
ទោះជាការអភិវឌ្ឍភ្នំគូលែនមានភាពយឺតយ៉ាវបន្តិចក្តី ប៉ុន្តែរដ្ឋមន្ត្រីក្រសួងបរិស្ថាន បានស្នើសុំ ឲ្យភាគីពាក់ព័ន្ធទាំងអស់ បន្តជួយការងារអភិរក្សភ្នំគូលែន ដែលមានបុរាណដ្ឋានប្រមាណ ៥៦កន្លែង ព្រៃឈើ ជាពិសេសជាប្រភពទឹកដ៏សំខាន់ក្នុងខេត្តសៀមរាប។
គួររម្លឹកថា បញ្ហាភ្នំគូលែន ត្រូវបានយកមកជជែកជាច្រើនចំណុច ក្នុងកិច្ចប្រជុំបច្ចេកទេស អាយស៊ីស៊ី-អង្គរ លើកទី២៨នេះ។ បញ្ហាទាំងនោះ មានទាំងបុរាណដ្ឋាន ព្រៃឈើ ការរីករាលដាលនៃសំណង់ ដែលសង់កៀកបុរាណដ្ឋាន ដែលការណ៍នេះអាចនឹងប៉ះពាល់ នាពេលអនាគត៕
© រក្សាសិទ្ធិដោយ thmeythmey.com