អន្តរជាតិ
លោក អាបេ ព្យាយាមពន្លឿនការកែប្រែរដ្ឋធម្មនុញ្ញសន្តិភាពពង្រឹងអំណាចយោធាជប៉ុន រូបភាព៖ AFP
× នាយករដ្ឋមន្ត្រីជប៉ុន ស៊ីនហ្សូ អាបេ (Shinzo Abe) ចង់ពន្លឿនការធ្វើវិសោធនកម្មមាត្រា ៩នៃរដ្ឋធម្មនុញ្ញសន្តិភាពដើម្បីអាចផ្លាស់ប្តូរកងម្លាំងស្វ័យការពារទៅជាកងកម្លាំងយោធាជាផ្លូវការ។ លោកគ្រោងនឹងដាក់សំណើកែរដ្ឋធម្មនុញ្ញនេះទៅកាន់សភានៅចុងឆ្នាំនេះ ហើយការផ្លាស់ប្តូរមាត្រានេះអាចសម្រេចត្រឹមឆ្នាំ ២០២០។
មហិច្ឆតារបស់នាយករដ្ឋមន្ត្រីជប៉ុនលោក ស៊ីនហ្សូ អាបេ ក្នុងការកែប្រែមាត្រា ៩នៃរដ្ឋធម្មនុញ្ញសន្តិភាពជប៉ុន មិនបាត់បង់ឡើយទោះជាមានការប្រឆាំងពីប្រជាជនជប៉ុន និងប្រទេសជិតខាងក្តី។ លោកសន្យាថា លោកនឹងដាក់សំណើសុំវិសោធនកម្មមាត្រានេះទៅកាន់សភានៅចុងឆ្នាំខាងមុខ។
យោងតាមទីភ្នាក់ងារព័ត៌មាន Reuters ពេលថ្លែងសុន្ទរកថានៅក្រុងកូបេ កាលពីថ្ងៃសៅរ៍លោក អាបេបានបញ្ជាក់ថាលោកមានបំណងដាក់សំណើសុំផ្លាស់ប្តូរមាត្រានៃរដ្ឋធម្មនុញ្ញក្រោយសង្គ្រាមលោកលើកទី២នេះនៅក្នុងអង្គប្រជុំវិសាមញ្ញរបស់សភាដែលនឹងត្រូវរៀបចំនៅចុងឆ្នាំនេះ។
ការព្យាយាមកែប្រែមាត្រា៩ នៃរដ្ឋធម្មនុញ្ញសន្តិភាពជប៉ុនរបស់រដ្ឋាភិបាលជប៉ុននេះ គឺដើម្បីត្រួសត្រាយផ្លូវសម្រាប់ការទទួលស្គាល់កងកម្លាំងស្វ័យការពារជាយោធាជាផ្លូវការដែលធ្វើសង្គ្រាមនៅក្រៅប្រទេសនិងការពារសម្ព័ន្ធមិត្តជាដើម។ ជប៉ុននឹងអាចក្លាយជាមហាអំណាចយោធាថ្មីមួយក្រោមការកែប្រែរដ្ឋធម្មនុញ្ញនេះ។ លោក អាបេ សង្ឃឹមថា ការកែប្រែរដ្ឋធម្មនុញ្ញនេះអាចសម្រេចបានជាផ្លូវការនៅត្រឹមឆ្នាំ ២០២០ខាងមុខនេះ។
យ៉ាងណាមិញ រដ្ឋាភិបាលក្រុងតូក្យូត្រូវរង់ចាំរហូតដលឆ្នាំក្រោយទម្រាំអាចសុំការអនុញ្ញាតលើសំណើរសុំកែរដ្ឋធម្មនុញ្ញពីសភាបាន ហើយបន្ទាប់មកលោកត្រូវស្វែងរកការគាំទ្រពីសភាទាំងពីរក្នុងសំឡេងពីរភាគបីហើយ និងភាគច្រើនច្រើនជាង៥០ភាគរយក្នុងប្រជាមតិនៅទូទាំងប្រទេសផង។
លោក អាបេ តែងតែចាត់ទុកថា ការវិសោធនកម្មរដ្ឋធម្មនុញ្ញនេះសំខាន់សម្រាប់សន្តិភាព និងស្ថិរភាពរបស់ជប៉ុនទាំងមូល ប៉ុន្តែចិននិងកូរ៉េខាងត្បូងមិនបានសប្បាយចិត្តឡើយចំពោះសកម្មភាពនេះ។ ប្រទេសទាំងពីរនឹកឃើញដល់អតីតកាលជូរចត់ដែលធ្លាប់ត្រូវទាហានជប៉ុនធ្វើទុក្ខបុកម្នេញនិងកាប់សម្លាប់នោះ។
ក្រៅពីកូរ៉េខាងត្បូងនិងចិន សូម្បីអ្នកនយោបាយ និងប្រជាជនជប៉ុនខ្លួនឯងក៏បានរិះគន់មហិច្ឆតាគ្រោះថ្នាក់ របស់លោក អាបេ ដែរ។ ពួកគេនៅតែយល់ថា រដ្ឋធម្មនុញ្ញដែលមានស្រាប់នេះវាល្អណាស់ ទៅហើយដែលជួយសាងសន្តិភាពដល់ជប៉ុនដល់សព្វថ្ងៃ។ សម្រាប់អ្នករិះគន់នយោបាយ លោក អាបេ បានរំលឹកថា ការកែមាត្រារដ្ឋធម្មនុញ្ញសន្តិភាព មិនមែនមានតែរឿងយោធា មួយមុខឡើយ វាក៏នឹងធ្វើឲ្យប៉ះពាល់ដល់គោលការណ៍គោរពសិទ្ធិមនុស្ស និងប្រជាធិបតេយ្យដែរ។ ដូច្នេះការឈានទៅកែមាត្រារដ្ឋធម្មនុញ្ញមិនមែនជាសញ្ញាល្អ ដែលគ្រប់គ្នាត្រូវ គាំទ្រនោះឡើយ។
សូមបញ្ជាក់ថា រដ្ឋធម្មនុញ្ញជប៉ុនត្រូវបានសរសេរឡើងនៅក្នុងឆ្នាំ ១៩៤៦ ដោយស្ថិតក្រោម គោលការណ៍សន្តិភាពស្នើឡើងដោយឧត្តមសេនីយ៍ Douglas MacArthur មេបញ្ជាការ កំពូលក្រុមសម្ព័ន្ធមិត្តប្រចាំជប៉ុន។ រដ្ឋធម្មនុញ្ញកំណត់ហាមឃាត់សិទ្ធិបង្កសង្គ្រាម និងរក្សា កម្លាំងយោធា ព្រមទាំងតម្រូវឲ្យជប៉ុនអនុវត្តគោលនយោបាយប្រជាធិបតេយ្យ និងសិទ្ធិមនុស្ស៕
Tag:
ស៊ីនហ្សូ អាបេ
ជប៉ុន
រដ្ឋធម្មនុញ្ញសន្តិភាព
© រក្សាសិទ្ធិដោយ thmeythmey.com