៦ខែដើមឆ្នាំ២០១៧ចំណូលពីការលក់សំបុត្រចូលទស្សនារមណីយដ្ឋានអង្គរមានជាង៥២លានដុល្លារ

ជាតិ

សង្គមជាតិ

៦ខែដើមឆ្នាំ២០១៧ចំណូលពីការលក់សំបុត្រចូលទស្សនារមណីយដ្ឋានអង្គរមានជាង៥២លានដុល្លារ

03, Jul 2017 , 1:27 pm

រូបភាព

ដោយ: អុីសា រ៉ហានី (Isa Rohany)

សៀមរាប៖ រយៈពេល៦ខែដើមឆ្នាំ២០១៧ ចំណូលពីការលក់សំបុត្រចូលទស្សនារមណីយដ្ឋានអង្គរ មានចំនួន ៥២,១៦៧,៩៧២ដុល្លារ ដែលកើនឡើងចំនួន ៦៦.៨២% បើធៀបនឹងឆ្នាំចាស់។ នេះបើតាមការកត់ត្រារបស់គ្រឹះស្ថានអង្គរ ។

គ្រឹះស្ថានអង្គរ ដែលជាស្ថាប័នរដ្ឋទទួលបន្ទុកគ្រប់គ្រងការលក់សំបុត្រចូលទស្សនារមណីយដ្ឋានអង្គរ បានបង្ហាញតាមរយៈសេចក្តីប្រកាសព័ត៌មានខ្លួនថា ក្នុងរយៈពេល៦ខែ ភ្ញៀវទេសចរបរទេសដែលបានទិញសំបុត្រទាំងអស់ មានចំនួន ១,២៣៣,១៣៧នាក់។ ចំនួននេះ កើនឡើង ១២.៩២% ធៀបនឹងឆ្នាំ២០១៦។

តាមរបាយការណ៍របស់គ្រឹះស្ថានអង្គរ នៅក្នុងខែមិថុនា ឆ្នាំ២០១៧ ការលក់សំបុត្រមានចំនួន ១៤០,៧៦០នាក់ គិតជាទឹកប្រាក់ស្មើនឹង ៦,២៥៤,៣៧០ដុល្លារ កើនឡើងចំនួន ៨៩.៦៥%។ យ៉ាងណា ចំនួននេះបានដកឲ្យមន្ទីរពេទ្យគន្ធបុប្ផាចំនួន ២៨១,៥២០ដុល្លារ។

គួររម្លឹកថា ក្នុងសេចក្តីសម្រេចនៃការចាប់ផ្តើមអនុវត្តន៍ការលក់សំបុត្រថ្មីចាប់ពីដើមខែកុម្ភៈ ឆ្នាំ២០១៧មក តម្លៃសំបុត្រមួយថ្ងៃ សម្រាប់ភ្ញៀវទេសចរបរទេស ឡើងពី២០ ទៅ៣៧ដុល្លារ ។ សំបុត្ររយៈពេល៣ថ្ងៃ ឡើងពី៤០ទៅ៦២ដុល្លារ និងសំបុត្ររយៈពេលមួយសប្តាហ៍ ឡើងពី៦០ ទៅ៧២ដុល្លារ។ ក្នុងសេចក្តីជូនដំណឹងរបស់គ្រឹះស្ថានអង្គរ ដែលបានចេញផ្សាយនៅថ្ងៃទី៥ សីហាឆ្នាំ២០១៦កន្លងទៅ ក៏បានបញ្ជាក់ដែរថា តម្លៃទាំងអស់ នឹងត្រូវកាត់ចូលទៅក្នុងមូលនិធិមន្ទីរពេទ្យគន្ធបុប្ផាចំនួន២ដុល្លារ ហើយវានឹងត្រូវដាក់បញ្ជាក់នៅផ្នែកខាងក្រោយខ្នងសំបុត្រ ដើម្បីបញ្ជាក់ប្រាប់ភ្ញៀវទេសចរផងដែរ៕