ជាតិ
អ្នកវិភាគ៖ បញ្ញត្តិថ្មី ប៉ះពាល់ដល់សេដ្ឋកិច្ចកម្ពុជា មីយ៉ាន់ម៉ា ឡាវ តែថៃខ្លួនឯងរងគ្រោះធ្ងន់ជាងគេ រូបពលករពីកាសែតBangkok Post
× ភ្នំពេញ៖ រដ្ឋាភិបាលថៃ បានចេញបញ្ញត្តិថ្មី ដែលមានលក្ខណៈរឹតបន្ដឹងដោយការដាក់ពិន័យយ៉ាងធ្ងន់ធ្ងរទាំងពលករបរទេសខុសច្បាប់ និងម្ចាស់ក្រុមហ៊ុនថៃ ពេលប្រព្រឹត្តផ្ទុយពីខ្លឹមសារ។ អ្នកវិភាគកម្ពុជា យល់ឃើញថា ការរឹតបន្ដឹងរបស់ថៃនេះ នឹងបង្កផលប៉ះពាល់ដល់សេដ្ឋកិច្ចប្រទេសកម្ពុជា មីយ៉ាន់ម៉ា និងឡាវ ជាដើម ។ ប៉ុន្តែសេដ្ឋកិច្ចថៃ នឹងរងផលប៉ះពាល់ធ្ងន់ជាងគេ។
អ្នកឃ្លាំមើលការអភិវឌ្ឍសង្គម និងជាអ្នកវិភាគលោក មាស នី យល់ឃើញថា បញ្ញត្តិរឹតបន្តឹងច្បាប់អន្តោប្រវេសន៍របស់រដ្ឋាភិបាលថៃ គឺរឿងត្រឹមត្រូវ។ ប៉ុន្តែវាក៏មានផលអវិជ្ជមានសម្រាប់ប្រទេសថៃ និងប្រទេសដែលមានពលករធ្វើការនៅទីនោះផងដែរ។ ផលអវិជ្ជមានដែលលោក មាស នី មើលឃើញនោះ គឺបញ្ហាសេដ្ឋកិច្ច។
ថ្លែងប្រាប់សារព័ត៌មានថ្មីៗ អ្នកឃ្លាំមើលការអភិវឌ្ឍសង្គមរូបនេះ បានបញ្ជាក់ដូច្នេះថា៖«ខ្ញុំគិតថា វិធានការទទួលយកតែពលករស្របច្បាប់របស់រដ្ឋាភិបាលថៃនេះ វានឹងទទួលរងផលប៉ះពាល់ទាំងសងខាងព្រោះក្រុមហ៊ុន សហគ្រាស អាជីវកម្មរបស់ថៃនឹងខ្វះកម្លាំងពលកម្ម ដែលថៃត្រូវការជួលកម្លាំងពលករក្រៅប្រទេសដែលមានថ្លៃឈ្នួលទាប»។
លោកបន្តថា៖«ប្រទេសដែលមានពលករទៅធ្វើការនៅប្រទេសថៃខុសច្បាប់ត្រូវត្រៀមខ្លួនបង្កើនការងារឲ្យពលករដែលថៃបញ្ជូនទៅប្រទេសដើមវិញ។ ដូចជារដ្ឋាភិបាលកម្ពុជាត្រូវត្រៀមទទួលពលករខ្មែរខុសច្បាប់យ៉ាងតិច៥សែននាក់មកវិញ។ ហើយបើពួកគេមិនទៅធ្វើការនៅថៃវិញ រដ្ឋាភិបាលត្រូវបង្កើតការងារឲ្យពួកគេធ្វើ តែបើបង្កើនការងារមិនបានសម្រាប់ពលករទាំងនោះទេ នោះពួកគេនឹងបាត់បង់ចំណូល ហើយនឹងទាញសេដ្ឋកិច្ចធ្លាក់ចុះផងដែរ»។
ភ្លាមៗក្រោយចេញក្រឹត្យរឹតបន្តឹងច្បាប់អន្តោប្រវេសនោះ អាជ្ញាធរថៃ ក៏បានចាប់បញ្ជូនពលករខ្មែរ មីយ៉ាន់ម៉ា ឡាវ និងវៀតណាម ជាដើម ដែលធ្វើការខុសច្បាប់នៅប្រទេសថៃ បញ្ជូនទៅប្រទេសរៀងៗខ្លួនវិញ ដើម្បីឲ្យពួកគេត្រឡប់មកបំពេញឯកសារការងារឲ្យបានត្រឹមត្រូវសិន មុននឹងត្រឡប់ទៅធ្វើការនៅទឹកដីថៃវិញ។
សម្រាប់លោក ចាន់ សុផល អ្នកជំនាញសេដ្ឋកិច្ចវិញ យល់ឃើញថា ក្នុងអំឡុងពេលដែលពលករខ្មែរ ត្រូវមកបំពេញឯកសារឲ្យស្របតាមច្បាប់ការងារនៅក្នុងទឹកដីថៃវិញនោះ ពលករម្នាក់នឹងត្រូវខាតបង់ប្រាក់ចំណូលយ៉ាងតិចពី២៥០ដុល្លារ ទៅ៣០០ដុល្លារក្នុងមួយខែ ហើយវាក៏ជាបញ្ហាដែលធ្វើឲ្យពួកគេគ្មានប្រាក់សងត្រឡប់ទៅខាងធនាគារ និងគ្រឹះស្ថានហិរញ្ញវត្ថុជាដើម។
លោក ចាន់ សុផល បានបញ្ជាក់ដូច្នេះថា៖«ខ្ញុំឃើញថាខាងថៃចាប់បញ្ជូនពលករខ្មែរមកវិញនេះ វាមិនសូវមានលក្ខណៈជាគំហុកអ្វីនោះទេ ព្រោះគេគ្រាន់តែចង់ឲ្យពលករធ្វើឯកសារឲ្យបានត្រឹមត្រូវប៉ុណ្ណោះ។ ប៉ុន្តែបើសិនក្នុងករណីដែលពលករខ្មែរមកវិញហើយពិបាកធ្វើឯកសារ ឬមិនព្រមធ្វើឯកសារទៅធ្វើការវិញ ហើយនៅទំនេរនោះ ពួកគេនឹងបាត់ចំណូលក្នុងមួយនាក់ក៏១លានរៀលដែរ ព្រោះពេលដែលពួកគេធ្វើការនៅថៃ អាចរកចំណូលបាន១០ដុល្លារក្នុងមួយថ្ងៃសម្រាប់ពលករម្នាក់។ ហើយបើពិបាកធ្វើឯកសារនិងពិបាករកចំណូលមែន នោះពួកគេនឹងអត់មានលុយសងបំណុលឥណទានដែលខ្ចីពីធនាគារឡើយ»។
ពលករខ្មែរខុសច្បាប់ដែលកំពុងធ្វើការនៅប្រទេសថៃ មានចំនួនរាប់សែននាក់។ ពលករខុសច្បាប់ទាំងនេះ ភាគច្រើនលួចឆ្លងដែនតាមច្រករបៀង ទៅតាមរយៈមេខ្យល់កម្ពុជា-ថៃ និងសាច់ញាតិពួកគេដែលកំពុងធ្វើការនៅទីនោះ។ ចំណែកពលករខ្លះទៀត ដែលទៅធ្វើការនៅទឹកដីថៃ តាមរយៈក្រុមហ៊ុន ក៏នៅតែមានលួចធ្វើការខុសច្បាប់ផងដែរ ក្រោយពីឯកសារការងារពួកគេត្រូវបានផុតកាលបរិច្ឆេទ (មិនបន្តសុពលភាពការងារ)។
ត្រង់ចំណុចនេះលោក ចាន់ សុផល បានពន្យល់ដូច្នេះថា « បើតាមខ្ញុំសិក្សាស្រាវជ្រាវឃើញថា មូលហេតុដែលពលករខ្មែរភាគច្រើនសុខចិត្តប្រឈមនឹងហានិភ័យទៅធ្វើការខុសច្បាប់នៅថៃនោះ ដោយសារតែក្រុមហ៊ុនដែលនាំពលករទៅធ្វើការនៅថៃរៀបចំឯកសារច្បាប់មាននីតិវិធីយូពេក ដោយប្រើពេល៣ខែ ហើយតម្រូវឲ្យពលករចំណាយប្រាក់ពី៦០០ ទៅ៧០០ដុល្លារ»។
លោកបន្តថា៖«ចំណែករដ្ឋាភិបាលដែលរៀបចំឯកសារសម្រាប់ពលករធ្វើការនៅថៃ ដោយតម្រូវឲ្យពួកគេចំណាយតែ២០ដុល្លារទេ។ ប៉ុន្តែមិនព្រមកំណត់ពេលវេលាឲ្យច្បាស់លាស់ ថាប្រើពេល១ខែឬ២ខែទើបបានទេ ជួនកាលទុកចោលយូទៀត។ ហើយពេលបានឯកសារគ្រប់នៅរង់ចាំទាក់ទងភាគីថៃសិន ទើបរកការងារឲ្យពលករខ្មែរធ្វើ។ ដូច្នេះហើយទើបវាជាមូលហេតុដែលធ្វើឲ្យពួកគេភាគច្រើនលួចទៅធ្វើការនៅថៃតាមរយៈមេខ្យល់ ព្រោះវាងាយស្រួលរកការងារធ្វើបានលឿនជាងការធ្វើតាមនីតិវិធីច្បាប់ សម្រាប់តម្រូវការជីវភាពពួកគេ»។
ទាំងលោក មាស នី និងលោក ចាន់ សុផល ក៏ស្នើឲ្យពលករខ្មែរខុសច្បាប់ទាំងអស់ មកបំពេញឯកសារឲ្យបានត្រឹមត្រូវវិញ ដើម្បីបញ្ចៀសការប្រឈមហានិភ័យនឹងបញ្ញត្តិថ្មី ដែលថៃបានកំណត់ដាក់ទោសទណ្ឌធ្ងន់ធ្ងរលើនិយោជកថៃ និងពលករបរទេសនេះ។
ក្រឹត្យស្ដីពីច្បាប់គ្រប់គ្រងពលករបរទេសដ៏តឹងរ៉ឺង ដែលចូលជាធរមានកាលពីថ្ងៃទី២៣ មិថុនា មានគោលដៅត្រួតពិនិត្យចំនួនពលករចំណាកស្រុកនៅប្រទេសថៃ ក៏ដូចជាពលករបរទេសដែលកំពុងធ្វើការខុសច្បាប់នៅថៃដែរ។ បញ្ញត្តិថ្មីនេះចែងថាជនជាតិថៃដែលជួលពលករបរទេសខុសច្បាប់ ត្រូវរងពិន័យជាប្រាក់ដល់ទៅជាង ២ម៉ឺន ៣ពាន់ដុល្លារសម្រាប់ពលករបរទេសម្នាក់ ចំណែកជនបរទេសធ្វើការដោយគ្មានច្បាប់អនុញ្ញាតអាចរងពិន័យដល់ទៅជិត៣ពាន់ដុល្លារ និងត្រូវជាប់ពន្ធនាគារដល់ទៅ៥ឆ្នាំ។
ការចេញបញ្ញត្តិថ្មីរបស់រដ្ឋាភិបាលថៃនេះ គឺជាការពង្រឹងច្បាប់អន្តោប្រវេសន៍ និងច្បាប់ការងារនៅក្នុងប្រទេសថៃ។ ភាគីថៃទុករយៈពេល៤ខែ (១២០ថ្ងៃ) សម្រាប់ពលករខុសច្បាប់ ត្រឡប់ទៅប្រទេសពួកគេវិញសិន ដើម្បីរៀបចំឯកសារឲ្យបានត្រឹមត្រូវតាមច្បាប់ សឹមនឹងត្រឡប់ទៅធ្វើការនៅប្រទេសថៃវិញ។
ពាក់ព័ន្ធនឹងបញ្ហានេះស្ថានឯកអគ្គរាជទូតកម្ពុជាប្រចាំប្រទេសថៃ ស្នើឲ្យពលករខ្មែរទាំងអស់ រក្សាភាពស្ញៀមស្ងាត់ ដោយសារស្ថានឯកអគ្គរាជទូតកម្ពុជាប្រចាំប្រទេសថៃ និងក្រសួងការងារកម្ពុជា កំពុងពិភាក្សាជាមួយអាជ្ញាធរថៃ។
បន្ថែមពីនេះបណ្ដាក្រុមហ៊ុន និងសហគ្រាសនៅថៃ បានប្រតិកម្មយ៉ាងខ្លាំងនឹងការអនុវត្តក្រឹត្យរបស់រដ្ឋាភិបាលស្ដីពីការគ្រប់គ្រងពលករបរទេស ដែលមានគោលដៅរឹតបន្តឹងការជួលពលករបរទេសឲ្យបំពេញការងារផ្សេងៗ ហើយពួកគេព្រួយបារម្ភថាបញ្ហាកង្វះពលករនឹងកើតឡើងមិនខាន ដែលអាចប៉ះពាល់ដល់ចរន្តសេដ្ឋកិច្ចពួកគេផងដែរ៕
Tag:
ថៃ
មីយ៉ាន់ម៉ា
ឡាវ
កម្ពុជា
© រក្សាសិទ្ធិដោយ thmeythmey.com