ជាតិ
សមាជិកក្រុមប្រឹក្សាឃុំ-សង្កាត់ថ្មី ចាប់ផ្តើមចូលកាន់តំណែងជាបន្តបន្ទាប់ហើយ ការប្រកាសសមាសភាពថ្នាក់ដឹកនាំឃុំ-សង្កាត់ថ្មី តាមមូលដ្ឋាននានា។ រូបថត ហ្វេសប៊ុក
× ភ្នំពេញ៖ សមាជិកក្រុមប្រឹក្សាឃុំ-សង្កាត់ថ្មី ដែលទើបនឹងជាប់ឆ្នោតក្នុងអាណត្តិទី៤នេះ អាចប្រកាសសុពលភាពចូលកាន់តំណែងបាន ចាប់ពីថ្ងៃទី៣ ខែកក្កដា ឆ្នាំ២0១៧ តទៅ។ រហូតមកដល់ពេលនេះ សមាជិកក្រុមប្រឹក្សាឃុំ-សង្កាត់មួយចំនួន ដូចជាសង្កាត់និរោធ សង្កាត់ស្ទឹងមានជ័យ៣ និងសង្កាត់ចាក់អង្រែលើ ជាដើម ដែលស្ថិតក្នុងរាជធានីភ្នំពេញ បានប្រកាសសុពលភាពចូលកាន់តំណែងរួចហើយ។
បើផ្នែកលើប្រកាសរបស់ក្រសួងមហាផ្ទៃ ដែលចុះហត្ថលេខាដោយសម្តេច ស ខេង អភិបាលរាជធានី-ខេត្តនីមួយៗ មានសិទ្ធិអំណាច ក្នុងការបើកកិច្ចប្រជុំ ដើម្បីប្រកាសសុពលភាពនៃសមាជិកក្រុមប្រឹក្សាឃុំសង្កាត់ថ្មី នៅក្នុងរង្វង់ដែនដីរបស់ខ្លួន។ ប្រកាសរបស់ក្រសួងមហាផ្ទៃ បានឲ្យដឹងទៀតថា អភិបាលរាជធានី-ខេត្ត អាចចាត់តាំងតំណាង ដូចជា អភិបាលរងនៃគណៈអភិបាលរាជធានី-ខេត្ត អភិបាល ឬអភិបាលរងនៃគណៈអភិបាលក្រុង ស្រុក ខណ្ឌ ជាដើម ដើម្បីបើកកិច្ចប្រជុំលើកដំបូងរបស់ក្រុមប្រឹក្សាឃុំ-សង្កាត់ថ្មី។
គណបក្សនយោបាយ១២ បានចូលរួលប្រកួតប្រជែងក្នុងការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាអាណត្តិទី៤នេះ។ ប៉ុន្តែ មានតែគណបក្ស៧ប៉ុណ្ណោះ ដែលទទួលបានអាសនៈនៃសមាជិកក្រុមប្រឹក្សាឃុំ-សង្កាត់។ ក្នុងនោះគណបក្សជាជនកម្ពុជា បានទទួលសំឡេងឆ្នោតនិងអាសនៈនៃសមាជិក្រុមប្រឹក្សាឃុំ-សង្កាត់ច្រើនជាងគេ។
គណបក្សប្រជាជនកម្ពុជា ទទួលបានសំឡេងឆ្នោតចំនួន ៣.៥៤០.០៥៦ ហើយគណបក្សសង្គ្រោះជាតិ ទទួលបានសំឡេងឆ្នោតចំនួន ៣.០៥៦.៨២៤។ បើគិតជាអាសនៈ គណបក្សប្រជាជនកម្ពុជា ទទួលបានអាសនៈជាសមាជិកក្រុមប្រឹក្សាឃុំ-សង្កាត់ចំនួន៦៥០៣ (បានតំណែងជាមេឃុំ-ចៅសង្កាត់ចំនួន១១៥៦) ហើយគណបក្សសង្គ្រោះជាតិ ទទួលបានអាសនៈជាសមាជិកក្រុមប្រឹក្សាឃុំ-សង្កាត់ចំនួន៥០០៧ (បានតំណែងជាមេឃុំ-ចៅសង្កាត់ចំនួន៤៨៩)។
គណបក្ស៥ទៀត គឺគណបក្សហ្វ៊ុនស៊ិនប៉ិច បានអាសនៈជាសមាជិកក្រុមប្រឹក្សាឃុំ-សង្កាត់ចំនួន២៨ (មិនបានតំណែងជាមេឃុំ-ចៅសង្កាត់) គណបក្សខ្មែររួបរួមជាតិ បានអាសនៈជាសមាជិកក្រុមប្រឹក្សាឃុំ-សង្កាត់ចំនួន២៤ (បានតំណែងជាមេឃុំ១) គណបក្សប្រជាធិបតេយ្យមូលដ្ឋាន បានអាសនៈជាសមាជិកក្រុមប្រឹក្សាឃុំ-សង្កាត់ចំនួន៥ (មិនបានតំណែងជាមេឃុំ-ចៅសង្កាត់) គណបក្សសម្ព័ន្ធដើម្បីប្រជាធិបតេយ្យ បានអាសនៈជាសមាជិកក្រុមប្រឹក្សាឃុំ-សង្កាត់ចំនួន៤ (មិនបានតំណែងជាមេឃុំ-ចៅសង្កាត់) និងគណបក្សសំបុកឃ្មុំសង្គមប្រជាធិបតេយ្យ បានអាសនៈជាសមាជិកក្រុមប្រឹក្សាឃុំ-សង្កាត់ចំនួន១ (មិនបានតំណែងជាមេឃុំ-ចៅសង្កាត់)។
ចំណែកឯគណបក្ស៥ទៀត បានទទួលត្រឹមសំឡេងឆ្នោតប៉ុណ្ណោះ តែមិនបានទទួលអាសនៈជាសមាជិកក្រុមប្រឹក្សាឃុំ-សង្កាត់ ឡើយ។ គណបក្សទាំង៥នោះ គឺគណបក្សសញ្ជាតិកម្ពុជា គណបក្សយុវជនកម្ពុជា គណបក្សជនជាតិដើមប្រជាធិបតេយ្យកម្ពុជា គណបក្សអំណាចខ្មែរ និងគណបក្សសាធារណរដ្ឋប្រជាធិបតេយ្យ៕
Tag:
បោះឆ្នោតឃុំ-សង្កាត់
ចូលកាន់តំណែង
© រក្សាសិទ្ធិដោយ thmeythmey.com