តុលាការច្រានចោលបណ្ដឹងសារទុក្ខរបស់លោក គឹម សុខ

ជាតិ

តុលាការច្រានចោលបណ្ដឹងសារទុក្ខរបស់លោក គឹម សុខ

05, Jul 2017 , 10:18 am

រូបភាព

លោក គី តិច មេធាវីរបស់សម្តេច ហ៊ុន សែន កំពុងផ្តល់បទសម្ភាសដល់ក្រុមអ្នកសារព័ត៌មាន ក្រោយពីបានស្តាប់ការប្រកាសសាលដីការបស់តុលាការកំពូល នៅព្រឹកថ្ងៃទី៥ ខែកក្កដា ឆ្នាំ២0១៧។

ដោយ: ម៉ៅ សុផា

ភ្នំពេញ៖ នៅព្រឹកថ្ងៃទី៥ កក្កដានេះ តុលាការកំពូល បានសម្រេចច្រានចោលបណ្ដឹងសារទុក្ខចំនួន២ ផ្សេងគ្នា របស់លោក គឹម សុខ អ្នកវិភាគនយោបាយ ដែលមានរឿងក្តីក្ដាំជាមួយសម្ដេចនាយករដ្ឋមន្ត្រី ហ៊ុន សែន។ នេះបើតាមលោក គី តិច មេធាវីការពារក្តីសម្ដេច ហ៊ុន សែន ដែលបានថ្លែងប្រាប់អ្នកសារព័ត៌មានក្រោយបញ្ចប់សវនាការ។

សាលដីកាទាំងពីរ ដែលតុលាការច្រានចោលនោះ គឺទី១ ការសុំឲ្យលោក គឹម សុខ រស់នៅក្រៅពន្ធនាគារបណ្តោះអាសន្ន និងរឿងទី២ ការសុំឲ្យកោះហៅដើមបណ្តឹង (សម្តេច ហ៊ុន សែន) ចូលតទល់ជាមួយចុងចោទ (លោក គឹម សុខ) នៅក្នុងតុលាការ។

នៅក្នុងបន្ទប់សវនាការព្រឹកនេះ គេសង្កេតឃើញថា មិនមានវត្តមានមេធាវីការពារក្តីឲ្យលោក គឹម សុខ នោះទេ គឺមានតែមេធាវីការពារក្តីសម្ដេច ហ៊ុន សែន ប៉ុណ្ណោះ។

មេធាវីសម្តេច ហ៊ុន សែន បានដាក់ពាក្យប្តឹងលោក គឹម សុខ អ្នកវិភាគនយោបាយ ពីបទ «បរិហារកេរ្តិ៍ជាសាធារណៈ» និងបទ «ញុះញង់ឲ្យប្រព្រឹត្តបទឧក្រិដ្ឋជាអាទិ៍» កាលពីខែកុម្ភៈ ឆ្នាំ២០១៧ ។ មូលហេតុដែលលោក គី តិច មេធាវីរបស់សម្តេច ហ៊ុន សែន ប្តឹងនោះ ដោយសារតែលោក គឹម សុខ បាននិយាយថា គណបក្សប្រជាជនកម្ពុជា នៅពីក្រោយខ្នងអំពើឃាតកម្ម លោក កែម ឡី អ្នកវិភាគនយោបាយ និងជាអ្នកស្រាវជ្រាវការអភិវឌ្ឍសង្គម កាលពីខែកក្កដា ឆ្នាំ២០១៦ ។

លោក គឹម សុខ នៅរងបណ្តឹងរបស់សម្តេច ហ៊ុន សែន មួយផ្សេងទៀត។ អង្គហេតុ ដែលនាំឲ្យលោក គឹម សុខ រងបណ្តឹងជាលើកទី២ គឺដោយសារតែលោក និយាយថា ប្រព័ន្ធមួយ ដែលស្ថិតនៅក្រោមរដ្ឋាភិបាលបច្ចុប្បន្ន មានការសម្លាប់មនុស្ស ហើយរកមុខឃាតកមិនឃើញ។ រហូតមកដល់ពេលនេះ លោក គឹម សុខ បានជាប់ឃុំក្នុងពន្ធនាគារព្រៃស អស់រយៈពេលជិតកន្លះឆ្នាំហើយ៕