មេឃុំឆែប២ស្លាប់ដោយគ្រោះថ្នាក់ចរាចរណ៍ ក្រោយកាន់តំណែងបាន៣ថ្ងៃ

ជាតិ

នយោបាយជាតិ

មេឃុំឆែប២ស្លាប់ដោយគ្រោះថ្នាក់ចរាចរណ៍ ក្រោយកាន់តំណែងបាន៣ថ្ងៃ

05, Jul 2017 , 6:17 pm

រូបភាព

រូបលោក ងួន កន (ខាងឆ្វេង) ប្រកាសចូលកាន់តំណែងមេឃុំឆែប២ ស្រុកឆែប ខេត្តព្រះវិហារ កាលពីថ្ងៃទី២ កក្ដដា

ដោយ: សារព័ត៌មានថ្មីៗ

ភ្នំពេញ៖ មេឃុំឆែប២ ស្រុកឆែប ខេត្តព្រះវិហារ កូតាគណបក្សប្រជាជនកម្ពុជា លោក ងួន កន អាយុ៦៦ឆ្នាំ ដែលទើបឡើងកាន់តំណែងជាផ្លូវការ បានមរណភាពនៅព្រឹកថ្ងៃទី៥ កក្កដានេះ ដោយសារករណីគ្រោះថ្នាក់ចរាចរណ៍។

លោក ងួន កន មេឃុំឆែប២ បានជួបគ្រោះថ្នាក់ចរាចរណ៍រវាងម៉ូតូនិងម៉ូតូ ក្នុងអំឡុងពេលរូបគាត់ បានបើកបរនៅក្នុងខេត្តស្ទឹងត្រែង ។ ហើយលោកបានបាត់បង់ជីវិត ខណៈដែលរថយន្តសង្គ្រោះបន្ទាន់បញ្ជូនគាត់ទៅមន្ទីពេទ្យ។ នេះបើតាមការចុះផ្សាយរបស់សារព័ត៌មានFresh News ដែលបានស្រង់សម្តីលោក អ៊ុន ចាន់ដា អភិបាលខេត្តព្រះវិហារ ។

លោក ងួន កន ទើបប្រកាសឲ្យចូលកាន់តំណែងនៅឃុំឆែប២ ស្រុកឆែប ខេត្តព្រះវិហារ កាលពីថ្ងៃទី២ ខែកក្កដា ឆ្នាំ២០១៧នេះ ក្រោយពីគណបក្សប្រជាជនកម្ពុជា ទទួលបានជ័យជម្នះលើការបោះឆ្នោតឃុំ-សង្កាត់ កាលពីថ្ងៃទី៤មិថុនា។

គួរបញ្ជាក់ថា កៅអីឃុំឆែប២ ស្រុកឆែប ខេត្តព្រះវិហារនេះ មានចំនួន៥អសនៈ ដែលក្នុងនោះគណបក្សប្រជាជនកម្ពុជា ទទួលបានតំណែងមេឃុំ ជំទប់ទី១ និងសមាជិក។ រីឯគណបក្សសង្គ្រោះជាតិ ទទួលបានពីរអសនៈ គឺជំទប់ទី២ និងសមាជិក។

បើតាមលក្ខន្តិកនៃច្បាប់បោះឆ្នោតជ្រើសរើសក្រុមប្រឹក្សាឃុំ-សង្កាត់នោះ លោក ហ៊ិម យ៉ាន ដែលជាជំទប់ទី១ មកពីកូតាគណបក្សប្រជាជនកម្ពុជា នឹងត្រូវកាន់តំណែងមេឃុំជំនួសលោក ងួន កន ដែលទទួលមរណៈភាពនេះ ។ ចំណែកលោក ទូច សារ៉ន កូតាគណបក្សប្រជាជននឹងត្រូវកាន់តំណែងទំនប់ទី១ ហើយលោក ជៀន ជិន ដែលឈរជាបេក្ខជនលេខរៀងទី៤ របស់គណបក្សប្រជាជន នឹងក្លាយជាសមាជិកឃុំឆែប២នេះ ជំនួសលោក ទូច សារ៉ន វិញ។

ចំណែកសមាភាពគណបក្សសង្គ្រោះជាតិពីររូប ដែលទទួលបានកៅអីជំទប់ទី២ និងសមាជិក នៅរក្សាដដែល៕