ជាតិ
ពុទ្ធបដិមាប្រក់នាគដែលពលរដ្ឋប្រទះឃើញត្រូវបានយកមករក្សាទុកនៅសារមន្ទីរព្រះនរោត្តម សីហនុ-អង្គរ
× សៀមរាប៖ ពុទ្ធបដិមាប្រក់នាគមួយអង្គ ដែលពលរដ្ឋនៅស្រុកស្វាយលើប្រទះឃើញ ត្រូវបាននាំមករក្សាទុកនៅក្នុងសារមន្ទីរព្រះនរោត្តម សីហនុ-អង្គរ។ កសិករមួយរូប រស់នៅភូមិកន្ទួត ឃុំកន្ទួត ស្រុកស្វាយលើ បានប្រទះឃើញរូបបដិមាមួយអង្គនេះ ក្នុងដីចម្ការរបស់ខ្លួន និងបានប្រគល់ឲ្យស្ថាប័នជំនាញ ដើម្បីរក្សាទុកនៅកន្លែងមានសុវត្ថិភាព។
លោក ឈាន រដ្ឋា ប្រធានស្តីទីនាយកដ្ឋានអភិរក្សក្រៅឧទ្យានអង្គរ នៃអាជ្ញាធរជាតិអប្សរា បានឲ្យដឹងថា លោកទទួលបានដំណឹងអំពីពុទ្ធបដិមានេះ នៅល្ងាចថ្ងៃទី៣ កក្កដា ហើយព្រលប់ថ្ងៃទី៤ រូបបដិមាព្រះប្រក់នាគនេះ បាននាំយកមករក្សាទុកក្នុងសារមន្ទីរ។ លោកបន្ថែមថា ពលរដ្ឋដែលប្រគល់រូបបដិមាដល់អាជ្ញាធរនេះ មានឈ្មោះអ្នកស្រី ព្រឹម រ៉ន រស់នៅភូមិកន្ទួត ឃុំកន្ទួត ស្រុកស្វាយលើ ដែលប្តីអ្នកស្រី បានប្រទះឃើញខណៈពេលកំពុងកាប់ឆ្ការក្នុងដីចម្ការខ្លួន។
រូបបដិមាព្រះប្រក់នាគនេះ មានកម្ពស់ ៥៩សង់ទីម៉ែត្រ ទទឹង ១៨សង់ទីម៉ែត្រ បណ្ដោយ ៣០សង់ទីម៉ែត្រ ប្រក់នាគក្បាល៧ និងគង់លើនាគ៣ជាន់។ បដិមានេះ ប្រទះឃើញនៅទីតាំងខាងត្បូងឈៀងខាងកើត ប្រាសាទតានុប។ អ្នកជំនាញបញ្ជាក់ថា នឹងសិក្សាស្រាវជ្រាវបន្ថែមលើរូបបដិមានេះ ដើម្បីបញ្ជាក់ថារូបនេះ មានទាក់ទងនឹងប្រាសាទមួយណា ដែលជិតភ្នំគូលេន ព្រោះទីតាំងដែលប្រទះឃើញ មានប្រាសាទបុរាណច្រើនកន្លែង។
អ្នកបុរាណវិទូខាងអាជ្ញាធរជាតិអប្សរា បានប៉ាន់ស្មានជាបឋមថា រូបនេះស្ថិតក្នុងរចនាប័ទ្មបាយ័ន នៅចុងសតវត្សរ៍ទី ១២ និងដើមទី១៣ និងមានឈ្មោះថា ភេសជ្ជៈគុរុ ដែលប្រែថា«គ្រូថ្នាំ»។ ពុទ្ធបដិមានេះ មានទម្រង់នៅល្អ តែមានស្នាមឆ្នូតផ្នែកខាងក្រោយ ដោយសារការជីកប៉ះ។
កញ្ញា ឆោម គន្ធា នាយិកាសារមន្ទីរព្រះនរោត្តម សីហនុ អង្គរ បានឲ្យដឹងដែរថា នេះជារូបទី៣ហើយ ដែលសារមន្ទីរទទួលបានពីប្រជាពលរដ្ឋ ដើម្បីរក្សាទុក។ កញ្ញាបញ្ជាក់ថា រូបទីមួយ ទទួលបាននៅឆ្នាំ២០១៦ ទីពីរនៅដើមឆ្នាំ២០១៧ និងចុងក្រោយនេះ គឺរូបព្រះប្រក់នាគនេះ។ ជាមួយនឹងទម្រង់ និងរូបរាងដ៏ស្រស់ស្អាត និងអស្ចារ្យរបស់ពុទ្ធបដិមាថ្មីនេះ កញ្ញា ឆោម គន្ធា រំពឹងថា នឹងទាក់ទាញចំនួនភ្ញៀវទេសចរឲ្យមកទស្សនាក្នុងសារមន្ទីរ កាន់តែច្រើនឡើង ខណៈសារមន្ទីរគ្រោងបង្កើតកម្មវិធីថ្មីៗ ដើម្បីទាក់ទាញភ្ញៀវទេសចរបន្ថែម៕
Tag:
ពុទ្ធបដិមា
សារមន្ទីរព្រះនរោត្តមសីហនុ-អង្គរ
© រក្សាសិទ្ធិដោយ thmeythmey.com