ជាតិ
សេដ្ឋកិច្ច
ការយក«VAT ១០ភាគរយ»ពីអ្នកប្រើប្រាស់សេវាហិរញ្ញវត្ថុបន្ទាប់បន្សំ ត្រូវបានព្យួរការអនុវត្ត
×![]()
ភ្នំពេញ៖ អគ្គនាយកដ្ឋានពន្ធដារបានប្រកាសព្យួរការអនុវត្តជាបណ្ដោះអាសន្នចំពោះការយកអាករលើតម្លៃបន្ថែម (VAT) លើសេវាមូលដ្ឋានខាងហិរញ្ញវត្ថុ (សេវាហិរញ្ញវត្ថុបន្ទាប់បន្សំ)។ នេះបើតាមសេចក្ដីជូនដំណឹងរបស់អគ្គនាយកដ្ឋាន នៅថ្ងៃទី៦ខែកក្កដា។
កាលពីចុងខែឧសភាឆ្នាំនេះ ក្រសួងសេដ្ឋកិច្ច និងហិរញ្ញវត្ថុបានចេញប្រកាសមួយដែលឈានទៅដល់ការយក VAT ១០ភាគរយពីការប្រើប្រាស់សេវាហិរញ្ញវត្ថុបន្ទាប់បន្សំ។ បើតាមអ្នកនៅក្នុងវិស័យនេះ ការដាក់ VAT នេះ គឺមានរយៈពេលយូរឆ្នាំមកហើយ ប៉ុន្តែអនុវត្តតែទៅលើមុខទំនិញផ្សេងៗ ដោយមិនទាន់អនុវត្តចំពោះសេវាកម្មហិរញ្ញវត្ថុនោះទ ទើបក្រសួងចេញប្រកាសឲ្យចាប់ផ្ដើមអនុវត្តនៅខែឧសភា។
ប្រកាសរបស់ក្រសួងកាលពីខែឧសភាបានកំណត់សេវាមូលដ្ឋានខាងហិរញ្ញវត្ថុលើច្រើនចំណុច តែមានចំណុចមួយដែលកំណត់លើ«ប្រតិបត្តិការទទួលប្រាក់បញ្ញើ និងផ្ដល់ឥណទាន ប៉ុន្តែមិនរួមបញ្ចូលកម្រៃសេវាដែលទាក់ទិននឹងការផ្ដល់ឥណទាន»។
អ្នកក្នុងវិស័យធនាគារខ្លះប្រាប់ថា សេវាដែលជាប់កាតព្វកិច្ច VAT ១០ភាគរយនេះ សំដៅដល់កម្រៃសេវាផ្ទេរប្រាក់ កម្រៃសេវាវាយតម្លៃលើការទទួលកម្ចី ឬសេវាផ្នែកច្បាប់ សេវាថែទាំគណនេយ្យ រួមទាំងសេវាផ្សេងៗជាច្រើនទៀត។ ប៉ុន្តែអត្រាការប្រាក់ មិនត្រូវជាប់ VAT នេះទេ។ ហើយការបង់ VAT នេះ គឺតាមរយៈការកាត់ទុករបស់គ្រឹះស្ថានហិរញ្ញវត្ថុ ពីអ្នកប្រើប្រាស់សេវា រួចគ្រឹះស្ថានយកប្រាក់ទាំងនោះ បង់ជូនអគ្គនាយកដ្ឋានពន្ធដារ។ បានសេចក្ដីថា បើគ្រឹះស្ថានយកកម្រៃ ២ពាន់រៀលក្នុងការផ្ទេរប្រាក់ក្នុងមួយដង នោះគ្រឹះស្ថានត្រូវកាត់ប្រាក់ ២រយរៀលទៀតទុកបង់ជូនរដ្ឋ។
ទោះយ៉ាងណា តាមរយៈសេចក្ដីជូនដំណឹងខាងលើ អគ្គនាយកដ្ឋានពន្ធដារ ប្រកាសព្យួរការអនុវត្តជាបណ្ដោះអាសន្នចំពោះការយក VAT នេះ រហូតដល់មាការជូនដំណឹងជាថ្មី។ អគ្គនាយកដ្ឋានពន្ធដារ បញ្ជាក់ទៀតថា នឹងសហការជាមួយផ្នែកឯកជន ដើម្បីសិក្សាលម្អិតឡើងវិញ នូវនិយមន័យពាក្យ «សេវាមូលដ្ឋានខាងហិរញ្ញវត្ថុ» និងពិនិត្យការអនុវត្ត VAT លើសេវាមិនមែនជាមូលដ្ឋានខាងហិរញ្ញវត្ថុ។
គួរបញ្ជាក់ថា បន្ទាប់ពីក្រសួងសេដ្ឋកិច្ច និងហិរញ្ញវត្ថុ ចេញប្រកាសនៅខែឧសភា វិស័យឯកជនបានប្រតិកម្មនឹងប្រកាសនេះ ដោយចង់ស្វែងរកដំណោះស្រាយជុំវិញការដាក់ VAT លើសេវាហិញ្ញវត្ថុបន្ទាប់បន្សំនេះ។ កាលពីពេលថ្មីៗនេះ ថ្នាក់ដឹកនាំសមាគមមីក្រូហិរញ្ញវត្ថុ (CMA) បានថ្លែងក្នុងសនិសីទរបស់ខ្លួនថា សមាជិក CMA មិនទាន់អនុវត្តតាមប្រកាសនោះឡើយ ព្រោះថាវាបានដាក់បន្ទុកដល់អ្នកប្រើប្រាស់សេវាហិរញ្ញវត្ថុបន្ទាប់បន្សំ និងរង់ចាំជួបពិភាក្សាជាមួយអគ្គនាយកដ្ឋានពន្ធដារដើម្បីដោះស្រាយបញ្ហានេះ៕
Tag:
សេវាហិរញ្ញវត្ថុ
© រក្សាសិទ្ធិដោយ thmeythmey.com
