ជាតិ
លោក ហ៊ូ វ៉ាន់នី៖ ទោះកាន់តំណែងជាស្នងការខេត្តសៀមរាបបាន ២ ខែ ហើយប្តូរវិញ ក៏មោទកភាព
លោក ហ៊ូ វ៉ាន់នី នៅខាងស្តាំលោក នេត សាវឿន ក្នុងពិធីចុះកាន់តំណែងកាលពីថ្ងៃទី ២៧ ខែមេសា ឆ្នាំ ២០១៧
×![]()
រដ្ឋមន្ត្រីក្រសួងមហាផ្ទៃសម្តេច ស ខេង បានសម្រេចផ្ទេរមុខតំណែងស្នងការនគរបាលខេត្តសៀមរាបលោក ហ៊ូ វ៉ាន់នី ដែលទើបកាន់តំណែងបាន ២ ខែ ឲ្យទៅកាន់តួនាទីផ្សេងវិញ។ យ៉ាងណា ទោះកាន់តំណែងជាស្នងការបានត្រឹមតែ ២ ខែក្តី ក៏លោក វ៉ាន់នី មានមោទកភាព យ៉ាងខ្លាំងចំពោះការបំពេញការងាររបស់ខ្លួនកន្លងមក ដើម្បីបម្រើប្រជាជនខេត្តសៀមរាប។
លោក ហ៊ូ វ៉ាន់នី បានប្រាប់សារព័ត៌មានថ្មីៗថា សម្តេច ស ខេង រដ្ឋមន្ត្រីក្រសួងមហាផ្ទៃ បានចេញសេចក្តីប្រកាសផ្ទេរមុខតំណែងរបស់លោកពីស្នងការនគរបាលខេត្តសៀមរាប ទៅកាន់តួនាទីជាអនុប្រធាននាយកដ្ឋានទេសចរណ៍នៃក្រសួងមហាផ្ទៃវិញ។ ចំណែកអ្នកដែលមកជំនួសតំណែងលោក គឺលោក ទិត្យ ណារ៉ុង ដែលបច្ចុប្បន្នជាអធិការនគរបាលក្រុងសៀមរាម។
បើទោះបីជាទើបតែកាន់តំណែងជាស្នងការនគរបាលខេត្តសៀមរាប បានត្រឹមតែ ២ ខែ ហើយត្រូវផ្លាស់ប្តូរវិញក្តី ក៏លោក វ៉ាន់នី ពេញចិត្ត និងមានមោទកភាពចំពោះការងាររបស់ខ្លួននាពេលកន្លងមក។« ខ្ញុំមោទកភាព ចំពោះស្នាដៃរបស់ខ្ញុំកន្លងមក ដូចជាការការពារសន្តិសុខ ការបង្ក្រាបគ្រឿងញឿន និងក្មេងទំនើងជាដើម ដើម្បីបម្រើប្រជាជនខេត្តសៀមរាប»។ លោក បញ្ជាក់យ៉ាងនេះហើយ ក៏បន្តដូច្នេះថា៖« ខ្ញុំពេញចិត្តនឹងការផ្ទេរតំណែងនេះ ព្រោះយើងធ្វើការតែងតែមានការផ្លាស់ប្តូរជាធម្មតាទេ។ ខ្ញុំជឿជាក់ថា អ្នកកាន់តំណែងជំនួសខ្ញុំក្រោយ នឹងមានសមត្ថភាពខ្លាំងជាងរាប់រយដង និងខ្ញុំសូមជូនពរគាត់( ទិត្យ ណារ៉ុង) ជោគជ័យ»។
លោក ហ៊ូ វ៉ាន់នី ដែលបានកាន់តំណែងជាស្នងការខេត្តសៀមរាបនៅថ្ងៃទី ២៧ ខែមេសា ឆ្នាំ ២០១៧ ក៏ឲ្យដឹងដែរថា រូបលោក បានសរសេរលិខិតអញ្ជើញមន្ត្រី កម្លាំងនគរបាល ដែលពាក់ព័ន្ធ ដើម្បីចូលរួមពិធីផ្ទេរតំណែងលោករួចហើយ។ ពិធីនេះ នឹងធ្វើឡើងនៅថ្ងៃទី ១០ ខែកក្កដា ក្រោមវត្តមានលោក នេត សាវឿន អគ្គស្នងការនគរបាលជាតិ៕
Tag:
ហ៊ូ វ៉ាន់នី
ស្នងការ
ទិត្យ ណារ៉ុង
© រក្សាសិទ្ធិដោយ thmeythmey.com
