កិច្ចប្រជុំប្រទេស ២០ នៅ Hamburg អាល្លឺម៉ង់ បិទបញ្ចប់ទៅដោយចម្រូងចម្រាស ហើយគ្មានឡើយជំហររួមគ្នាជាធ្លុងមួយលើបញ្ហាចម្បងដូចជាពាណិជ្ជកម្មសេរី និងការប្រែប្រួលអាកាសធាតុ។ ប្រធានាធិបតីអាមេរិក ដូណាល់ ត្រាំ នៅតែរក្សាជំហររឹងត្អឹងលើការដកខ្លួនចេញពីកិច្ចព្រមព្រៀងអាកាសធាតុ និងការអនុវត្តវិធានការគាំពារនិយមពាណិជ្ជកម្មក្នុងបរិបទសាកលភាវូបនីយកម្មនេះស្របតាមគោលនយោបាយដម្កល់ប្រយោជន៍អាមេរិកជាធំដដែល។
កិច្ចប្រជុំប្រទេសសេដ្ឋកិច្ចរីកចម្រើនទាំង ២០ (G-20) នៅអាល្លឺម៉ង់ក្លាយជាអាប់អួរមួយដោយចលនាបាតុកម្មហិង្សាក្បែរកន្លែងប្រជុំ និងកម្តៅក្នុងបន្ទប់ប្រជុំពេលដែលមេដឹកនាំចរចាមិនសូវត្រូវរ៉ូវគ្នាលើបញ្ហាពិភពលោកជាច្រើនតាំងពីពាណិជ្ជកម្ម សន្តិសុខ និងបរិស្ថាននោះ។
រឿងដែលគួរឲ្យចាប់អារម្មណ៍និងបញ្ជាក់បានថា កិច្ចប្រជុំតានតឹងគឺ ប្រធានាធិបតី ដូណាល់ ត្រាំ ឲ្យកូនស្រីខ្លួន អ៊ីវ៉ាន់កា ត្រាំ (Ivanka Trump) ដែលជាទីប្រឹក្សាប្រធានាធិបតីជំនួសតំណែងលោកចូលចរចាជាមួយមេដឹកនាំពិភពលោកផ្សេងទៀតវិញ។ ហើយលោក ត្រាំ ចាកចេញពីអាល្លឺម៉ង់ដោយមិនព្រមចូលសន្និសីទកាសែតឲ្យគេសួរសំណួរពាក់ព័ន្ធលទ្ធផលនៃកិច្ចប្រជុំឡើយ។
រឿងដែលនៅតែចម្រូងចម្រាស ដែលធ្វើឲ្យមេដឹកនាំពិភពលោលផ្សេងទៀតដូចជាអាល្លឺម៉ង់ បារាំង និងកាណាដា ទើសទាល់ចិត្តខ្លាំងនោះគឺ គោលជំហរលោក ត្រាំ លើបញ្ហាប្រែប្រួលអាកាសធាតុ និងគោលការណ៍គាំពារនិយមដែលជាចំណុចស្នូលនៃគោលនយោបាយប្រធានាធិបតីអាមេរិកផងនោះ។
ជាប្រពៃណីក្រោយបញ្ចប់កិច្ចប្រជុំ មេដឹកនាំទាំង ២០ ត្រូវចេញសេចក្តីថ្លែងការណ៍ចុងក្រោយមួយដែលគ្រប់គ្នាបង្ហាញជំហរជាឯកច្ឆន្ទលើបញ្ហាជាច្រើនរួមទាំងសេដ្ឋកិច្ច ពាណិជ្ជកម្ម សន្តិសុខនិងបញ្ហាផ្សេងទៀតផងដែរ។ ប៉ុន្តែលើកនេះ ចំណុចនិងភាសាមួយចំនួនដែលត្រូវបានគេប្រើប្រាស់ក្នុងសេចក្តីថ្លែងការណ៍ឆ្លុះបញ្ចាំងកាន់តែច្បាស់ពីការទាស់ទែងខ្វែងគំនិតគ្នាក្នុងចំណោមប្រទេសឧស្សាហកម្មធុនធ្ងន់ និងសេដ្ឋកិច្ចរីកចម្រើនឈានមុខគេទាំង ២០នេះ។
យោងតាមទីភ្នាក់ងារព័ត៌មាន AFP សេចក្តីថ្លែងការណ៍នោះមានលើកឡើងពី ការទទួលស្គាល់ពីសេចក្តីសម្រេចចិត្តរបស់លោក ត្រាំ ក្នុងការចាកចេញពីកិច្ចព្រមព្រៀងអាកាសធាតុក្រុងប៉ារីសឆ្នាំ ២០១៥ និងកត់សម្គាល់ច្បាស់ថា អាមេរិកនៅតែបន្តប្រើប្រាស់និងលក់ប្រេងផូស៊ីលឥន្ធនៈដែលជាប្រភពចម្បងនៃការប្រែប្រួលអាកាសធាតុនោះ។
មិនត្រឹមតែប៉ុណ្ណោះទេក្នុងសេចក្តីថ្លែងការណ៍ដដែលនោះក៏បានកំណត់ជាលើកដំបូងនូវសិទ្ធក្នុងការប្រើប្រាស់«វិធានការស្របច្បាប់ផ្នែកពាណិជ្ជដើម្បីគាំពារទីផ្សារ»របស់ខ្លួន ដែលការប្រើប្រាស់ភាសាបែបនេះផ្តល់ទម្ងន់បន្ថែមឲ្យ គោលនយោបាយជាតិនិយមដែល«ដម្កល់ប្រយោជន៍អាមេរិកជាធំ»របស់លោក ត្រាំ ថែមទៀត។
គេដឹងច្បាស់ថា ជំហរនេះផ្ទុយទាំងស្រុងពីជំហរសម្ព័ន្ធមិត្តនិងដៃគូអាមេរិក ដែលកន្លងមកបានទិតៀននិងព្រមានអាមេរិកផងដែរពីគ្រោះថ្នាក់ពេលអាមេរិកនិន្នាការងាកទៅប្រើ គោលនយោបាយឯកោនិយម ឡើងវិញ និងចាប់ផ្តើមសង្គ្រាមពាណិជ្ជកម្មនោះ។
ក្រោយកិច្ចប្រជុំ លោកស្រី អែនជេឡា មឺហ្គែល (Angela Merkel) ដែលជាប្រធាននៃកិច្ចប្រជុំដែលនោះបានថ្លែងប្រាប់អ្នកសារព័ត៌មានក្នុងថា គ្មានឡើយការឯកភាពគ្នាជាឯកច្ឆន្ទក្នុងសេចក្តីថ្លែងការណ៍រួមគ្នានេះ។ «នៅពេលដែលគ្មានឯកច្ឆន្ទភាពក្នុងកិច្ចពិភាក្សា សេចក្តីថ្លែងការណ៍រួមវាតែងតែមានចំណុចមិនឯកភាពគ្នា»។ នេះជាការបញ្ជាក់របស់លោកស្រី មឺហ្គែល។