បទយកការណ៍ / បទសម្ភាសន៍
មេឃុំវ័យ៧៥ឆ្នាំ ប្តេជ្ញាបម្រើពលរដ្ឋឲ្យអស់លទ្ធភាព និងប្រាថ្នាតែកិត្តិយសក្រោយអស់ជីវិត
×![]()
ដោយ: ខន ចំប៉ា
ក្រគរ,ពោធិ៍សាត់៖ លោក ម៉ែន ភួន វ័យ៧៥ឆ្នាំ បានជាប់ឆ្នោតជាមេឃុំ៤អាណត្តិជាប់ៗគ្នានៅក្នុងឃុំបឹងកន្តួត ក្នុងស្រុកក្រគរ។ មានវ័យចំណាស់ពិតមែន តែមេឃុំពីគណបក្សប្រជាជនកម្ពុជារូបនេះ ប្តេជ្ញាបន្តបម្រើពលរដ្ឋឲ្យអស់លទ្ធភាព និងដោយស្អាតស្អំ។ មេឃុំវ័យ៧៥ឆ្នាំរូបនេះបន្តថា ខ្លួនមិនចង់បានប្រយោជន៍អ្វីពីពលរដ្ឋឡើយ លោកយកតែកិត្តិយសមួយប៉ុណ្ណោះ សម្រាប់ជីវិតនេះ។
លោក ម៉ែន ភួន វ័យ៧៥ឆ្នាំ ជាបេក្ខជនមេឃុំរបស់គណបក្សប្រជាជនកម្ពុជា សម្រាប់ឃុំបឹងកន្តួត ស្រុកក្រគរ ចាប់តាំងពីអាណត្តិទី១មកម្លេះ។ នៅអាណត្តិទី៤នេះ ប្រជាពលរដ្ឋនៅតែជឿជាក់ ទុកចិត្ត រើសមេឃុំចំណាស់រូបនេះ ឲ្យដឹកនាំឃុំបន្តទៀត។ នៅក្នុងបទសម្ភាសន៍ជាមួយសារព័ត៌មានថ្មីៗ លោក ម៉ែន ភួន បានលើកហេតុផលខ្លះៗដែលពលរដ្ឋនៅតែបោះឆ្នោតជូនលោក មកពីក្នុងរយៈពេលកន្លងមកលោកបានបម្រើពលរដ្ឋអស់ពីចិត្ត គិតប្រយោជន៍ពលរដ្ឋជាអាទិភាព និងបម្រើពលរដ្ឋដោយស្អាតស្អំ។
ដ្បិតមានវ័យចំណាស់ពិតមែន ប៉ុន្តែទឹកចិត្តស្រឡាញ់ការងារហាក់មិនទ្រុឌទ្រោមឡើយ លោកនៅតែប្តេជ្ញាចិត្តបម្រើប្រជាពលរដ្ឋនៅក្នុងឃុំបឹងកន្តួតឲ្យអស់លទ្ធភាព រក្សាអំពើល្អ ស្ម័គ្របម្រើពលរដ្ឋ និងប្រទេសជាតិដោយឥតលក្ខខណ្ឌ។ ក្នុងន័យនេះ លោកមេឃុំវ័យ៧៥រូបនេះ ប្រាថ្នាតែកិត្តិយសមួយគត់ ក្រោយអស់ជីវិត។ មេឃុំម៉ែន ភួន បញ្ជាក់ដូច្នេះ៖ «ជីវិតមនុស្ស ស្លាប់ទៅ អត់មានយករួច អីចឹងចុងក្រោយបំផុត គឺខ្ញុំយកតែកិត្តិយសមួយទេ សម្រាប់ជីវិតខ្ញុំ»។
ដើម្បីជ្រាបច្បាស់ សូមអញ្ជើញស្តាប់បទសម្ភាសន៍រវាង កញ្ញា ខន ចំប៉ា អ្នកកាសែតនៃសារព័ត៌មានថ្មីៗ និងលោក មេឃុំ ម៉ែន ភួន ដូចតទៅ៖
Tag:
មេឃុំ-ចៅសង្កាត់
ម៉ែន ភួន
© រក្សាសិទ្ធិដោយ thmeythmey.com
