បក្សមូលដ្ឋាន នឹងសាងរូបសំណាកបណ្ឌិត កែម ឡី នៅទីសាធារណៈ បើដឹកនាំរដ្ឋាភិបាល

ជាតិ

នយោបាយជាតិ

បក្សមូលដ្ឋាន នឹងសាងរូបសំណាកបណ្ឌិត កែម ឡី នៅទីសាធារណៈ បើដឹកនាំរដ្ឋាភិបាល

09, Jul 2017 , 9:59 pm

រូបភាព

ដោយ: ថ្មីៗ

គណបក្សប្រជាធិបតេយ្យមូលដ្ឋាន បានធ្វើពិធីបុណ្យរម្លឹកខួបមួយឆ្នាំនៃមរណភាពលោកបណ្ឌិត កែម ឡី នៅទីស្នាក់ការកណ្តាលបក្ស ស្ថិតនៅក្នុងខណ្ឌសែនសុខ រាជធានីភ្នំពេញ។ នៅក្នុងពិធីនេះ លោក យ៉េង វីរៈ បានថ្លែងថា ប្រសិនបើគណបក្សប្រជាធិបតេយ្យមូលដ្ឋាន ទទួលបានសំឡេងគាំទ្រដឹកនាំរដ្ឋាភិបាល នឹងធ្វើរូបសំណាកលោក កែម ឡី នៅសួនសាធារណៈណាមួយ។

នៅពេលគណបក្សប្រជាធិបតេយ្យមូលដ្ឋាន ទទួលបានការគាំទ្រពីប្រជាពលរដ្ឋដឹកនាំរដ្ឋាភិបាលនៅពេលក្រោយ គណបក្សនេះនឹងស្វែងទីតាំងសាធារណៈណាមួយសមស្រប ដើម្បីសាងសងរូបសំណាកលោក បណ្ឌិត កែម ឡី ទុកជាការរំឮកគុណសម្រាប់ឲ្យកូនខ្មែរជំនាន់ក្រោយចងចាំវីរភាពរបស់លោក។ នេះជាការសន្យារបស់លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន នៅក្នុងពិធីរម្លឹកខួបមួយឆ្នាំ នៃមរណភាពរបស់លោកបណ្ឌិត កែម ឡី ដែលគណបក្សនេះ រៀបចំធ្វើនៅស្នាក់ការកណ្តាលបក្សនៅខណ្ឌសែនសុខ នៅថ្ងៃទី ៩ ខែកក្កដា។ លោក យ៉េង វីរៈ ដែលធ្លាប់ជាសហការីជាមួយលោក កែម ឡី បានថ្លែងពីការចង់បានរបស់បណ្ឌិត កែម ឡី សម្រាប់ជាតិ និងប្រជាជន ដោយមិនគិតពីខ្លួនឯង។ លោកបន្ថែមយ៉ាងនេះថា៖«យើងបានដឹងទាំងអស់គ្នាថា លោកបណ្ឌិត កែម ឡី មិនមែនជាមនុស្សគិតអំពីខ្លួនជាធំនោះទេ។ លោកបណ្ឌិត កែម ឡី ចង់ឃើញយុត្តិធម៌សម្រាប់សង្គមខ្មែរ លោកចង់ឲ្យមានការផ្លាស់ប្តូរជាវិជ្ជមាន លោកចង់ឲ្យមានការរៀបចំអភិបាលកិច្ចល្អសម្រាប់ប្រទេសជាតិ។ ទាំងនេះជាក្តីស្រមៃដ៏ធំរបស់លោក ដែលយើងធ្លាប់បានជជែកជាមួយគ្នា»។

ជាមួយគ្នា លោក យ៉េង វីរៈ ក៏ប្តេជ្ញាបន្តដំណើរស្វែងរកយុត្តិធម៌ចំពោះលោកបណ្ឌិត កែម ឡី។ សម្រាប់លោក វីរៈ ទោះមានការកាត់ទោស ជួប សម្លាប់ដាក់ពន្ធនាគារមួយជីវិតក៏ដោយ ក៏លោកនៅមិនជឿថា លោកបណ្ឌិត កែម ឡី ត្រូវបានបាញ់សម្លាប់ដោយសារការជំពាក់លុយ ចំនួន៣០០០ដុល្លារនោះដែរ។«យើងជឿថា លោកបណ្ឌិត កែម ឡី ស្លាប់ដោយសារតែលោកបានបំពេញការងារ ក្នុងនាមជាអ្នករូតវាំងននសង្គម ក្នុងនាមជាអ្នកសកម្មក្នុងការវិភាគអំពីបញ្ហាសង្គម និងនយោបាយ។ យើងនៅបន្តទាមទារឲ្យស្ថាប័នមានសមត្ថកិច្ច ស្ថាប័នតុលាការ បន្តការស្រាវជ្រាវស្វែងរកការពិតទាក់ទងនឹងការធ្វើឃាតលោកបណ្ឌិត កែម ឡី»។

លោកបណ្ឌិតកែម ឡី ត្រូវបានខ្មាន់កាំភ្លើងបាញ់សម្លាប់កាលពីថ្ងៃទី ១០ ខែកក្កដា ឆ្នាំ២០១៦ នៅស្ថានីយ៍ប្រេងឥន្ធនៈកាល់តិច ក្បែរស្តុបបូកគោ រាជធានីភ្នំពេញ៕