ជាតិ
ច្បាប់មិនឲ្យអ្នកទោស និង បក្សនយោបាយ ធ្វើសកម្មភាពជាមួយគ្នា ត្រូវបានសភាអនុម័តជាផ្លូវការ
× ភ្នំពេញ៖ ខ្លឹមសារថ្មី ដែលបន្ថែមចូលទៅក្នុងច្បាប់ស្តីពី គណបក្សនយោបាយ ត្រូវបានតំណាងរាស្ត្រ៦៦រូប ពីគណបក្សប្រជាជនកម្ពុជា អនុម័តហើយ នៅក្នុងកិច្ចប្រជុំពេញអង្គនៃរដ្ឋសភា នាថ្ងៃទី១0 ខែកក្កដា ឆ្នាំ២0១៧នេះ។ កិច្ចប្រជុំ ដើម្បីអនុម័តខ្លឹមសារថ្មីនៃច្បាប់នេះ ពុំមានវត្តមានរបស់តំណាងរាស្ត្រពីគណបក្សសង្គ្រោះជាតិ នោះទេ។
ការបន្ថែមខ្លឹមសារថ្មី ចូលទៅក្នុងច្បាប់ស្តីពី គណបក្សនយោបាយ គឺដើម្បីរារាំងបុគ្គល ដែលត្រូវបានតុលាការ កាត់ទោសឲ្យមានឈ្មោះជាទណ្ឌិត មិនឲ្យចូលរួមធ្វើសកម្មភាពតាមរូបភាពណាមួយ ជាមួយគណបក្សនយោបាយ។ ការតាក់តែងនូវខ្លឹមសារនៃច្បាប់ខាងលើ គឺធ្វើឡើងតាមសំណើរបស់សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជាជនកម្ពុជា។
យោងតាមខ្លឹមសារថ្មី ដែលត្រូវបានដាក់បញ្ចូលទៅក្នុច្បាប់ស្តីពី គណបក្សនយោបាយ តុលាការ មានសិទ្ធិអំណាចយ៉ាងធំធេង រហូតដល់អាចរំលាយគណបក្សណាមួយ ប្រសិនបើផ្សារភ្ជាប់ឬមានទំនាក់ទំនងជាមួយទណ្ឌិត ក្នុងការធ្វើសកម្មភាព ដើម្បីផលប្រយោជន៍ផ្នែកនយោបាយ។ ខ្លឹមសារថ្មីទាំងនោះ បានសរសេរយ៉ាងដូច្នេះ៖«គ្រប់គណបក្សនយោបាយ មិនត្រូវប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិត ដែលជាប់ទោសពីបទឧក្រិដ្ឋឬបទមជ្ឈិម ដើម្បីជាប្រយោជន៍នយោបាយ សម្រាប់គណបក្សរបស់ខ្លួន។ គណបក្សនយោបាយ មិនត្រូវយល់ព្រមដោយចំហ ឬដោយតុណ្ហីភាព [ភាពស្ងៀមស្ងាត់] ឬឃុបឃិតជាមួយទណ្ឌិត ឲ្យធ្វើសកម្មភាពណាមួយ ដើម្បីប្រយោជន៍នយោបាយ សម្រាប់គណបក្សរបស់ខ្លួន។ បើគណបក្សណា បានប្រព្រឹត្តនូវទង្វើទាំងនេះ តុលាការ អាចរំលាយគណបក្សនោះ»។
ការអនុម័តលើខ្លឹមសារបន្ថែមនៃច្បាប់ស្តីពី គណបក្សនយោបាយ ទទួលបានការគាំទ្រពីគណបក្សប្រជាជនកម្ពុជា តែប៉ុណ្ណោះ។ តំណាងរាស្ត្រមួយចំនួន ពីគណបក្សប្រជាជនកម្ពុជា បានឡើងនិយាយពីគុណសម្បត្តិ នៃការធ្វើវិសោធនកម្មលើច្បាប់នេះ។ តំណាងរាស្ត្រទាំងនោះ សុទ្ធតែអះអាងថា ការធ្វើវិសោធនកម្មលើច្បាប់នេះ គឺដើម្បីប្រយោជន៍ប្រទេសជាតិ និង មានវិសាលភាពក្នុងការអនុវត្តលើគណបក្សទាំងអស់។
គណបក្សសង្គ្រោះជាតិ បានជំទាស់នឹងការអនុម័តលើខ្លឹមសារថ្មីនៃច្បាប់នេះ។ តំណាងរាស្ត្រពីគណបក្សសង្គ្រោះជាតិ មិនត្រឹមតែមិនចូលរួមក្នុងកិច្ចប្រជុំពេញអង្គនៃរដ្ឋសភានាថ្ងៃនេះទេ តែថែមទាំងបានចេញសេចក្តីថ្លែងការណ៍ថែមទៀត ដើម្បីសុំឲ្យបញ្ចប់ការអនុម័តលើខ្លឹមសារនៃច្បាប់ខាងលើ។
តាមរយៈសេចក្តីថ្លែងការណ៍ ក្រុមតំណាងរាស្ត្រពីគណបក្សសង្គ្រោះជាតិ បានលើកឡើងថា៖«សេចក្តីស្នើច្បាប់នេះ មានចរិតនយោបាយ គាបសង្កត់លើសិទ្ធិបុគ្គល និងគាបសង្កត់លើគណបក្សនយោបាយ ក្នុងន័យកម្ចាត់ខ្មែរគ្នាឯង និងគាបសង្កត់គូប្រជែងនយោបាយ។ សេចក្តីស្នើច្បាប់នេះ មិនស្របតាមគោលការណ៍នីតិរដ្ឋ ហើយផ្ទុយពីគោលការណ៍ប្រជាធិបតេយ្យ សេរីពហុបក្ស ដែលធានាដោយរដ្ឋធម្មនុញ្ញនៃប្រទេសកម្ពុជា»។
យ៉ាងណាដោយចុះ តំណាងរាស្ត្រពីគណបក្សប្រជនកម្ពុជា បានអនុម័តខ្លឹមសារថ្មីនៃច្បាប់ខាងលើរួចទៅហើយ។
ច្បាប់ស្តីពី គណបក្សនយោបាយ ត្រូវបានកែប្រែម្តងហើយ កាលពីដើមឆ្នាំ២0១៧នេះ។ កាលនោះ ខ្លឹមសារ ដែលត្រូវបានសរសេរក្នុងច្បាប់ស្តីពី គណបក្សនយោបាយ ហើយត្រូវបានរដ្ឋសភា អនុម័ត ដោយមានការគាំទ្រពីតំណាងរាស្ត្រនៃគណបក្សប្រជាជនកម្ពុជា បានកំណត់ថា ទណ្ឌិត មិនអាចធ្វើជាប្រធានគណបក្ស ឬក៏ធ្វើជាសមាជិកគណៈកម្មាធិការនាយកនៃគណបក្សនយោបាយណាមួយ ឡើយ។ ការកែប្រែច្បាប់ស្តីពី គណបក្សនយោបាយនាកាលនោះ ក៏ធ្វើឡើងតាមសំណើរបស់សម្តេច ហ៊ុន សែន ដែរ៕
Tag:
CPP
CNRP
ច្បាប់នយោបាយ
© រក្សាសិទ្ធិដោយ thmeythmey.com