លោក សុខ ឥសាន៖ លោកសម រង្ស៊ី បញ្ចប់ជីវិតនយោបាយដោយខ្លួនឯង

ជាតិ

លោក សុខ ឥសាន៖ លោកសម រង្ស៊ី បញ្ចប់ជីវិតនយោបាយដោយខ្លួនឯង

11, Jul 2017 , 3:35 pm

រូបភាព

ដោយ: ម៉ៅ សុផា

ភ្នំពេញ៖ លោក សម រង្ស៊ី អតីតមេបក្សប្រឆាំង បានលើកឡើងថា គោលបំណងនៃការកែប្រែច្បាប់ស្តីពីគណបក្សនយោបាយជាលើកទីពីរនេះ មានគោលដៅសម្លាប់ជីវិតនយោបាយរបស់លោក។ អ្នកតាមដានស្ថានការណ៍នយោបាយនៅកម្ពុជា ក៏មើលឃើញដូច្នេះដែរ។ ប៉ុន្តែអ្នកនាំពាក្យបក្សកាន់អំណាច បានច្រានចោលការលើកឡើងខាងលើ ហើយបានលើកឡើងថា សហស្ថាបនិកបក្សសង្គ្រោះជាតិរូបនេះ បញ្ចប់ជីវិតនយោបាយដោយខ្លួនឯង មិនមែនដោយសារសម្តេច ហ៊ុន សែន នោះឡើយ។

លោក សម រង្ស៊ី អតីតប្រធានគណបក្សសង្គ្រោះជាតិ បានបញ្ចេញប្រតិកម្ម ដោយបង្ហោះសំណេរលើទំព័រហ្វេសប៊ុកថា សម្តេច ហ៊ុន សែន នាយករដ្ឋមន្ត្រីនិងជាប្រធានគណបក្សប្រជានកម្ពុជា មានបំណងសម្លាប់ជីវិតនយោបាយរបស់លោក តាមរយៈការកែប្រែច្បាប់ស្តីពីគណបក្សនយោបាយ។ លោក សម រង្ស៊ី ដែលហ៊ុមព័ទ្ធដោយបណ្តឹងរបស់សកម្មជននិងមេដឹកនាំគណបក្សប្រជាជនកម្ពុជា ហើយត្រូវបានតុលាការ កាត់ទោសឲ្យមានឈ្មោះជាទណ្ឌិតនោះ បានលើកឡើងទៀតថា ប្រព័ន្ធតុលាការ ក៏ជាមធ្យោបាយ ដែលសម្តេច ហ៊ុន សែន ប្រើប្រាស់ដើម្បីកម្ចាត់លោកដែរ។

លោក សម រង្ស៊ី ដែលកំពុងរស់នៅឯបរទេស បានសរសេរលើទំព័រហ្វេសប៊ុកយ៉ាងដូច្នេះ៖«ខ្ញុំស្នើឲ្យរដ្ឋាភិបាលលោក ហ៊ុន សែន ឈប់ខាតពេល ប៉ុនប៉ងសម្លាប់ សម រង្ស៊ី តាមផ្លូវនយោបាយ ដោយកែច្បាប់ស្តីពីគណបក្សនយោបាយ ជាបន្តបន្ទាប់។ ការប៉ុនប៉ងសម្លាប់ [ជីវិតនយោបាយរបស់ខ្ញុំ] តាមផ្លូវតុលាការក៏មាន តាមរយៈដីការាប់មិនអស់ ឲ្យខ្ញុំជាប់ពន្ធនាគាររាប់សិបឆ្នាំ»។

សម្រាប់លោក សម រង្ស៊ី ការប្រើប្រាស់ច្បាប់ឬប្រព័ន្ធតុលាការ ដើម្បីសម្លាប់ជីវិតនយោបាយរបស់លោក មិនបានផ្តល់ផលប្រយោជន៍អ្វីដល់សម្តេច ហ៊ុន សែន ឬប្រទេសជាតិ នោះទេ។ ផ្ទុយទៅវិញ លោក សម រង្ស៊ី យល់ថា ការធ្វើដូច្នេះ មានតែជួយលោក ឲ្យមានប្រជាប្រិយភាព កាន់តែខ្លាំងឡើង។

លោក សុខ ឥសាន អ្នកនាំពាក្យគណបក្សប្រជាជនកម្ពុជា បានឆ្លើយតបថា គ្មានអ្នកណាម្នាក់ មានចេតនាសម្លាប់ជីវិតនយោបាយរបស់លោក សម រង្ស៊ី នោះទេ។ លោក សុខ ឥសាន បែរជានិយាយថា លោក សម រង្ស៊ី គឺជាអ្នកសម្លាប់ជីវិតនយោបាយខ្លួនឯង។

អ្នកនាំពាក្យគណបក្សប្រជាជនកម្ពុជារូបនេះ បានប្រាប់សារព័ត៌មានថ្មីៗដូច្នេះថា៖«គាត់ជាអ្នកសរសេរលិខិតសុំលាលែងពីប្រធានគណបក្សសង្គ្រោះជាតិ ខ្លួនឯង។ អ៊ីចឹង ជីវិតនយោបាយរបស់គាត់ គឺគាត់ជាអ្នកសម្លាប់ខ្លួនឯង»។

លោក សុខ ឥសាន បន្តថា ការកែប្រែច្បាប់ស្តីពីគណបក្សនយោបាយ គឺដើម្បីទប់ស្កាត់គណបក្សនយោបាយ កុំឲ្យពាក់ព័ន្ធនឹងអ្នកទោស។ លោកបន្ថែមទៀតថា ការកែប្រែច្បាប់ស្តីពីគណបក្សនយោបាយ មិនមែនមានចេតនាក្នុងការកម្ចាត់ជីវិតនយោបាយរបស់លោក សម រង្ស៊ី នោះទេ។ លោក សង្កត់ធ្ងន់ថា ច្បាប់នេះ មានវិសាលភាពក្នុងការអនុវត្តលើគណបក្សនយោបាយទាំងអស់ ដោយមិនសំដៅលើបុគ្គលណាមួយឡើយ។

លោក សូ ចន្ថា អ្នកតាមដានស្ថានការណ៍នយោបាយនៅកម្ពុជា មើលឃើញថា កែប្រែច្បាប់ស្តីពីគណបក្សនយោបាយនាពេលនេះ គឺដើម្បីប្រយោជន៍នយោបាយ ច្រើនជាងប្រយោជន៍ជាតិ។ អ្នកតាមដានស្ថានការណ៍នយោបាយរូបនេះ និយាយថា លោក សម រង្ស៊ី និងគណបក្សសង្រោះជាតិ គឺជាគោលដៅចម្បង ដែលជំរុញឲ្យមានការកែប្រែច្បាប់នេះ។ លោក និយាយបែបនេះថា៖«លោក សម រង្ស៊ី រងការចោទប្រកាន់ពីតុលាការ។ ដូច្នេះ ការកែប្រែច្បាប់ គឺដើម្បីហាមឃាត់ និងបញ្ចប់ជីវិតនយោបាយរបស់លោក សម រង្ស៊ី ហើយក៏ជាការដាក់គំនាបលើបក្សប្រឆាំងដែរ»។

លោក សូ ចន្ថា លើកឡើងថា ទិដ្ឋភាពនយោបាយបែបនេះ ធ្លាប់កើតមានក្នុងប្រទេសកម្ពុជាម្តងរួចហើយ កាលពីអតីតកាល។ លោក រម្លឹកថា កាលនោះ ច្បាប់ស្តីពីឯកពន្ធភាព ត្រូវបានបង្កើតឡើង ដើម្បីសំដៅលើសម្តេចក្រុមព្រះ នរោត្តម រណឫទ្ធិ ប្រធានគណបក្សហ្វ៊ុនស៊ិនប៉ិច។

នេះជាលើកទីពីរហើយ ដែលច្បាប់ស្តីពីគណបក្សនយោបាយ ត្រូវបានកែប្រែដោយតំណាងរាស្ត្រគណបក្សប្រជាជនកម្ពុជា។ គំនិតគោលក្នុងការកែប្រែច្បាប់ជាលើកទីពីរ គឺដើម្បីមិនឲ្យគណបក្សនយោបាយ ជាប់ពាក់ព័ន្ធជាមួយអ្នកទោស។

យោងតាមខ្លឹមសារថ្មី ដែលត្រូវបានដាក់បញ្ចូលទៅក្នុច្បាប់ស្តីពី គណបក្សនយោបាយ តុលាការ មានសិទ្ធិអំណាចយ៉ាងធំធេង រហូតដល់អាចរំលាយគណបក្សណាមួយ ប្រសិនបើគណបក្សនយោបាយនោះផ្សារភ្ជាប់ឬមានទំនាក់ទំនងជាមួយទណ្ឌិត ក្នុងការធ្វើសកម្មភាព ដើម្បីផលប្រយោជន៍ផ្នែកនយោបាយ។ ខ្លឹមសារថ្មីទាំងនោះបានសរសេរយ៉ាងដូច្នេះ៖«គ្រប់គណបក្សនយោបាយ មិនត្រូវប្រើប្រាស់សារជាសំឡេង រូបភាព ឯកសារជាលាយលក្ខណ៍អក្សរ ឬសកម្មភាពរបស់ទណ្ឌិត ដែលជាប់ទោសពីបទឧក្រិដ្ឋឬបទមជ្ឈិម ដើម្បីជាប្រយោជន៍នយោបាយ សម្រាប់គណបក្សរបស់ខ្លួន។ គណបក្សនយោបាយ មិនត្រូវយល់ព្រមដោយចំហ ឬដោយតុណ្ហីភាព [ភាពស្ងៀមស្ងាត់] ឬឃុបឃិតជាមួយទណ្ឌិត ឲ្យធ្វើសកម្មភាពណាមួយ ដើម្បីប្រយោជន៍នយោបាយ សម្រាប់គណបក្សរបស់ខ្លួន។ បើគណបក្សណា បានប្រព្រឹត្តនូវទង្វើទាំងនេះ តុលាការ អាចរំលាយគណបក្សនោះ»។

ខ្លឹមសារថ្មីនៃច្បាប់ស្តីពីគណបក្សនយោបាយ ត្រូវបានតំណាងរាស្ត្រគណបក្សប្រជាជនកម្ពុជា អនុម័តហើយ តាមរយៈកិច្ចប្រជុំពេញអង្គនៃរដ្ឋសភា កាលពីថ្ងៃទី១0 ខែកក្កដា ឆ្នាំ២0១៧។ តំណាងរាស្ត្រគណបក្សសង្គ្រោះជាតិ បានធ្វើពហិការ មិនចូលប្រជុំក្នុងរដ្ឋសភាជាមួយតំណាងរាស្ត្រគណបក្សប្រជាជនកម្ពុជា ដើម្បីអនុម័តខ្លឹសារថ្មីនៃច្បាប់ខាងលើ នោះទេ។ តំណាងរាស្ត្រគណបក្សសង្គ្រោះជាតិ បានចេញសេចក្តីថ្លែងការណ៍មួយ ដោយចាត់ទុកខ្លឹមសារថ្មីនៃច្បាប់ស្តីខាងលើថា មានចរិតនយោបាយ ហើយគាបសង្កត់លើសិទ្ធិបុគ្គល និងគណបក្សនយោបាយ។

កាលពីខែដើមឆ្នាំ២0១៧ ច្បាប់ស្តីពីគណបក្សនយោបាយ ត្រូវបានកែប្រែម្តងរួចទៅហើយ។ ច្បាប់ស្តីពីបក្សនយោបាយ ដែលត្រូវបានកែប្រែនាកាលនោះ បានកំណត់ថា អ្នកទោស មិនអាចធ្វើជាប្រធានគណបក្ស ឬក៏ធ្វើជាសមាជិកគណៈកម្មាធិការនាយកនៃគណបក្សនយោបាយណាមួយឡើយ។
ការកែប្រែច្បាប់ស្តីពីគណបក្សនយោបាយទាំងពីរលើនេះ សុទ្ធតែធ្វើឡើងតាមសំណើរបស់សម្តេច ហ៊ុន សែន៕