ជាតិ
លោក ហ៊ុន ម៉ានី សំណូមពរបក្សប្រឆាំងឲ្យចូលរួមសាទរអ្វីដែលជាមោទនភាពជាតិ
× លោក ហ៊ុន ម៉ានី តំណាងរាស្ត្រមកពីគណបក្សប្រជាជនកម្ពុជាបានបង្ហាញអារម្មណ៍ខកចិត្តចំពោះករណីដែលអ្នកនយោបាយខ្លះអត្ថាធិប្បាយប្រាប់បរទេសធ្វើឲ្យខាតបង់ផលប្រយោជន៍របស់កម្ពុជា។ នៅក្នុងកិច្ចប្រជុំពេញរដ្ឋសភាពេញអង្គនៅថ្ងៃទី១០ខែកក្កដា អ្នកតំណាងរាស្ត្រវ័យក្មេង មិនចង់ឃើញអ្នកនយោបាយយកការបង្អាប់ប្រទេសជាតិដើម្បីជាថ្នូរនឹងប្រជាប្រិយភាព ឬសន្លឹកឆ្នោតនោះឡើយ។
ស្តាប់ប្រសាសន៍លោក ហ៊ុន ម៉ានី
តំណាងរាស្ត្រវ័យក្មេងរបស់គណបក្សប្រជាជនកម្ពុជា លោក ហ៊ុន ម៉ានី ទំនងជាចង់ឃើញយុទ្ធសាស្ត្រប្រកួតប្រជែងថ្មីពីគណបក្សប្រឆាំង។ នោះ គឺមិនមែនជាការនិយាយបង្អាប់កម្ពុជា ឬរារាំងការនាំចេញផលិតផលពីកម្ពុជាដើម្បីដាក់សម្ពាធលើគណបក្សកាន់អំណាចទៀតឡើយ តែជាការចូលរួមសាទរអ្វីដែលជាសមិទ្ធផលប្រទេសជាតិ និងកិត្តិយសរបស់កម្ពុជានៅលើឆាកអន្តរជាតិ។
នៅក្នុងកិច្ចប្រជុំពេញអង្គរដ្ឋសភាកាលពីថ្ងៃចន្ទ ដែលមានតែតំណាងរាស្ត្រគណបក្សប្រជាជនកម្ពុជា តំណាងរាស្ត្រមណ្ឌលខេត្តកំពង់ស្ពឺដដែលបានប្រើពេលជាង២០នាទី ដើម្បីបង្ហាញការខកចិត្តចំពោះអ្នកនយោបាយខ្មែរដែលតែងតែអំពាវនាវឲ្យបរទេសពិចារណាលើលក្ខខណ្ឌនៃការនាំចេញសម្លៀកបំពាក់ទៅផ្សារអន្តរជាតិ និងការនិយាយបន្តុះបង្អាប់ប្រទេសកំណើតជាដើម។
កាលពីពេលកន្លងទៅថ្មីៗនេះ ការអត្ថាធិប្បាយរបស់ឯកឧត្តម កឹម សុខា នៅបរទេសដែលថា កម្ពុជាក្រីក្រ គ្មានបង្គន់នោះ បានរងការរិះគន់ និងប្រតិកម្មយ៉ាងខ្លាំងពីអ្នកគាំទ្រ និងមន្ត្រីជាន់ខ្ពស់របស់គណបក្សប្រជាជនកម្ពុជា។ ការអះអាងរបស់ឯកឧត្តម កឹម សុខា យ៉ាងនេះប្រហែលបានប៉ះទង្គិចអារម្មណ៍របស់លោក ហ៊ុន ម៉ានី រហូតដល់អ្នកតំណាងរាស្ត្ររូបនេះលើកយកបញ្ហានេះមកនេះបង្ហើរនៅក្នុងកិច្ចប្រជុំរដ្ឋសភា ជាមួយនឹងការអំពាវនាវយ៉ាងដូច្នេះ៖«ខ្ញុំសូមសំណូមពរ ក្នុងនាមខ្ញុំជាយុវជនជំនាន់ក្រោយមួយរូប កុំយកមុខមាត់ប្រទេសជាតិដើម្បីការចំណេញសន្លឹកឆ្នោត!»។ លោកបន្តទៀតថា៖«មោទនភាពនៃប្រសាទព្រះវិហារ ប្រាសាទសំបូរព្រៃគុក មោទនភាពទាំងអស់នេះ មិនអាចសាបដោយសារតែពាក្យថាខ្មែរក្រណាស់ អត់បង្គន់នោះទេ»។
ខុសតែពីការបង្អាប់ប្រទេសជាតិ និងការធ្វើសកម្មភាពដែលនាំឲ្យខាតបង់ប្រយោជន៍ និងសេដ្ឋកិច្ចរបស់កម្ពុជា លោក ហ៊ុន ម៉ានី បានបញ្ជាក់ថា វាមានអ្វីផ្សេងៗច្រើនទៀត សម្រាប់អ្នកនយោបាយប្រកួតគ្នាដណ្តើមសន្លឹកឆ្នោត។
«បើសិនវាជាសំណូមពររបស់យុវជន ហ៊ុន ម៉ានី នោះ អ្វីដែលជាមោទនភាពជាតិ សូមចូលរួមអបអរសាទរទៅ ដូចជារឿងប្រាសាទសំបូរព្រៃគុក ឬប្រាសាទអង្គវត្តជាគោលដៅទេសចរណ៍ទីមួយស្ទើររៀងរាល់ឆ្នាំ។ ពេលខ្លះគិតឲ្យវិជ្ជមាន សូមចូលរួមអបអរសាទរបន្តិចទៅ!»។ នេះជាសេចក្តីថ្លែងការណ៍របស់លោក ហ៊ុន ម៉ានី នៅក្នុងកិច្ចប្រជុំរដ្ឋសភា ដោយលោកបន្ថែមថា មិនមែនអ្វីៗ សុទ្ធតែជានយោបាយនោះឡើយ៕
Tag:
ហ៊ុន ម៉ានី
ព្រៃគុក
ព្រះវិហារ
© រក្សាសិទ្ធិដោយ thmeythmey.com