មន្ទីរសម្រាកព្យាបាលកម្ពុជាបានពានរង្វាន់គុណភាពល្អបំផុត ដោយសារឡាបូបង្កកំណើតកូនក្នុងកែវដំបូងបង្អស់នៅកម្ពុជា

ជាតិ

បទយកការណ៍ / បទសម្ភាសន៍

មន្ទីរសម្រាកព្យាបាលកម្ពុជាបានពានរង្វាន់គុណភាពល្អបំផុត ដោយសារឡាបូបង្កកំណើតកូនក្នុងកែវដំបូងបង្អស់នៅកម្ពុជា

12, Jul 2017 , 9:00 am

រូបភាព

ដោយ: ខន ចំប៉ា

មន្ទីរសម្រាកព្យាបាលកម្ពុជា បានទទួលពានរង្វាន់ ជាមន្ទីពេទ្យដែលមានគុណភាពល្អបំផុត កម្រិតអន្តរជាតិ ពីគណៈកម្មការវាយតម្លៃអន្តរជាតិ និងសមាគមន៍វេជ្ជសាស្ត្រសហគមន៍អឺរ៉ុប នៅទីក្រុង Luzern ប្រទេសស្វីស។ បើតាម អគ្គនាយក និងជាស្ថាបនិកមន្ទីរសំរាកព្យាបាលកម្ពុជា មានលក្ខណៈវិនិច្ឆ័យសំខាន់ៗចំនួន៤ ដែលធ្វើឲ្យមន្ទីរសំរាកព្យាបាលកម្ពុជាទទួលបានរង្វាន់នេះ ពិសេសនោះ គឺការការចូលរួមដោះស្រាយបញ្ហាសង្គម ដែលកើតចេញពីការលំបាកមានកូនរបស់គូស្វាមី និងបញ្ហានានាដែលបណ្តាលមកពីរោគស្ត្រី តាមរយៈឡាបូបង្កកំណើតកូនក្នុងកែវ ដែលជាបច្ចេកវិទ្យាទំនើបចុងក្រោយបំផុតរបស់ខ្លួន។

កាលពីថ្ងៃទី ៣ ខែកក្កដា ឆ្នាំ២០១៧ កន្លងទៅថ្មីៗនេះ មន្ទីរសំរាកព្យាបាលកម្ពុជា ត្រូវបានគណៈកម្មការវាយតម្លៃអន្តរជាតិ និងសមាគមន៍វេជ្ជសាស្ត្រសហគមន៍អឺរ៉ុប (The Socrates International Committee and European Medical Association) សម្រេចជ្រើសរើស និងប្រគល់ពានរង្វាន់ ជាមន្ទីពេទ្យដែលមានគុណភាពល្អបំផុត (Best Medical Practice) នៅទីក្រុង Luzern ប្រទេសស្វីស។

លោក ហោ សំណាង អគ្គនាយក និងជាស្ថាបនិក នៃមន្ទីរសំរាកព្យាបាលកម្ពុជា បានបញ្ជាក់ប្រាប់សារព័ត៌មានថ្មីៗថា គណៈកម្មការបានវាយតម្លៃសម្រាប់ការផ្តល់ពានរង្វាន់ ដោយផ្អែកលើលក្ខណៈវិនិច្ឆ័យចំនួន៤ ចំណុច។ លក្ខណៈវិនិច្ឆ័យទាំងនោះមាន ទី១. គុណភាព និងកេរ្តិ៍ឈ្មោះល្អរបស់មន្ទីរសំរាកព្យាបាលកម្ពុជា ដែលមានផ្តល់សេវាបង្កកំណើតកូនក្នុងកែវ។ ទី២. ប្រសិទ្ធភាព នៃសុវត្ថិភាពខ្ពស់នៃការផ្តល់សេវា។ ទី៣. វិជ្ជាជីវៈ និងក្រម សីលធម៌នៃក្រុមគ្រូពេទ្យឯកទេស និងបុគ្គលិកជំនាញគ្រប់ផ្នែក។ និងទី៤ មន្ទីរសំរាកព្យាបាលកម្ពុជាមានបំពាក់បរិក្ខារពេទ្យទំនើបចុងក្រោយបំផុត។

ក្រៅពីចំណុចសំខាន់ទាំង៤ខាងលើ គណៈកម្មការវាយតម្លៃ ក៏មើលទៅលើការចូលរួមរបស់មន្ទីរសំរាកព្យាបាលកម្ពុជា ក្នុងការដោះស្រាយបញ្ហាសង្គម ដែលកើតចេញពីការលំបាកមានកូនរបស់គូស្វាមី និងបញ្ហានានាដែលបណ្តាលមកពីរោគស្ត្រី។ អគ្គនាយក និងជាស្ថាបនិក នៃមន្ទីរសំរាកព្យាបាលកម្ពុជា បញ្ជាក់ដូច្នេះថា៖« គណៈកម្មការវាយតម្លៃ គឺយោងទៅលើប្រយោជន៍ដែលគម្រោងនេះបានផ្តល់ និងចូលរួមជួយក្នុងសង្គមជាតិរបស់យើង។ មានន័យថា ឡាបូបង្កកំណើតនេះ បានជួយអ្នកដែលជួបការលំបាកមិនអាចមានកូនតាមធម្មជាតិ»។

ក្នុងបទសម្ភាសន៍ដដែល លោក ហោ សំណាង ចាត់ទុកថា ពានរង្វាន់នេះ មិនត្រឹមតែជាកិត្តិយស និងជាការទទួលស្គាល់មន្ទីរសំរាកព្យាបាលកម្ពុជាប៉ុណ្ណោះទេ ប៉ុន្តែវាបានឆ្លុះបញ្ជាំងពីភាពរីកចម្រើន នៃវិស័យសុខាភិបាលនៅកម្ពុជា ពីស្ថាប័នអន្តរជាតិ។

សូមអញ្ជើញស្តាប់បទសម្ភាសន៍រវាង កញ្ញា ខន ចំប៉ា អ្នកកាសែតនៃសារព័ត៌មានថ្មីៗ និងលោក ហោ សំណាង អគ្គនាយក និងជាស្ថាបនិក នៃមន្ទីរសំរាកព្យាបាលកម្ពុជា ដូចតទៅ៖

យោងតាមគណៈកម្មការរៀបចំកម្មវិធី មានស្ថាប័នពហុវិស័យចំនួន១៦០ មកពី៥៨ប្រទេស ត្រូវបាន ជ្រើសរើសសម្រាប់ទទួលពានរង្វាន់ដែលរៀបចំ នៅថ្ងៃប្រទេសស្វីសនោះ។ នេះជាលើកទី១ក្នុងវិស័យសុខាភិបាលនៅកម្ពុជា ទទួលបានពានរង្វាន់បែបនេះ ខណៈកន្លងមក មានស្ថាប័នធនាគារ អចលនទ្រព្យ និងរដ្ឋករទឹកស្វយ័តក្រុងភ្នំពេញធ្លាប់ទទួលបានពានរង្វាន់។

ស្របពេលគ្នានេះ លោកស្រី វេជ្ជបណ្ឌិត ស៊ាន សុខទៀង នាយិកាបច្ចេកទេស នៃមន្ទីរសំរាកព្យាបាលកម្ពុជា ក៏ត្រូវបានអញ្ជើញឲ្យចូលរួម ក្នុងសន្និសីទអន្តរជាតិលើកទី ៣៣ របស់សមាគមន៍អឺរ៉ុប ស្តីអំពីសុខភាពបន្តពូជ និងអំប្រីយ៉ុង European Society for Human Reproduction and Embryology (ESHRE) ក្រុងហ្សឺណែវ ប្រទេសស្វីសផងដែរ៕