កីឡាអន្តរជាតិ
អន្តរជាតិ
Bayern បាន James ពី Real តែឲ្យ Costa ទៅ Juventus
× Bayern Munich បានចុះកិច្ចព្រមព្រៀងនាំយកកីឡាករ James Rodriguez ពីក្រុម Real Madrid ក្នុងកិច្ចសន្យាខ្ចីជើងរយៈពេលពីរឆ្នាំ។ ស្របពេលគ្នានេះម្ចាស់ជើងឯង Bundesliga ៥សម័យកាលជាប់ៗគ្នានេះក៏បានអនុញ្ជាតឲ្យ Juventus ខ្ចី Douglas Costa ដែរ។ នេះបើយោងតាមវេបសាយផ្លូវការ Bayern Munich។
ប្រធានក្រុមជម្រើសជាតិកូឡុំប៊ី វ័យ២៥ឆ្នាំរូបនេះត្រូវបាន Real Madrid ទិញពីក្រុម Monaco ក្នុងតម្លៃ ៧១លានផោន ប្រមាណ ៩១លានដុល្លារ កាលពីឆ្នាំ២០១៤ អំឡុងពេលលោក Carlo Ancelotti នៅដឹកនាំ។
ក្រោមការដឹកនាំរបស់លោក Zinedine Zidane ពីររដូវកាលមកនេះ James មិនបានបង្ហាញខ្លួននោះទេ ពោលនៅរដូវកាលមុនរូបគេបានបង្ហាញខ្លួនត្រឹមតែ ២២ ប្រកួតប៉ុណ្ណោះឲ្យក្រុមស្តេចសនៅ La Liga ។ ដោយសារមិនសូវបានចូលលេងក្នុងជម្រើស១១នាក់ដំបូង និងតែងតែអង្គុយនៅកៅអីបម្រុងផងនោះ ម្ចាស់ស្បែកជើងមាសកាលពី World Cup ២០១៤ ក៏សម្រេចចាកចេញមកចូលរួមជាមួយ Bayern Munich តែម្តង។
មុនមកចូលរួមជាមួយក្រុមជើងឯក Bundesliga របស់អាល្លឺម៉ង់នេះ Rodriguez ក៏មានការចាប់អារម្មណ៍ពីក្រុមនៅក្របខណ្ឌ Premier League ដូចជា Chelsea និង Manchester United ជាដើម។
បន្ទាប់ពីយកបាន James Rodriguez មកកាន់ទឹកដី Allianz Arena ហើយនោះ Bayern Munich ក៏យល់ព្រមឲ្យខ្សែបម្រើក្រុមជម្រើសជាតិប្រេស៊ីល វ័យ២៦ឆ្នាំ Douglas Costa ចាកចេញទៅ Juventus វិញដែរ ក្នុងលក្ខខណ្ឌខ្ចីជើងមួយឆ្នាំ ប៉ុន្តែទទួលបានប្រាក់ជាង៦លានដុល្លារ ពីក្រុមរងជើងឯក Champions League រដូវកាលមុនផងដែរ៕
Tag:
បាល់ទាត់
James Rodriguez
Bayern Munich
Real Madrid
© រក្សាសិទ្ធិដោយ thmeythmey.com