ជាតិ
អគ្គនាយកអប្សរា មិនលើកលែងមន្ត្រីដែលយកលុយជាថ្នូរនឹងសំណង់ខុសច្បាប់ឡើយ «លោក ស៊ុ ម៉ាប់ ក្នុងសន្និសីទសារព័ត៌មាន ស្តីពីវិធានការចុះរុះរើសំណង់ខុសច្បាប់។ រូបថត៖ អ៊ីសា រ៉ហានី
× សៀមរាប៖ ឆ្លើយតបទៅនឹងសំណួរអ្នកសារព័ត៌មាន ដែលលើកឡើងថា សំណង់ខុសច្បាប់នៅតំបន់អង្គរ កើតឡើងដោយសារការផ្តល់លុយមួយចំនួន ដល់បុគ្គលិកអាជ្ញាធរជាតិអប្សរា ជាថ្នូរនឹងការបានសិទ្ធិសាងសង់។ អគ្គនាយកអាជ្ញាធរជាតិអប្សរា លោក ស៊ុំ ម៉ាប់ បានបញ្ជាក់ថា លោកបានឮពីព័ត៌មាននេះជាយូរណាស់មកហើយ តែនៅរកភស្តុតាងមិនទាន់បាន។ លោកបានព្រមាន ចាត់ការតាមផ្លូវច្បាប់ ដល់បុគ្គលិកណា ដែលរកឃើញថា បានដើរយកលុយពីម្ចាស់សំណង់ខុសច្បាប់។
លោក ស៊ុំ ម៉ាប់ ហាក់ចង់ដឹងកាន់តែខ្លាំង ចំពោះព័ត៌មានដែលលើកឡើងថា បុគ្គលិក និងមន្ត្រីអាជ្ញាធរជាតិអប្សរា ជាអ្នកអនុញ្ញាតសិទ្ធិសាងសង់ ជាថ្នូរឲ្យសំណូកផ្សេងៗ។ លោកស្នើសុំកិច្ចសហការជាមួយប្រជាពលរដ្ឋ ដើម្បីរកមុខអ្នកប្រព្រឹត្តិបទល្មើសឲ្យខានតែបាន តែរហូតមកដល់ម៉ោងនេះ រកមិនទាន់ឃើញនៅឡើយ។ លោកបញ្ជាក់យ៉ាងច្បាស់ថា នឹងចាត់វិធានការតាមផ្លូវច្បាប់ ចំពោះជនណាដែលប្រព្រឹត្តិបទល្មើសនេះ ដោយមិនលើកលែងឡើយ។
លោកបញ្ជាក់យ៉ាងដូច្នេះថា៖« យើងមិនអនុគ្រោះទេ បុគ្គលមួយរូប ២រូប ១០រូប ២០រូប ដែលមកបំផ្លាញស្ថាប័ននេះទាំងមូល»។ លោកបន្តថា៖« ត្រឹមតែពាក្យចចាមអារាម គ្មានភស្តុតាងច្បាស់លាស់ សូមមេត្តាកុំបំប៉ងថាតាមនោះ វានាំឲ្យស្ថាប័នអភិរក្សនេះមួយ ត្រូវបានគេស្អប់ខ្ពើម ខណៈធាតុពិត វាមិនមែនចឹង»៕
សូមស្តាប់ការលើកឡើងរបស់អគ្គនាយកអាជ្ញាធរជាតិអប្សរា
លោក ស៊ុំ ម៉ាប់ ក៏បានពន្យល់ពីហេតុផលមួយ ដែលធ្វើឲ្យកើតសំណង់ខុសច្បាប់អំឡុងពេលបោះឆ្នោតផងដែរ។ លោកថា មិនមែនអាជ្ញាធរជាតិអប្សរាបណ្តោយទេ តែនេះជាការអនុវត្តតាមគោលការណ៍របស់រាជរដ្ឋាភិបាល និងគណៈកម្មាធិការរៀបចំការបោះឆ្នោត ដែលអំពាវនាវឲ្យរក្សាសណ្តាប់ធ្នាប់ ហើយអាជ្ញាធរជាតិអប្សរាបានដាក់គោលការណ៍មួយ ជៀសវាងឲ្យមានបាតុកម្មពាក់ព័ន្ធនឹងការឃាត់ការសាងសង់ ដកហូត។ លោក ស៊ុំ ម៉ាប់បន្ថែម៖« ការណ៍នេះ បានត្រឹមតែអាជ្ញាធរ ចុះណែនាំមិនឲ្យសាងសង់ តែពួកគេមិនស្តាប់ និងបន្តសាងសង់។ គាត់យល់ថា សង់ហើយមានមនុស្សនៅ មានចានឆ្នាំងហើយនោះ គេមិនរើទេ នេះសុទ្ធតែចាញ់នូវការភូតកុហក ពីមជ្ឈដ្ឋានមួយចំនួន ហើយអ្នកមួយចំនួននោះ សុទ្ធតែអាជីវករ...»។
គួរបញ្ជាក់ថា គណៈកម្មការចម្រុះ ដែលចូលរួមពីអាជ្ញាធរជាតិអប្សរា និងរដ្ឋបាលខេត្តសៀមរាប នឹងចាប់ផ្តើមអនុវត្តគោលការណ៍ចុះរុះរើសំណង់ខុសច្បាប់ក្នុងតំបន់អង្គរ ចាប់ពីសប្តាហ៍ទី៣ នៃខែកក្កដានេះតទៅ៕
Tag:
ស៊ុំ ម៉ាប់
សំណង់ខុសច្បាប់
អាជ្ញាធរអប្សរា
© រក្សាសិទ្ធិដោយ thmeythmey.com