ជាតិ
សមាជិកក្រុមប្រឹក្សាឃុំ-សង្កាត់ថ្មី ត្រូវប្រកាសទ្រព្យសម្បត្តិ និងបំណុលរបស់ខ្លួន លោក ឱម យ៉ិនទៀង ប្រធានអង្គភាពប្រឆាំងអំពើពុករលួយ
× ភ្នំពេញ៖ អង្គភាពប្រឆាំងអំពើពុករលួយ (ACU) បានចេញសេចក្តីជូនដំណឹង អំពីការប្រកាសទ្រព្យសម្បត្តិនិងបំណុលរបស់សមាជិកក្រុមប្រឹក្សាឃុំ-សង្កាត់ទាំង២៥ រាជធានី-ខេត្ត ដែលទើបនឹងជាប់ឆ្នោត ក្នុងអាណត្តិទី៤នេះ។ សេចក្តីជូនដំណឹង បានឲ្យដឹងថា កម្មវិធីនៃការប្រកាសទ្រព្យសម្បត្តិនិងបំណុលរបស់សមាជិកក្រុមប្រឹក្សាឃុំ-សង្កាត់ថ្មី នឹងធ្វើឡើងក្នុងរយៈពេល ១ខែ គឺចាប់ពីថ្ងៃទី១៥ ខែកក្កដា ដល់ថ្ងៃទី១៥ ខែសីហា ឆ្នាំ២0១៧។
អង្គភាពប្រឆាំងអំពើពុករលួយ ក៏បានសហការជាមួយមន្ត្រីផ្នែកប្រឆាំងអំពើពុករលួយនៃក្រសួងមហាផ្ទៃផងដែរ សម្រាប់ការរៀបចំកម្មវិធីនៃការប្រកាសទ្រព្យសម្បត្តិនិងបំណុលរបស់សមាជិកក្រុមប្រឹក្សាឃុំ-សង្កាត់ថ្មី។ នេះបើតាមសេចក្តីជូនដំណឹងរបស់អង្គភាពប្រឆាំងអំពើពុករលួយ ដដែល។
សមាជិកក្រុមប្រឹក្សាឃុំ-សង្កាត់ ដែលជាប់ឆ្នោតក្នុងអាណត្តិទី៤នេះ មានចំនួន ១១៥៧២នាក់។ សមាជិកក្រុមប្រឹក្សាឃុំ-សង្កាត់ខាងលើ មកពីគណបក្សនយោបាយចំនួន៧ គឺគណប្រជាជនកម្ពុជា គណបក្សសង្គ្រោះជាតិ គណបក្សហ្វ៊ុនស៊ិនប៉ិច គណបក្សខ្មែររួបរួមជាតិ គណបក្សប្រជាធិបតេយ្យមូលដ្ឋាន គណបក្សសម្ព័ន្ធដើម្បីប្រជាធិបតេយ្យ និងគណបក្សសំបុកឃ្មុំសង្គមប្រជាធិបតេយ្យ។
គណបក្សប្រជាជនកម្ពុជា ទទួលបានអាសនៈជាសមាជិកក្រុមប្រឹក្សាឃុំ-សង្កាត់ចំនួន៦៥០៣ (បានតំណែងជាមេឃុំ-ចៅសង្កាត់ចំនួន១១៥៦) ហើយគណបក្សសង្គ្រោះជាតិ ទទួលបានអាសនៈជាសមាជិកក្រុមប្រឹក្សាឃុំ-សង្កាត់ចំនួន៥០០៧ (បានតំណែងជាមេឃុំ-ចៅសង្កាត់ចំនួន៤៨៩)។
ចំណែកឯគណបក្ស៥ទៀត គឺគណបក្សហ្វ៊ុនស៊ិនប៉ិច បានអាសនៈជាសមាជិកក្រុមប្រឹក្សាឃុំ-សង្កាត់ចំនួន២៨ (មិនបានតំណែងជាមេឃុំ-ចៅសង្កាត់) គណបក្សខ្មែររួបរួមជាតិ បានអាសនៈជាសមាជិកក្រុមប្រឹក្សាឃុំ-សង្កាត់ចំនួន២៤ (បានតំណែងជាមេឃុំ១) គណបក្សប្រជាធិបតេយ្យមូលដ្ឋាន បានអាសនៈជាសមាជិកក្រុមប្រឹក្សាឃុំ-សង្កាត់ចំនួន៥ (មិនបានតំណែងជាមេឃុំ-ចៅសង្កាត់) គណបក្សសម្ព័ន្ធដើម្បីប្រជាធិបតេយ្យ បានអាសនៈជាសមាជិកក្រុមប្រឹក្សាឃុំ-សង្កាត់ចំនួន៤ (មិនបានតំណែងជាមេឃុំ-ចៅសង្កាត់) និងគណបក្សសំបុកឃ្មុំសង្គមប្រជាធិបតេយ្យ បានអាសនៈជាសមាជិកក្រុមប្រឹក្សាឃុំ-សង្កាត់ចំនួន១ (មិនបានតំណែងជាមេឃុំ-ចៅសង្កាត់)៕
Tag:
សមាជិកឃុំ-សង្កាត់
ACU
ប្រកាសទ្រព្យសម្បត្តិ
© រក្សាសិទ្ធិដោយ thmeythmey.com