ជាតិ
រដ្ឋាភិបាល ត្រៀមថវិកាជិត១លានដុល្លារ ទុកលើកទឹកចិត្តមន្ត្រី ក្នុងការកម្ចាត់គ្រឿងញៀន
× ភ្នំពេញ៖ ក្រសួងមហាផ្ទៃ ត្រៀមថវិការប្រមាណ ១លានដុល្លារ ដើម្បីទុកផ្តល់ដល់ក្រុមមន្ត្រី និងកម្លាំងសមត្ថកិច្ច ដែលបានទទួលជោគជ័យក្នុងការបង្ក្រាបគ្រឿងញៀន។ នេះបើតាម សម្តេច ស ខេង រដ្ឋមន្ត្រីក្រសួងមហាផ្ទៃ ដែលប្រាប់ក្រុមអ្នកសារព័ត៌មាននៅថ្ងៃទី១៣ ខែកក្កដា ឆ្នាំ២0១៧។
សម្តេច ស ខេង បញ្ជាក់ថា ថវិកាទាំងនេះ គឺបានមកពីការបូកបញ្ចូលគ្នារវាងក្រសួងមហាផ្ទៃនិងអាជ្ញាធរជាតិប្រយុទ្ធប្រឆាំងគ្រឿងញៀន។ សម្តេច លើកឡើងទៀតថា ការផ្តល់ថវិកា គឺជាការលើកទឹកចិត្ត ដល់ក្រុមមន្ត្រីនិងកម្លាំងសមត្ថកិច្ច ដែលមានស្នាដៃក្នុងការប្រយុទ្ធប្រឆាំងគ្រឿងញៀន។
សម្រាប់សម្តេច ស ខេង ការលើកទឹកចិត្តបែបនេះ នឹងជំរុញឲ្យមន្ត្រី ក៏ដូចជាកម្លាំងសមត្ថកិច្ច រឹតតែប្រឹងប្រែងបំពេញការងារបន្ថែមទៀត។ ផ្ទុយទៅវិញ រដ្ឋមន្ត្រីក្រសួងមហាផ្ទៃរូបនេះ យល់ថា ភាពអសកម្មក្នុងការបង្ក្រាបគ្រឿងញៀន នឹងកើតមានឡើង ប្រសិនបើគ្មានការលើកទឹកចិត្ត ឬក៏ការលើកទឹកចិត្ត មិនសមនឹងការប្រឹងប្រែង។
សម្តេច ស ខេង និយាយដូច្នេះថា៖«បើកាលណាគេ ខំដែរ ប៉ុន្តែយើងមិនបានលើទឹកចិត្តគេ ឬក៏លើកទឹកចិត្តដែរ តែមិនត្រូវ ឬមិនអស់ គឺអត់ល្អ។ [ថវិកា ដែលទុកសម្រាប់លើកទឹកចិត្តហ្នឹង] គឺជិត ១លានដុល្លារ»។
ការលើកឡើងរបស់សម្តេច ស ខេង គឺធ្វើឡើងក្រោយចាកចេញពីកិច្ចប្រជុំនៅក្រសួងមហាផ្ទៃ នាថ្ងៃទី១៣ ខែកក្កដា ឆ្នាំ២0១៧នេះ។ ការបើកកិច្ចប្រជុំនេះ គឺដើម្បីពិភាក្សាគ្នា ក្នុងការត្រៀមរៀបចំសន្និបាតនាពេលខាងមុខ ជុំវិញការបូកសរុបលទ្ធផលនៃការប្រយុទ្ធប្រឆាំងគ្រឿងញៀន សម្រាប់ពាក់កណ្តាលឆ្នាំ២0១៧៕
© រក្សាសិទ្ធិដោយ thmeythmey.com