ជាតិ
អគ្គនាយកអប្សរា៖ កុំយកបេតិកភណ្ឌមកលាយឡំនយោបាយ «លោក ស៊ុ ម៉ាប់ អគ្គនាយកអាជ្ញាធរជាតិអប្សរា ក្នុងសន្និសីទកាសែតនៅថ្ងៃទី១២ កក្កដា ឆ្នាំ២០១៧។ រូបថត៖ អ៊ីសា រ៉ហានី
× សៀមរាប៖ អគ្គនាយកអាជ្ញាធរជាតិអប្សរា បានហៅសំណង់ខុសច្បាប់នៅតំបន់អង្គរ ថាមានលក្ខណៈនយោបាយ។ ការមើលឃើញបែបនេះរបស់លោក ស៊ុំ ម៉ាប់ ព្រោះកន្លងមក មានសារនយោបាយពីអ្នកនយោបាយខ្លះ ដែលមានបំណងមិនល្អមកលើស្ថាប័នអភរិរក្ស សម្បតិ្តបេតិកភណ្ឌ ហើយអ្នកទាំងនោះ ជាអ្នកគាំទ្រឲ្យមានសំណង់ខុសច្បាប់ក្នុងតំបន់ការពាផងដែរ។
«ហើយអ្វីដែលខ្ញុំបានលើកមុននេះ ថាសំណង់មួយចំនួន វាមានលក្ខណៈពាក់ព័ន្ធនឹងនយោបាយ វាមាន ហើយក៏មិនមែនមាននៅអាណត្តិនេះដែរ គឺមានតាំងពីមុន។ អស់លោក លោកស្រី ធ្លាប់ឮគេឃោសនាទេ «បើខ្ញុំឈ្នះ (បោះឆ្នោត) ខ្ញុំលុបអាជ្ញាធរជាតិអប្សរាចោល» អាហ្នឹងខ្ញុំឮផ្ទាល់នឹងត្រចៀក។ ហើយថ្មីៗនេះសោត អ្នកខ្លះនិយាយថា សង់ទៅ បើគេឈ្នះ គេជួយការពារ»។ នេះជាការលើកឡើងរបស់លោក ស៊ុំ ម៉ាប់ នៅក្នុងសន្និសីទ ជុំវិញវិធានការរុះរើសំណង់ខុសច្បាប់នៅតំបន់អង្គរ នៅព្រឹកថ្ងៃទី១២ កក្កដា នៅស្នាក់ការអាជ្ញាធរជាតិអប្សរា។
យ៉ាងណា លោក ស៊ុំ ម៉ាប់ ថាលោកមិនចង់និយាយរឿងនេះច្រើនប៉ុន្មានទេ ព្រោះគ្មានផលចំណេញត្រឡប់មកវិញ តែអ្វីដែលត្រូវធ្វើនៅពេលនេះ គឺត្រូវរួមគ្នាគិតថា ធ្វើយ៉ាងណាបន្តការពារសម្បត្តិបេតិកភណ្ឌ និងគិតធ្វើបែបណា យកសំណង់ខុសច្បាប់ទាំងអស់ ចេញពីតំបន់អង្គរឲ្យបានឆាប់បំផុត។ លោកបន្ថែមថា៖« ឥឡូវសំណង់នៅមុខនេះហើយ សូមរួមគ្នាគិតធ្វើម៉េច យកសំណង់នោះចេញ ជាជាងគិតទៅលើនយោបាយ ជាជាងកេងចំណេញប្រជាប្រិយដោយយកបេតិកភណ្ឌ ជាត្រីមុខ»។
លោកអគ្គនាយកអាជ្ញាធរជាតិអប្សរា បន្ថែមទៀតថា ជំហរក្នុងការការពារ និងអភិរក្ស ជាជំហររបស់រាជរដ្ឋាភិបាល ហើយគ្មានហេតុផលណាមួយ ដែលស្ថាប័នពាក់ព័ន្ធទទួលភារកិច្ចពីរាជរដ្ឋាភិបាល ជាអ្នកញុះញង់ឲ្យសាងសង់សំណង់ក្នុងតំបន់អង្គរនោះទេ៕
សូមស្តាប់សំឡេងលោក ស៊ុំ ម៉ាប់
Tag:
ស៊ុំ ម៉ាប់
សំណង់ខុសច្បាប់
បេតិកភណ្ឌ
© រក្សាសិទ្ធិដោយ thmeythmey.com