កីឡាជាតិ
ជាតិ
AFF U15៖ ក្រោយឈ្នះហ្វីលីពីន U15កម្ពុជាបន្តឈ្នះទីម័រខាងកើតក្នុងលទ្ធផល ១-០
× ក្រុមកីឡាបាល់ទាត់ជម្រើសជាតិអាយុក្រោម១៥ឆ្នាំកម្ពុជា បានយកឈ្នះក្រុមទីម័រខាងកើត ក្នុងលទ្ធផល ១-០ នាជំនួបលើកទីបីក្នុងពូល B នៃព្រឹត្តិការណ៍ AFF U15 Championship នៅខេត្តឈុនបុរី ប្រទេសថៃ រសៀលថ្ងៃសុក្រ ទី១៤ ខែកក្កដា នេះ។ កីឡាករ សៀង ចន្ធា ក្លាយជាកីឡាករដែលអាចរកគ្រាប់បាល់គ្រប់ការប្រកួតសម្រាប់ U15 កម្ពុជា។
សម្រាប់ការប្រកួតវគ្គទី១ U15 កម្ពុជា បានធ្វើការវាយសម្រុក នឹងបង្កើតឱកាសជាច្រើនទៅលើក្រុមទីម័រខាងកើតតែធ្វើមិនបានសម្រេច។ ក្នុងវគ្គទី១នេះ U15 កម្ពុជាហាក់គ្រប់គ្រងបាល់បានច្រើនជាងក្រុមទីម័រខាងកើត។ តែយ៉ាងណា ក្នុងជំនួបដ៏ស្វិតស្វាញក្នុងវគ្គនេះ ក្រុមទាំងពីរបានរក្សាលទ្ធផលស្មើ ០-០ រហូតចប់វគ្គទី១។
ការប្រកួតដំណើរការមិនបានប៉ុន្មានផងកីឡាករ សៀង ចន្ធា បានរកគ្រាប់បាល់នាំមុខ ១-០ ឲ្យ U15 កម្ពុជានៅដើមវគ្គទី២។ មួយគ្រាប់របស់ ចន្ធា ក៏ជាគ្រាប់បាល់ជ័យជម្នះ ១-០ របស់ U15 កម្ពុជាលើក្រុមទីម័រខាងកើតផងដែរ។
កីឡាករ សៀង ចន្ធា អាចរកគ្រាប់បាល់គ្រប់ការប្រកួតសម្រាប់ U15 កម្ពុជា ក្នុងនោះរកបាន១គ្រាប់ក្នុងជំនួបចាញ់វៀតណាម ២-១ និងរកបាន៣គ្រាប់ក្នុងជ័យជម្នះ ៤-០ លើក្រុម U15 ហ្វីលីពីន។ នៅថ្ងៃអាទិត្យ ទី១៦ ខែកក្កដា កម្ពុជា ត្រូវជួបជាមួយព្រុយណេ បន្ទាប់ពីហ្វីលីពីន ប៉ះទីម័រខាងកើត ម៉ាឡេស៊ី ជួប វៀតណាម។
នៅក្នុងពូល A ម្ចាស់ផ្ទះថៃ ឈ្នះទាំង៣ប្រកួតកន្លងមក ដោយមាន៩ពិន្ទុ មីយ៉ាន់ម៉ាឈរលេខ២បណ្តោះអាសន្ន ដោយមាន៧ពិន្ទុ ហើយអូស្ត្រាលី ប្រដេញតាមពីក្រោយដោយមាន៦ពិន្ទុ។ ឡាវមាន៣ពិន្ទុ ឥណ្ឌូណេស៊ី មាន១ពិន្ទុ ខណៈសិង្ហបុរី ចាញ់ការប្រកួតទាំង៣លើកកន្លងមក៕
Tag:
AFF U15 Championship 2017
U15 កម្ពុជា
© រក្សាសិទ្ធិដោយ thmeythmey.com