ជាតិ
អគ្គនាយកអប្សរាថាមានអ្នកចាំញុះញង់ឲ្យពលរដ្ឋស្អប់ស្ថាប័នខ្លួន
× សៀមរាប៖ កន្លងមក មានពលរដ្ឋមិនតិចទេ ដែលរស់នៅតំបន់អង្គរ និយាយមិនល្អពីអប្សរា ឬនិយាយឲ្យស្រួលស្តាប់ ស្អប់ស្ថាប័នមួយនេះ។ ទំនងមកពី ការរិតបន្តឹងច្បាប់សាងសង់ផ្ទះ សម្បែងក្នុងតំបន់ត្រូវការពារ ទើបធ្វើឲ្យពលរដ្ឋខ្លះ ដែលអាជ្ញាធរហាមមិនឲ្យសាងសង់សំណង់ ផ្សេងៗ មិនពេញចិត្ត កើតចិត្តស្អប់ស្ថាប័នអភិរក្សបេតិកភណ្ឌមួយនេះ។ អគ្គនាយកអាជ្ញាធរ ជាតិអប្សរា បានពន្យល់ពីហេតុផលខ្លះៗជុំវិញអ្វីដែលអប្សរា ហាមមិនឲ្យសាងសង់ផ្ទះថ្មីនៅ តំបន់១ និងតំបន់២ ដែលត្រូវការការពារជាចាំបាច់។ ក្នុងនោះលោក ក៏ស្នើសុំឲ្យពលរដ្ឋទាំង អស់ យល់ពីអប្សរា និងឈប់ស្អប់ស្ថាប័ននេះតទៅទៀត។
លោក ស៊ុំ ម៉ាប់ បានលើកឡើងថា ការស្អប់កើតចេញពីមជ្ឈដ្ឋានខ្លះ ដែលពួកគេខិតខំបំពុល ស្ថានការណ៍ បំណងលាបពណ៌ឲ្យពលរដ្ឋកើតចិត្តស្អប់អាជ្ញាធរអប្សរា ដើម្បីបម្រើផល ប្រយោជន៍ផ្ទាល់ខ្លួន។ លោកបន្តថា៖«...ដែលខ្ញុំមើល ទំហំនៃការស្អប់មួយចំនួន ពីមជ្ឈដ្ឋាន មួយចំនួនតែប៉ុណ្ណោះ ដែលមជ្ឈដ្ឋានទាំងនោះ ខិតខំបំពុលបរិយាកាស លាបពណ៌ ធ្វើម៉េចឲ្យ គេស្អប់ស្ថាប័ននេះ ដើម្បីប្រយោជន៍បុគ្គល ឬក្រុមតែប៉ុណ្ណោះ។ ហេតុអីខ្ញុំនិយាយថាបុគ្គល ឬក្រុម ដោយសារអ្នកលាបពណ៌ទាំងអស់នោះចង់សង់គេមិនឲ្យសង់ខឹងគេទីមួយ តែមួយគត់ គឺការសាងសង់សំណង់ផ្សេងៗនៅក្នុងតំបន់ រហូតបំពុលរហូតដល់បច្ចុប្បន្នក៏នៅបំពុល ជាពិសេសតាមវិទ្យុ គាត់ធ្លាប់និយាយថាយើងចង់សង់ទ្រុងមាន់ទ្រុងជ្រូកមិនបាន គាត់នៅតែ ប្រើ ដើម្បីបំពុលតែម្តង...»។
តាមលោក ស៊ុំ ម៉ាប់ ដដែល លោកមើលឃើញថា នៅមានមជ្ឈដ្ឋានខ្លះបន្តគិតអាក្រក់ ដោយមាននិន្នាការ «លាបពណ៌ ដុតឲ្យខ្លោង រោលឲ្យឆៅ» ចំពោះស្ថាប័នអាជ្ញាធរជាតិអប្សរា។ លោកបន្ថែមថា ខ្លះមិនទាំងយល់ពីអាជ្ញាធរជាតិអប្សរាផង តែខំបំប៉ងនិយាយមិនល្អពីស្ថាប័ន រដ្ឋទទួលបន្ទុកការងារអភិរក្សបេតិកភណ្ឌមួយនេះ ដូចជាករណីរឿងបុរីសណ្ឋាគារ និងទេសចរណ៍ជាដើម។ លោកបញ្ជាក់ថា ដីក្នុងបុរីនេះ គឺស្ថិតក្រៅតំបន់ ដោយអាចអនុញ្ញាត សាងសង់អាគាររដ្ឋបាលរដ្ឋបាន និងគោរពទៅតាមរចនាបថរបស់ខ្មែរ៕
សូមស្តាប់សំឡេងទាំងស្រុងរបស់លោក ស៊ុំ ម៉ាប់
Tag:
ស៊ុំ ម៉ាប់
អាជ្ញាធរអប្សរា
© រក្សាសិទ្ធិដោយ thmeythmey.com