ពីនេះ ពីនោះ
តើហេតុអ្វីបានជាជនបរទេសហៅឈ្មោះផ្សារ ទួលទំពូង ថា ជាផ្សារ រុស្ស៊ី ឬផ្សារសូវៀត?
× ពលរដ្ឋខ្មែរជាទូទៅស្គាល់តែឈ្មោះផ្សារ ទួលទំពូង។ បើហៅថា ផ្សាររុស្ស៊ី ឬផ្សារសូវៀត គ្មាននរណាស្គាល់ទេ។ តែសម្រាប់ពលរដ្ឋខ្មែរដែលធ្លាប់ធ្វើការជាមួយបរទេស ឬចេះភាសាបរទេស ពួកគេអាចស្គាល់ឈ្មោះផ្សារ ទួលទំពូងផង និងផ្សារ រស្ស៊ី ផង។ ប្រវត្តិនៃពាក្យ ផ្សារ រុស្ស៊ី គឺបានកើតឡើងនៅទសវត្សរ៍ឆ្នាំ៨០ដែលកាលនោះ នយោបាយការទូត រុស្ស៊ី មានទំនាក់ទំនងល្អជាមួយប្រទេសកម្ពុជា និងប្រទេសវៀតណាមណាស់។
ដោយសារតែទំនាក់ទំនងការទូតល្អ ជនជាតិ រស្ស៊ី ក៏មានវត្តមានច្រើនគួរសមនៅក្នុងទីក្រុងភ្នំពេញ ទាំងអ្នកទេសចរ និងអ្នកការទូតរុស្ស៊ី។ ក្នុងអំឡុងពេលនោះ ជនជាតិ រុស្ស៊ី បាននាំគ្នាមកទិញអ៊ីវ៉ាន់ភាគច្រើននៅក្នុងផ្សារ ទួលទំពូង។ វត្តមានច្រើននៃជនជាតិ រស្ស៊ី មកផ្សារទួលទំពូងនេះហើយទើបទាំងជនជាតិខ្មែរខ្លះ ជនជាតិរុស្ស៊ី និងបរទេសដទៃទៀតនាំគ្នាហៅផ្សារ ទួលទំពូង ថា ជាផ្សារ រុស្ស៊ី ឬផ្សារសូវៀត។ តំណក្រោយមកឈ្មោះនេះ ក៏ត្រូវបានបរទេស និងខ្មែរខ្លះ ហៅមកទល់នឹងសព្វថ្ងៃនេះតែម្តង។
ពួកបរទេសហៅជាភាសាអង់គ្លេសថា Russian Market។ ប្រសិនបើលោកអ្នកសួរទៅកាន់បរទេសថា លោកអ្នកទៅផ្សារ ទួលទំពូង មែនទេ? ជនបរទេសនោះអាចអត់ស្គាល់ផ្សារមួយណា។ តែបើសួរថា Do you go to Russian Market? បរទេសទាំងអស់យល់បាន។
ឈ្មោះជារឿងមួយ។ តែអ្វីដែលផ្សារ រុស្ស៊ី ឬផ្សារ ទួលទំពូង ល្បីឈ្មោះនោះ គឺផ្សារនេះមានលក់អាហារឆ្ងាញ់ និងសម្លៀកបំពាក់រោងចក្រគុណភាពល្អ និងតម្លៃថោក៕
© រក្សាសិទ្ធិដោយ thmeythmey.com