ជាតិ
ក្រុមអ្នកជិះកង់បន្ទាយមានជ័យរៀបចំកម្មវិធីជិះកង់មនុស្សធម៌រកថវិកាជួយពេទ្យកុមារអង្គរ
× ក្រុមអ្នកជិះកង់ខេត្តបន្ទាយមានជ័យ គឺបង្កើតឡើងដោយអ្នកចូលចិត្តជិះកង់ និងក្នុងបំណងស្វែងរកថវិកាមនុស្សធម៌ ដើម្បីរួមចំណែកជួយសង្គម។ ក្រុមអ្នកជិះកង់មួយនេះ នឹងរៀបចំកម្មវិធីជិះកង់មួយនៅចុងខែកក្កដានេះ ដើម្បីរៃអង្គាសថវិកាជួយដល់មន្ទីរពេទ្យកុមារអង្គរ ដែលបាននិងកំពុងព្យាបាលកុមារកម្ពុជា ដោយមិនយកកំរៃ។
ប្រធានក្រុមអ្នកជិះកង់ខេត្តបន្ទាយមានជ័យ លោក ប្រុស ពៅ បានប្រាប់សារព័ត៌មានថ្មីៗថា កម្មវិធីជិះកង់រៃអង្គាសថវិកាជួយពេទ្យកុមារអង្គរ គ្រោងរៀបចំនៅថ្ងៃទី២៩ កក្កដា នៅទីរួមក្រុងស្វាយស៊ីសុផុន។ លោកបន្ថែមថា រហូតមកដល់ថ្ងៃនេះ អ្នកចុះឈ្មោះចូលរួមបានប្រមាណ ៤០០នាក់ហើយ។
លក្ខខណ្ឌនៃការចូលរួមជិះកង់រៃអង្គាសថវិកាជួយពេទ្យកុមារអង្គរ ឬហៅថា ពេទ្យបេះដូង គឺអ្នកចូលរួមត្រូវបង់ថវិកាចំនួន ១៥ដុល្លារ ហើយពួកគេនឹងទទួលបានអាវ កង់ អាហារ រួមនិងភេសជ្ជៈអំឡុងពេលជិះនោះផងដែរ។ នេះបើតាមការបញ្ជាក់ពីលោក ប្រុស ពៅ។ លោកបន្តថា ទីតាំងជិះកង់ គឺចាប់ផ្តើមនៅផ្សារថ្មី ដោយធ្វើដំណើរជុំវិញក្រុងស្វាយស៊ីសុផុន ចាប់ពីម៉ោង ៨ព្រឹក ដល់ម៉ោង១១ព្រឹក។
គួររម្លឹកថា នេះជាឆ្នាំទីបីហើយ ដែលក្រុមអ្នកជិះកង់ខេត្តបន្ទាយមានជ័យ បង្កើតកម្មវិធីជិះកង់មនុស្សធម៌ រៃអង្គាសថវិកាដើម្បីជួយមន្ទីរពេទ្យ ដែលកំពុងព្យាបាលជំងឺកុមារដោយមិនគិតថ្លៃ។ ឆ្នាំទីមួយ និងទីពីរ ក្រុមអ្នកជិះកង់ខេត្តបន្ទាយមានជ័យ បានបង្កើតកម្មវិធីដូចគ្នានេះ សម្រាប់ជួយពេទ្យគន្ធបុប្ផាខេត្តសៀមរាប ដោយឆ្នាំទីមួយ ប្រមូលថវិកាបានជាង៥០០០ដុល្លារ និងឆ្នាំទីពីរ បានជិត ៦០០០ដុល្លារ។ នៅឆ្នាំទីបីនេះ អ្នករៀបចំកម្មវិធីលោក ប្រុស ពៅ រំពឹងថា នឹងអាចរកថវិកាប្រមាណ ៦០០០ដុល្លារ ពីកម្មវិធីមនុស្សធម៌មួយនេះ ហើយថវិកា១០០% ដែលបានពីកម្មវិធីនេះ នឹងផ្តល់ជូនដល់មន្ទីរពេទ្យ៕
Tag:
ប្រុសពៅ
ជិះកង់មនុស្សធម៌
© រក្សាសិទ្ធិដោយ thmeythmey.com