ជាតិ
ព្រឹទ្ធសភា យល់ស្របទាំងស្រុង លើច្បាប់ដែលហាមគណបក្ស មិនឲ្យពាក់ព័ន្ធនឹងអ្នកទោស សម្តេច សាយ ឈុំ ប្រធានព្រឹទ្ធសភា ដឹកនាំកិច្ចប្រជុំពេញអង្គព្រឹទ្ធសភា ដើម្បីអនុម័តសេចក្តីស្នើសុំធ្វើវិសោធនកម្មលើច្បាប់ស្តីពីគណបក្សនយោបាយ នៅព្រឹកថ្ងៃទី១៨ ខែកក្កដា ឆ្នាំ២០១៧។ រូបភាពពីហ្វេសបុកព្រឹទ្ធសភា
× ភ្នំពេញ៖ ព្រឹទ្ធសភា បានបើកកិច្ចប្រជុំពេញអង្គ នៅព្រឹកថ្ងៃទី១៨ ខែកក្កដា ឆ្នាំ២0១៧នេះ ដើម្បីពិនិត្យនិងផ្តល់យោបល់លើសេចក្តីស្នើសុំធ្វើវិសោធនកម្មច្បាប់ស្តីពីគណបក្សនយោបាយ។ ក្រោយបញ្ចប់កិច្ចប្រជុំ ព្រឹទ្ធសភា ក៏សម្រេចអនុម័តលើសេចក្តីស្នើខាងលើទាំងស្រុង ដោយមិនកែប្រែឬជំទាស់អ្វីឡើយ។
ជានីតិវិធី ក្រោយពិនិត្យនិងអនុម័តរួច ព្រឹទ្ធសភា ត្រូវបញ្ចូនសេចក្តីស្នើច្បាប់ខាងលើ ទៅឲ្យរដ្ឋសភាវិញ។ នេះបើតាមលោក ឡេង ប៉េងឡុង អគ្គលេខាធិការនិងជាអ្នកនាំពាក្យរដ្ឋសភា ដែលធ្លាប់ពន្យល់ កន្លងមក។
លោក ឡេង ប៉េងឡុង ធ្លាប់និយាយថា ក្រោយមកទៀត រដ្ឋសភា នឹងបញ្ចូនសេចក្តីស្នើច្បាប់នេះ ទៅកាន់ក្រុមប្រឹក្សាធម្មនុញ្ញ ដើម្បីពិនិត្យបន្ត។ លោក បន្ថែមថា បើពិនិត្យចប់សព្វគ្រប់ ដោយមិនជំទាស់នោះទេ ក្រុមប្រឹក្សាធម្មនុញ្ញ ត្រូវបញ្ជូនសេចក្តីស្នើច្បាប់ ទៅកាន់រដ្ឋសភាវិញ។ លោកបញ្ចាក់ថា ចុងក្រោយរដ្ឋសភា នឹងបញ្ជូនសេចក្តីស្នើច្បាប់ ទៅកាន់រដ្ឋាភិបាល ហើយរដ្ឋាភិបាល នឹងបន្តថ្វាយទៅព្រះមហាក្សត្រ ដើម្បីឡាយព្រះហត្ថលេខា ប្រកាសឲ្យប្រើប្រាស់។
ផ្អែកលើខ្លឹមសារថ្មី ដែលត្រូវបានបញ្ចូលទៅក្នុងច្បាប់ស្តីពីគណបក្សនយោបាយ គណបក្សណាក៏ដោយ មិនអាចពាក់ព័ន្ធនឹងអ្នកទោស ដើម្បីបានផលប្រយោជន៍ផ្នែកនយោបាយ ឡើយ។ ទង្វើ ដែលខ្លឹសារថ្មី បានកំណត់និងហាមប្រាមមិនឲ្យគណបក្ស ប្រព្រឹត្ត ដើម្បីបានប្រយោជន៍ផ្នែកនយោបាយ មានដូចជា ការប្រើប្រាស់នូវរូបថត សារជាសំឡេង វីដេអូ និងអត្ថបទជាលាយលក្ខណ៍អក្សរ របស់បុគ្គលណាម្នាក់ ដែលត្រូវបានតុលាការកាត់ក្តី ឲ្យក្លាយជាអ្នកទោស។ លើសពីនេះ ខ្លឹមសារថ្មី ក៏មិនឲ្យគណបក្ស បង្ហាញការគាំទ្រចំពោះសកម្មភាពរបស់បុគ្គលណាម្នាក់ ដែលមានឈ្មោះជាអ្នកទោស ដែរ។ យោងតាមខ្លឹមសារថ្មី ប្រសិនបើ គណបក្សណាមួយ បានប្រព្រឹត្តនូវទង្វើខាងលើ តុលាការ អាចមានសិទ្ធិអំណាច ដើម្បីរំលាយគណបក្សនោះបាន។
នេះ ជាលើកទីពីរហើយ ដែលច្បាប់ស្តីពីគណបក្សនយោបាយ ត្រូវបានធ្វើវិសោធនកម្ម ក្នុងឆ្នាំ២0១៧។ ការធ្វើវិសោធកម្មលើកទីមួយ បានកំណត់ថា អ្នកទោស មិនអាចធ្វើជាប្រធានគណបក្ស ឬក៏ធ្វើជាសមាជិកគណៈកម្មាធិការនាយកនៃគណបក្សណាមួយឡើយ៕
Tag:
ច្បាប់នយោបាយ
ព្រឹទ្ធសភា
អនុម័ត
© រក្សាសិទ្ធិដោយ thmeythmey.com