ជាតិ
រដ្ឋមន្ត្រីក្រសួងព័ត៌មានឲ្យតាមមន្ទីររៀនធ្វើទូរទស្សន៍អនឡាញដើម្បីប្រកួតប្រជែងផ្នែកព័ត៌មាន «លោក ខៀវ កាញារីទ្ធ ក្នុងពិធីសំណេះសំណាលជាមួយមន្រ្តីនៃមន្ទីរព័ត៌មានខេត្តសៀមរាប។ រូបថត៖ អ៊ីសា រ៉ហានី
× សៀមរាប៖ រដ្ឋមន្ត្រីក្រសួងព័តមាន មានសុទិដ្ឋិនិយមខ្ពស់ ចំពោះគម្រោងរៀបចំឲ្យមានទូរទស្សន៍អនឡាញ នៅតាមបណ្តាមន្ទីរព័ត៌មានខេត្ត-ក្រុង។ លោកបញ្ជាក់ថា គោលបំណងសំខាន់នៃគម្រោងទូរទស្សន៍អនឡាញនេះ គឺដើម្បីជាការប្រកួតប្រជែងផ្នែកព័តមានផង និងជាការបង្កើតចំណូលបន្ថែមដល់បណ្តាមន្ទីរព័ត៌មានទាំងនោះផង។
រដ្ឋមន្ត្រីក្រសួងព័ត៌មាន លោក ខៀវ កាញារីទ្ធ ថ្លែងថា វាជារឿងដ៏សំខាន់ ដែលគេត្រូវជ្រើសរើសយកជម្រើសណាមួយ ដែលមហាជនគាំទ្រ និងងាយស្រួលក្នុងការទស្សនា។ ត្រង់ចំណុចនេះ លោកចង់សំដៅដល់ការបង្កើតទូរទស្សន៍អនឡាញតាមបណ្តាមន្ទីរព័ត៌មាន និងការចាក់ផ្សាយនៅតាមទូរទស្សន៍ខ្សែកាប ដែលជាជម្រើសដ៏ល្អសម្រាប់ប្រជាជនរស់នៅក្នុងទីក្រុង។
តាមលោករដ្ឋមន្ត្រី ការរៀបចំគម្រោងនេះឡើង គឺក្នុងបំណងសំខាន់ ទីមួយ កាត់បន្ថយចំណាយ (ដោយមិនបាច់ចាំមានស្ទូឌីយូ, និងដំឡើងអង់តែនជាដើម) ទីពីរ ជាការសាកល្បងការរៀនសូត្រ និងទីបី ដើម្បីបង្កើតចំណូលបន្ថែមដល់មន្ទីរព័ត៌មានមួយៗ។ ក្នុងដំណាក់កាលនេះ តាមលោករដ្ឋមន្ត្រី ការផ្សាយនឹងចាប់ផ្តើមពីការផ្សាយតាមអនឡាញ និងជួលម៉ោងចាក់ផ្សាយតាមទូរទស្សន៍ខ្សែកាប ដែលក្នុងមួយថ្ងៃ ចាប់ពី៤ទៅ៥ម៉ោងសិន។
យ៉ាងណា ក្នុងពិធីសំណេះសំណាលជាមួយមន្ត្រីនៃមន្ទីរព័ត៌មានខេត្តសៀមរាប នៅព្រឹកថ្ងៃទី១៨ កក្កដានេះ លោក ខៀវ កាញារីទ្ធ បញ្ជាក់ថា ការរៀបចំនេះអាចជោគជ័យទៅបាន គឺអាស្រ័យលើឆន្ទៈ និងការច្នៃប្រឌិតរបស់ប្រធានមន្ទីរមួយៗ។ តាមរដ្ឋមន្ត្រី គម្រោងនេះបាននិងកំពុងដំណើរការដោយជោគជ័យនៅតាមខេត្តមួយចំនួន រួមមាន ខេត្តកំពង់ចាម កំពង់ធំ ព្រៃវែង និងខេត្តក្រចេះ៕
Tag:
ខៀវ កាញារីទ្ធ
ក្រសួងព័ត៌មាន
© រក្សាសិទ្ធិដោយ thmeythmey.com