អន្តរជាតិ
អាមេរិកជំទាស់គំនិតរបស់កូរ៉េខាងត្បូងដែលចង់ចរចាជាមួយកូរ៉េខាងជើង
× អាមេរិក បង្ហាញជំហរជំទាស់បំណងកូរ៉េខាងត្បូងដែលចង់ចរចាផ្នែកយោធា និងកាកបាទក្រហមជាមួយកូរ៉េខាងជើង។ អាមេរិក យល់ឃើញថា ស្ថានការណ៍សព្វថ្ងៃនេះមិនអំណោយផលដល់ការចរចាណាមួយជាមួយរដ្ឋក្បាលរឹងមួយនេះឡើយ។ កូរ៉េខាងត្បូង បានដាក់សំណើចរចាក៏កម្រចំនួនពីរទៅកាន់កូរ៉េខាងជើងនៅថ្ងៃទី១៧ ខែកក្កដា ហើយពេលនេះកំពុងរង់ចាំចម្លើយពីកូរ៉េខាងជើង។
រដ្ឋាភិបាលប្រធានាធិបតីកូរ៉េខាងត្បូង មូន ចេអ៊ីន បានដាក់សំណើពីរទៅកាន់កូរ៉េខាងជើងដើម្បីជួបចរចាលើផ្នែកយោធា និងកាកបាទក្រហម។ កូរ៉េខាងត្បូងចង់ជួបចរចាយោធានៅថ្ងៃទី២១ ខែកក្កដា និងជំនួបរវាងស្ថាប័នមនុស្សធម៌នៅថ្ងៃទី១ ខែសីហា។ គេនៅមិនទាន់ឃើញមានការឆ្លើយតបណាមួយរបស់កូរ៉េខាងជើងនៅឡើយទេ ប៉ុន្តែគេឃើញមានការជំទាស់ពីអាមេរិកដែលប្រកាន់ជំហរតឹងតែងដាក់កូរ៉េខាងជើងទៅវិញ។
ក្រុងវ៉ាស៊ីនតោន បានប្រកាសហើយថាការអត់ធ្មត់របស់ខ្លួនបានអស់ទៅហើយ ព្រោះកូរ៉េខាងជើងនៅតែបន្តផ្គើនអន្តរជាតិ និងចេះតែសាកល្បងមីស៊ីលមិនឈប់ឈរ។ រដ្ឋបាលអាមេរិករបស់ប្រធានាធិបតី ដូណាល់ ត្រាំ ក៏ធ្លាប់គំរាមប្រើកម្លាំងបាយបង្ខំឲ្យកូរ៉េខាងជើងផ្អាកកម្មវិធីនុយក្លេអ៊ែរ។ ជំហររបស់លោក ត្រាំ គឺផ្ទុយគ្នាពីជំហររបស់លោក មូន ទោះជាអ្នកទាំងពីរចង់បញ្ចប់បញ្ហានេះដូចគ្នា។ ផ្ទុយគ្នាត្រង់ លោក មូន ប្រកាន់ជំហរត្រជាក់ ជ្រើសរើសផ្លូវចរចាសន្តិភាពដើម្បីដោះស្រាយវិបត្តិនៅឧបទ្វីបកូរ៉េ។
ខណៈដែលស្ថានការណ៍នៅឧបទ្វីបកូរ៉េនៅតែតានតឹងព្រោះកូរ៉េខាងជើងទើបសាកល្បងមីស៊ីលរំលងទ្វីប អាមេរិកមិនសូវសប្បាយចិត្តនឹងសំណើរបស់កូរ៉េខាងត្បូងឡើយ ហើយអាមេរិកក៏ហាក់ដូចជាមិនបានដឹងពីរឿងចរចានេះឡើយ។ ក្នុងសន្និសីទកាសែតថ្ងៃទី១៧ ខែកក្កដា រដ្ឋមន្ត្រីព័ត៌មានអាមេរិក Sean Spicer ក៏បញ្ជាក់ដែរថា អាមេរិកមិនបានដាក់លក្ខខណ្ឌអ្វីឡើយលើការចរចានេះ ហើយលោកបានឲ្យទៅសួរកូរ៉េខាងត្បូងវិញ ព្រោះកូរ៉េខាងត្បូងជាអ្នកស្នើចរចា។
ការចរចាឡើងវិញជាមួយកូរ៉េខាងជើង គឺជាជំហររបស់រដ្ឋាភិបាលកូរ៉េខាងត្បូងថ្មី ទោះជាលោក មូន ចេអ៊ីន នៅតែប្រកាន់ជំហរបន្តដាក់ទណ្ឌកម្មក្ដី។ លោក មូន ចេអ៊ីន ដែលជាប្រធានាធិបតីមាននិន្នាការសេរីនិយម ក៏ធ្លាប់ប្រកាសថាលោកអាចទៅកាន់ក្រុងព្យុងយ៉ាងដើម្បីចរចា ក្នុងករណីចាំបាច់ទៀតផង។ យ៉ាងណាក្ដី បញ្ហាដែលមិនគួរមើលរំលង គឺជំហររបស់អាមេរិកដែលមានទ័ពច្រើនម៉ឺននាក់នៅកូរ៉េខាងត្បូង។
ក្នុងការដោះស្រាយបញ្ហានុយក្លេអ៊ែរកូរ៉េខាងជើងនោះ អាមេរិកដាក់ការយកចិត្តទុកដាក់ខ្លាំងលើកិច្ចសហប្រតិបត្តិការជាមួយចិន ទាំងការដាក់សម្ពាធបន្ថែម និងទាំងការដាក់ទណ្ឌកម្មលើកូរ៉េខាងជើង។ ក្រោយការសាកល្បងមីស៊ីលថ្ងៃទី៤ ខែកក្កដា អាមេរិក និងចិនកំពុងរៀបចំទណ្ឌកម្មថ្មី ដែលលើកនេះសំដៅលើក្រុមហ៊ុនបរទេសរកស៊ីជាមួយកូរ៉េខាងជើង។ ប៉ុន្តែចិនក៏ព្រួយបារម្ភដែរ ព្រោះក្រុមហ៊ុនរបស់ខ្លួនច្រើននៅបន្តរកស៊ីជាមួយកូរ៉េខាងជើងក្នុងក្របខណ្ឌទំនាក់ទំនងទ្វេភាគី៕
Tag:
អាមេរិក
កូរ៉េខាងត្បូង
កូរ៉េខាងជើង
© រក្សាសិទ្ធិដោយ thmeythmey.com