អន្តរជាតិ
រដ្ឋមន្ត្រីការបរទេស៖សិង្ហបុរីតូចមែនតែមិនឲ្យគេសំឡុត គំរាម ឬដាក់ជាសាមន្តរដ្ឋឡើយ...
× រដ្ឋមន្ត្រីការបរទេសសិង្ហបុរីលោក Vivian Balakrisnan បានលើកឡើងក្នុងជំនួបជាមួយមន្ត្រីការថារដ្ឋតូចៗដូចជាសិង្ហបុរីត្រូវមានគោលនយោបាយដែលអាចធានាបាននូវទំនាក់ទំនងល្អជាមួយប្រទេសទាំងអស់ ដោយអាចរក្សាបាននូវឯករាជភាព និងអធិបតេយភាពរបស់ខ្លួនផងដែរ ។ ដើម្បីសម្រេចបែបនេះ គោលនយោបាយការបរទេសសិង្ហបុរីប្រកាន់ខ្ជាប់ខ្ជួននូវគោលការណ៍ស្នូលមួយចំនួនដូចជា ត្រូវមានសេដ្ឋកិច្ចខ្លាំង, មានឯកភាពជាតិ,រក្សាស្ថិរភាពនយោបាយ, ធ្វើជាមិត្តជាមួយប្រទេសទាំងអស់ តែមិនលះបង់ប្រយោជន៍ជាតិ,មិនអនុញ្ញាតឲ្យគេទិញ សំឡុតគំរាម ឬធ្វើជាចំណុះឲ្យគេ និងចុងក្រោយត្រូវយល់ច្បាស់លាស់ក្នុងការរក្សាប្រយោជន៍រយៈពេលវែង។
ក្នុងជំនួបជាមួយមន្ត្រីក្រសួងការបរទេសថ្ងៃចន្ទ រដ្ឋមន្ត្រីការបរទេសសិង្ហបុរីលោក Vivian Balakrisnan បានរំលឹកមន្ត្រីរដ្ឋការស្ថាប័នខ្លួនថា សិង្ហបុរីមានស្ថិរភាពនិងសន្តិភាពដូចបច្ចុប្បន្នក៏ដោយសារគុណបំណាត់មេដឹកនាំនិងអ្នកការទូតជំនាន់មុននិងសម័យបច្ចុប្បន្នដែរ។
ប៉ុន្តែលោកឆ្លៀតដាស់តឿនដល់មន្ត្រីក្រោមឱវាទរបស់លោកផងដែរថា សិង្ហបុរីប្រកាន់ខ្ជាប់នូវគោលការណ៍ស្នូលមួយចំនួនដើម្បីធានាថា គោលនយោបាយការបរទេសសិង្ហបុរីការពារឯករាជ្យ និងអធិបតេយ្យនិងការពារប្រយោជន៍ជាតិជាធំ។
ប្រមុខការទូតសិង្ហបុរីខាងលើបានពន្យល់ថា ៖ «ការទូតគឺជាមិនត្រឹមតែមានទំនាក់ទំនងល្អប្រសើរជាមួយគេឯងឡើយ។ វាជាការលើកស្ទួយទំនាក់ទំនងល្អជាមួយប្រទេសជាមិត្ត ដែលអាចរក្សាការពារប្រយោជន៍របស់យើងបានផងដែរ»។
លោកបន្ថែមថា៖ «ពេលណាប្រទេសដទៃទាមទារអ្វីដែលមិនសមរម្យនិងធ្វើឲ្យប៉ះពាល់ដល់ផលប្រយោជន៍ជាតិរបស់យើង យើងត្រូវតែបង្ហាញជំហររបស់យើងឲ្យច្បាស់លាស់ និងរក្សាជំហរនោះឲ្យបានរឹងមាំប្រកបដោយសីលធម៌»។
រដ្ឋមន្ត្រីរូបនេះបានបញ្ជាក់ផងដែរថា ស្របពេលដែលភូមិសាស្ត្រនយោបាយប្រែប្រួលរហ័ស និងស្ថិតក្នុងស្ថានភាពមិនច្បាស់លាស់ សិង្ហបុរីត្រូវប្រឹងប្រែងដើម្បីធានាថាគោលយោបាយខ្លួនឆ្លើយតបស្ថានភាពជាក់ស្តែង និងនៅអាចធានាប្រយោជន៍ជាតិបាន។
សម្រាប់លោក Vivian Balakrisnan ដើម្បីសម្រេចបានគោលនយោបាយដែលអព្យាក្រឹត្យមិនរណបអ្នកណាមួយក្នុងបរិបទអន្តរជាតិនិងអាចធានាប្រយោជន៍ជាតិបាន សិង្ហបុរីត្រូវមានជំហរច្បាស់លាស់រឹងមាំ មិនអាចឲ្យគេទិញ ឬគំរាមកំហែងឬសំឡុតបានឡើយ ហើយគេត្រូវតែប្រាកដថាខ្លួនមិនមែនជាសាមន្តរដ្ឋឬរដ្ឋចំណុះឲ្យប្រទេសណាមួយឡើយ។
ជារួមលោកបដិសេធថា ប្រទេសតូចមិនត្រូវធ្វើរឿងដែលតូចតាច ធ្វើឥរិយាបថកោតខ្លាចប្រទេសធំឡើយ ព្រោះវាជាបច្ច័យដែលធ្វើឲ្យប្រទេសធំគំរាមកំហែងឬប្រើប្រាស់បានតាមចិត្តឡើយ។ ថ្វីបើខ្លួនតូចក្តី តែសិង្ហបុរីហ៊ានក្រោកឈរដើម្បីការពារជំហរខ្លួនជានិច្ចទោះបីជាស្ថិតក្នុងស្ថានភាពលំបាកយ៉ាងណាក៏ដោយ។
គោលការណ៍មួយទៀតដែលជួយឲ្យសិង្ហបុរីមានគោលនយោបាយការបរទេសរឹងមាំ គឺសិង្ហបុរីមានសក្តានុពលសេដ្ឋកិច្ចខ្លាំង មានឯកភាពសង្គម មានស្ថិរភាពនយោបាយ ហើយនិងការគោរពនិងគាំទ្រច្បាប់អន្តរជាតិជាផ្លូវតែមួយគត់ដែលអនុវត្តឲ្យសិង្ហបុរីរស់បាន។
«វាជារឿងសំខាន់សម្រាប់រដ្ឋតូចៗដូចជាសិង្ហបុរី នៅក្នុងប្រព័ន្ធមួយដែលអ្នកខ្លាំងឈ្នះ ហើយច្បាប់ព្រៃនៅតែត្រូវគេអនុវត្ត ប្រទេសដូចសិង្ហបុរីពិបាកមានឱកាសរស់ស្រួលណាស់។ នេះហើយជាមូលហេតុដែលសិង្ហបុរីតែងតែធ្វើជាសមាជិកសកម្មនៃអង្គការសហប្រជាជាតិ»។
ក្រៅពីគោរពច្បាប់អន្តរជាតិ ប្រមុខការទូតសិង្ហបុរីបានពន្យល់បន្ថែមថា គោលនយោបាយការបរទេសសិង្ហបុរីគួរឲ្យទុកចិត្តបាន នៅពេលដែលសង្គមសិង្ហបុរីទាំងមូលអាចរក្សាបាននូវការឯកភាពគ្នាក្នុងស្រុក និងគ្មានការបែកបែកឬទាស់ទែងខ្វែងគំនិតគ្នាផ្នែកនយោបាយ។
លោក Balakrisnan បានបញ្ជាក់ដូច្នេះ៖ «គោលនយោបាយការបរទេសអាចនឹងគួរឲ្យទុកចិត្តបាន ប្រសិនបើយើងអាចធានាបាននូវការឯកភាពគ្នាក្នុងស្រុកពាក់ព័ន្ធប្រយោជន៍ស្នូលសិង្ហបុរីនិងចំណុចអាទិភាពនៃគោលនយោបាយការបរទេសយើងនោះ។ លើសពីនេះ វាចាំបាច់ណាស់ដែលនយោបាយរបស់យើងមិនបែកខ្ញែកគ្នានោះ»។
បន្ថែមពីនេះ សិង្ហបុរីត្រូវធ្វើជាមិត្តជាមួយអ្នកគ្រប់គ្នា ហើយមិនយកអ្នកណាមួយជាសត្រូវឡើយ។ ក្នុងន័នេះ វាក៏មិនមែនមានន័យថា សិង្ហបុរីត្រូវយកប្រយោជន៍ខ្លួនទៅប្តូរដើម្បីបានទំនាក់ទំនងល្អប្រសើរជាមួយប្រទេសឯទៀតដែរ។ មិនត្រឹមតែប៉ុណ្ណោះ សិង្ហបុរីខ្លួនឯងត្រូវសម្រេចចិត្តដោយពឹងផ្អែកសំខាន់លើការគិតគូររបស់ខ្លួនឲ្យបានដិតដិត ជាពិសេសការគិតគូរពីអ្វីដែលជាប្រយោជន៍រយៈពេលវែងរបស់ខ្លួនផង៕
Tag:
Vivian Balakrisnan
សិង្ហបុរី
© រក្សាសិទ្ធិដោយ thmeythmey.com