ចិនស្នើឲ្យមានការពង្រឹងទំនាក់ទំនងជាមួយអាស៊ានឲ្យស៊ីជម្រៅដើម្បីសម្រេចប្រយោជន៍រួម

អន្តរជាតិ

ចិនស្នើឲ្យមានការពង្រឹងទំនាក់ទំនងជាមួយអាស៊ានឲ្យស៊ីជម្រៅដើម្បីសម្រេចប្រយោជន៍រួម

19, Jul 2017 , 9:27 am

រូបភាព

រូបភាព៖ កិច្ចប្រជុំអាស៊ាន-ចិនលើកទី ១៩ នៅក្នុងទីក្រុងចន្ទន៍ប្រទេសឡាវ ឆ្នាំ ២០១៦

ដោយ:

ចិនបានស្នើឲ្យអាស៊ានពង្រឹងកិច្ចសហការបន្ថែមឲ្យកាន់តែស៊ីជម្រៅទៀតដើម្បីសម្រេចបានការរីកចម្រើនទាំងអស់គ្នា។ ចិនចង់ឲ្យមានការពង្រឹងទំនាក់ទំនងសេដ្ឋកិច្ច ពាណិជ្ជកម្ម និងការផ្សាភ្ជាប់ និងដោះស្រាយបញ្ហារួមគ្នា ដើម្បីពង្រឹងភាពជាដៃគូយុទ្ធសាស្ត្រ និងជួយកសាងសហគមន៍អាស៊ានផង។

ឯកអគ្គរដ្ឋទូតចិនប្រចាំអាស៊ានលោក XU BU បានស្នើឲ្យអាស៊ានពង្រឹងកិច្ចសហប្រតិបត្តិការជាមួយ ចិនឲ្យបានស៊ីជម្រៅជាងមុន ក្នុងពេលលោកចូលរួមពិធីរម្លឹកខួប៥០ឆ្នាំនៃការកកើតអាស៊ាន។

ទីភ្នាក់ងារព័ត៌មានចិន ស៊ិនហួរ បានស្រង់សម្តីរបស់ឯកអគ្គរដ្ឋទូតរូបនេះថា៖«យើងមិនត្រូវចំណាយពេលយូរទៀតទេ យើងគួរតែឆ្លៀតឱកាសពង្រឹងសម្ព័ន្ធភាពទ្វេភាគីដោយជំរុញកិច្ចសហការឈ្នះៗក្នុង ការផ្សាភ្ជាប់ ផលិតភាព និងលើកស្ទួយការវិនិយោគ និងពាណិជ្ជកម្ម រួមទាំងទាញយកប្រយោជន៍ពីកិច្ចព្រមព្រៀងពាណិជ្ជកម្មសេរីអាស៊ាន-ចិនកម្រិតថ្មីផង»។

តំណាងក្រុងប៉េកាំងរូបនេះបន្តទៀតថា ភាគីទាំងពីរគួរតែដាក់បញ្ចូលគ្នានូវភាពខ្លាំងនិងសក្ដានុពលសេដ្ឋកិច្ចខ្លួនដើម្បីធានាបានូវការរីកចម្រើននៃគោលនយោបាយចិន«គំនិតផ្ដួចផ្ដើមខ្សែក្រវ៉ាត់មួយវិថីមួយ»និង«ចក្ខុវិស័យអាស៊ានឆ្នាំ២០២៥»។

លោក XU បានបន្ថែមថា ការកំណត់អាទិភាពកិច្ចសន្ទនាទ្វេភាគីជុំវិញការដោះស្រាយបញ្ហាក្នុងតំបន់ និងយល់ពីទុក្ខកង្វល់គ្នាទៅវិញទៅមកក៏ជាផ្នែកមួយចាំបាច់ដើម្បីជួយអភិវឌ្ឍភាពជាដៃគូយុទ្ធសាស្ត្រអាស៊ាន-ចិនឲ្យកាន់តែល្អប្រសើរដែរ។

ចិនក៏បានត្រៀមខ្លួនរួចរាល់ក្នុងការលើកកម្ពស់ និងគាំទ្រគម្រោងតូចៗក្នុងតំបន់ដូចជាកិច្ចសហការ មេគង្គឡានឆាង (Lancang-Mekong) និងគម្រោងតំបន់អភិវឌ្ឍន៍អាស៊ានខាងកើត។ ចិនក៏បានសន្យាជួយកាត់បន្ថយគម្លាតអភិវឌ្ឍន៍ក្នុងចំណោមសមាជិកអាស៊ានដើម្បីលើស្ទួយការកសាងសហគមន៍អាស៊ាន។

ដោយឡែក អគ្គលេខាធិការរងអាស៊ានលោក AKP Mochtan ដែលទទួលបន្ទុកសហគមន៍ និងកិច្ចការសហប្រតិបត្តិការក៏បានគាំទ្រការលើកឡើងរបស់លោក XU BU ផងដែរ ហើយលោកយល់ថាការពង្រីកទំនាក់ទំនងនិងកិច្ចសហប្រតិបត្តិការរវាងសហគមន៍សេដ្ឋកិច្ចទាំងពីរចិននិងអាស៊ានពិតជាគំនិតអស្ចារ្យ៕