អន្តរជាតិ
រដ្ឋបាល ត្រាំ ដាក់ទណ្ឌកម្មថ្មីទៀតលើអ៊ីរ៉ង់ ទោះអ៊ីរ៉ង់អនុវត្តកិច្ចព្រមព្រៀងនុយក្លេអ៊ែរបានល្អក្ដី រដ្ឋមន្ត្រីរតនាគារអាមេរិក Steven Mnuchin (រូបភាព Xinhua)
× រដ្ឋបាលប្រធានាធិបតី ដូណាល់ ត្រាំ បានដាក់ទណ្ឌកម្មថ្មីទៀតលើបណ្ដាក្រុមហ៊ុន និងបុគ្គលដែលមានជាប់ពាក់ព័ន្ធកម្មវិធីមីស៊ីលបាលីស្ទិករបស់អ៊ីរ៉ង់។ ទណ្ឌកម្មថ្មីនេះ មិនជាប់ទាក់ទងកម្មវិធីអភិវឌ្ឍនុយក្លេអ៊ែររបស់ក្រុងតេហេរ៉ង់ឡើយ ប៉ុន្តែធ្វើឡើងបន្ទាប់អាមេរិកទើបនិយាយថាអ៊ីរ៉ង់គោរពកិច្ចព្រមព្រៀងផ្អាកកម្មវិធីនុយក្លេអ៊ែរជាមួយអន្តរជាតិបានត្រឹមត្រូវ។
ក្រសួងរតនាគារអាមេរិក នៅថ្ងៃទី១៨ ខែកក្កដា បានសម្រេចដាក់ទណ្ឌកម្មលើក្រុមហ៊ុនអ៊ីរ៉ង់និងជនជាតិអ៊ីរ៉ង់ ដោយចោទថាបានបានគាំទ្រសកម្មភាពខុសច្បាប់បង្កដោយជនជាតិអ៊ីរ៉ង់ និងសកម្មភាពឧក្រិដ្ឋកម្មឆ្លងដែន។ ទណ្ឌកម្មនេះ ធ្វើឡើងតែមួយថ្ងៃក្រោយរដ្ឋបាលលោក ដូណាល់ ត្រាំ ទើបសរសើរអ៊ីរ៉ង់ថាអនុវត្តតាមកិច្ចព្រមព្រៀងនុយក្លេអ៊ែរឆ្នាំ២០១៥ បានត្រឹមត្រូវ ទោះជាលោក ត្រាំ មិនពេញចិត្តកិច្ចព្រមព្រៀងនេះក្ដី។
បើតាមការប្រកាសព័ត៌មានរបស់ក្រសួងរតនាគារ ក្រុមហ៊ុនចំនួន៧ និងជនជាតិអ៊ីរ៉ង់ចំនួន៥នាក់ ត្រូវរងទណ្ឌកម្មនេះ ព្រោះពួកគេចូលរួមគាំទ្រសកម្មភាពរបស់កងឆ្មាំបដិវត្តន៍អ៊ីរ៉ង់ ក៏ដូចជាគាំទ្រអង្គការឧក្រិដ្ឋកម្មអន្តរជាតិមានមូលដ្ឋាននៅអ៊ីរ៉ង់ និងបុគ្គលពាក់ព័ន្ធផ្សេងទៀត។ ក្រុមហ៊ុន និងបុគ្គលទាំងនេះ ត្រូវរកឃើញថាជាប់ទាក់ទងនឹងការទិញសម្ភារសង្គ្រាមទំនើបៗ និងលួចយកប្រព័ន្ធ Software ដែលបស្ចិមប្រទេសលក់ឲ្យរដ្ឋាភិបាលអ៊ីរ៉ង់ទៀតផង។
រដ្ឋមន្ត្រីរតនាគារអាមេរិក លោក Steven T. Mnuchin និយាយថា ទណ្ឌកម្មលើកនេះ គឺជាសារផ្ញើទៅកាន់អ៊ីរ៉ង់ដើម្បីបញ្ជាក់ពីជំហររបស់អាមេរិកដែលមិនអត់ទ្រាំនឹងសកម្មភាពបង្កហេត និងបង្កអស្ថិរភាពរបស់អ៊ីរ៉ង់ឡើយ។ លោកបន្តថា អាមេរិកនឹងបន្តដាក់ទណ្ឌកម្មលើកងឆ្មាំបដិវត្តន៍អ៊ីរ៉ង់ និងដាក់សម្ពាធឲ្យអ៊ីរ៉ង់បោះបង់កម្មវិធីមីស៊ីលបាលីស្ទិករបស់ខ្លួន ក៏ដូចជាបញ្ឈប់សកម្មភាពដែលធ្វើឲ្យមជ្ឈិមបូព៌ាធ្លាក់ទៅក្នុងស្ថានភាពគ្រោះថ្នាក់។
យ៉ាងណាមិញ ការចាត់ទុកកងទ័ពអ៊ីរ៉ង់ជាក្រុមភេរវកម្ម នឹងបង្កជាបញ្ហាមិនខាន។ ប្រមុខកងឆ្មាំបដិវត្តន៍អ៊ីរ៉ង់ លោកឧត្តមសេនីយ៍ Mohammad Baqeri បានព្រមានទុកហើយថា បើអាមេរិកនៅតែមានះចង់ដាក់កងទ័ពអ៊ីរ៉ង់ក្នុងបញ្ជីភេរវកម្ម អាមេរិកនឹងប្រឈមមុខគ្រោះថ្នាក់ ហើយមូលដ្ឋាន និងកងទ័ពអាមេរិកដែលពង្រាយនៅក្នុងតំបន់ក៏ត្រូវប្រឈមមុខហានិភ័យដែរ។ ប៉ុន្តែលោកមិនបានបញ្ជាក់ថាអ៊ីរ៉ង់នឹងឆ្លើយតបដោយរបៀបណាឡើយ។
សូមបញ្ជាក់ដែរថា កាលពីសប្ដាហ៍មុន រដ្ឋបាលលោក ត្រាំ ទើបតែព្យួរទណ្ឌកម្មអ៊ីរ៉ង់ពាក់ព័ន្ធកម្មវិធីនុយក្លេអ៊ែរ ដោយអនុលោមតាមកិច្ចព្រមព្រៀងឆ្នាំ២០១៥ ដែលបន្សល់ទុកដោយអតីតប្រធានាធិបតី បារ៉ាក់ អូបាម៉ា ។ លោក ត្រាំ បានហៅកិច្ចព្រមព្រៀងនេះជាកិច្ចព្រមព្រៀងអាក្រក់បំផុត ប៉ុន្តែលោកនៅអាចកែប្រែបានទេ៕
Tag:
អាមេរិក
ដូណាល់ ត្រាំ
អ៊ីរ៉ង់
នុយក្លេអ៊ែរ
© រក្សាសិទ្ធិដោយ thmeythmey.com