ជាតិ
សម្ដេច ហ៊ុន សែន ហៅក្មេងប្រុសអាយុ៧ឆ្នាំ ដែលឈ្លាសវៃម្នាក់ ទៅជួបនៅក្នុងភូមិគ្រឹះ
× ភ្នំពេញ៖ ក្មេងប្រុសអាយុ៧ឆ្នាំម្នាក់ ដែលអាចដោះស្រាយលំហាត់គណិតវិទ្យាថ្នាក់ទី១២ បានទទួលអាហារូបករណ៍ពិសេសពីសម្ដេចនាយករដ្ឋមន្ត្រី ហ៊ុន សែន សម្រាប់ការសិក្សាចំណេះដឹងទូទៅនៅសាលាប៊ែលធី ។ ជំនួបសម្ដេច ហ៊ុន សែន សំណេះសំណាលជាមួយក្រុមគ្រួសារ កុមារា ហ៊ឺ ទៀង គីមហុង ធ្វើឡើងនៅក្នុងភូមិគ្រឹះសម្ដេច នៅព្រឹកថ្ងៃទី១៩ កក្កដានេះ។
កុមារា ហ៊ឺ ទៀង គីមហុង ដែលកំពុងរៀននៅសាលាបឋមសិក្សាហ៊ុនសែនអនុវត្ត នៅភូមិ៣ សង្កាត់រកាក្នុង ក្រុងដូនកែវ ខេត្តតាកែវ គឺមានសមត្ថភាពពិសេសយល់ដឹងពីភាសាខ្មែរ និងគណិតវិទ្យា។ មានអាយុទើបតែ៧ឆ្នាំប៉ុណ្ណោះ កុមារា គីមហុង មានសមត្ថភាពចេះអានអក្សរខ្មែរ និងប្រើប្រាស់ភាសាអង់គ្លេស ព្រមទាំងអាចដោះស្រាយលំហាត់គណិតវិទ្យាថ្នាក់ទី១២ បានផងដែរ ។ នេះបើតាមហ្វេសប៊ុកសម្ដេច ហ៊ុន សែន ដែលបានបន្ថែមថា៖«គីមហុង គឺជាធនធានដ៏មានសារៈសំខាន់បំផុតសម្រាប់ប្រទេសកម្ពុជា»។
បន្ថែមពីលើនេះសម្ដេច ហ៊ុន សែន ក៏បានឧបត្ថម្ភកុំព្យូទ័រយួរដៃ ០១គ្រឿង iPad ០១គ្រឿង និងកង់ ០១គ្រឿង រួមទាំងថវិកាមួយចំនួនដល់កុមារា គីមហុង ផងដែរ។ ជាមួយគ្នានេះនាយករដ្ឋមន្ត្រី នឹងទទួលបន្ទុករាល់ការចំណាយសម្រាប់ការសិក្សារបស់កុមារា គីម ហុង ទាំងស្រុងទៀតផង៕
Tag:
ហ៊ុន សែន
ហ៊ឺ ទៀង គីមហុង
© រក្សាសិទ្ធិដោយ thmeythmey.com