ជាតិ
smart ថា គ្មានការទាញយកទិន្នន័យដោយលេខទូរសព្ទប្លែកៗក្រៅប្រទេសឡើយ
× ភ្នំពេញ៖ កាលពីពេលថ្មីៗនេះ និយ័តករទូរគមនាគមន៍កម្ពុជា (TRC) បានស្នើឲ្យក្រុមហ៊ុនផ្ដល់សេវាទូរសព្ទចល័តបកស្រាយលក្ខណៈបច្ចេកទេសចំពោះការហៅចូលយ៉ាងចម្លែកពីលេខទូរសព្ទក្រៅប្រទេស។ ជាការឆ្លើយតប ក្រុមហ៊ុន smart អះអាងថា ពុំមានលក្ខខណ្ឌបច្ចេកទេស អនុញ្ញាតឲ្យជនដែលហៅចូលពីក្រៅប្រទេសនោះអាចថតចម្លងយកទិន្នន័យ លេខទូរសព្ទរបស់អតិថិជនក្នុងស្រុកបានឡើយ។
បើទោះគ្មានការលួចទិន្នន័យ ប៉ុន្តែក្រុមហ៊ុន smart តាមរយៈលិខិតដែលផ្ញើមក TRC ចុះថ្ងៃទី១៣ខែកក្កដា បានឲ្យដឹងទៀតថា អតិថិជនក្នុងស្រុកពិតជាត្រូវបង់ចំណាយតាមចំនួននាទី និងអត្រាតម្លៃនៃប្រទេសនីមួយៗ ក្នុងករណីអតិថិជនហៅទៅកាន់លេខបរទេសប្លែកៗនោះវិញ។
ក្រុមហ៊ុន smart បន្ថែមថា ក្រុមហ៊ុនបានបិទលេខទូរសព្ទពីអន្តរជាតិទាំងនោះភ្លាម បន្ទាប់ពីមានលិខិតពីនិយ័តករ។ ជាមួយគ្នានេះ ក្រុមហ៊ុនកំពុងតាមដានលេខដែលហៅចូលពីអន្តរជាតិ ដោយនឹងបិទភ្លាមចំពោះលេខដែលមានឥរិយាបថស្រដៀងនឹងលេខដែលបានបិទរួចហើយ។
លេខទូរសព្ទដែលហៅចូលយ៉ាងចម្លែកពីក្រៅប្រទេសទាំងនោះមានដូចជា ប្រទេស Vanuatu មានលេខ +៦៧៨ ៥៥៩ ៤៥២៣/ +៦៧៨ ៥៥៩ ៤៥៨៩ និងលេខទូរសព្ទដែលមានកូដប្រទេស, ប្រទេសអាហ្វហ្គានីស្តង់ +៣៧៥ ប្រទេសឡាទីវ៉ា +៣៧១ ប្រទេសស៊ែប៊ី +៣៨១ ប្រទេស Valparaiso +៥៦៣ ប្រទេស Vilnuis +៣៧០ ប្រទេសតង់ហ្សានី +២៥៥ ។ និយ័តករប្រាប់ថា ការហៅបកទៅវិញជាលក្ខណៈសន្ទនាទូរសព្ទអន្តរជាតិ ជាធម្មតាត្រូវបង់ខាតថវិកា ២៥សេនក្នុងមួយនាទី តែបើតាមការិយាល័យប្រឆាំងការជួញដូរមនុស្ស ការខាតបង់នេះមានចំនួន ១៥ ទៅ៣០ដុល្លារក្នុងមួយនាទី។ ការិយាល័យប្រឆាំងការជួញដូរមនុស្សក៏បានចេញសារដែលមានចម្ងល់ចំពោះការហៅចូលនេះដែរ។
និយ័តករ តាមរយៈសារនៅលើទំព័រហ្វេសប៊ុករបស់ខ្លួនពីថ្ងៃម្សិលមិញ បានណែនាំឲ្យអ្នកប្រើប្រាស់ចៀសវាការលើកទរសព្ទសន្ទនា និងហៅចេញត្រឡប់ទៅលេខទាំងនោះវិញ ដើម្បីកុំឲ្យខាតបង់ថវិកា៕
© រក្សាសិទ្ធិដោយ thmeythmey.com