កីឡាជាតិ
ជាតិ
AFC U23៖ គ្រូបង្វឹកចិនថា បើ U23 កម្ពុជារក្សាទម្រង់លេងដូចជួបខ្លួនក្រុមដទៃក៏ពិបាកស៊ីដូចគ្នា
× គ្រូបង្វឹក U23 ចិនមានការជឿជាក់ថា ប្រសិនបើក្រុមកីឡាបាល់ទាត់ជម្រើសជាតិអាយុក្រោម២៣ឆ្នាំកម្ពុជាអាចរក្សាទម្រង់លេងដូចប៉ះជាមួយក្រុមលោក ក្រុមដទៃក៏មានការលំបាកដូចគ្នា។ ការលើកបែបនេះ បន្ទាប់ពីក្រុម U23 ចិនបានបញ្ចប់ត្រឹមលទ្ធផលស្មើ ០-០ ជាមួយ U23 កម្ពុជានាជំនួបបើកឆាកពូល J នៃពានរង្វាន់ AFC U23 Championship 2018 កាលពីយប់មិញ។ ទន្ទឹមនឹងនេះ លោក បានចាត់ទុកការបញ្ចប់ត្រឹមស្មើ ០-០ ជាលទ្ធផលដែលមិនអាចទទួលយកបាន។
គ្រូបង្វឹក U23 ចិន លោក Massiniliano Maddaloni បានអះអាងថា បើកម្ពុជាអាចរក្សាទម្រង់លេងដូចប៉ះជាមួយ U23 ចិន លោកជឿជាក់ថា ក្រុមដទៃដែលនៅក្នុងពូល J ក៏ពិបាកស៊ីបានដូចគ្នា។ លោកបានបញ្ជាក់ថា ជាក់ស្តែងនៅក្នុងការប្រកួតនេះ កម្ពុជាធ្វើបានយ៉ាងល្អទាំងតំបន់ការពារ និងប្រយុទ្ធ ព្រមទាំងបានដាក់សម្ពាធមកលើក្រុមលោកនៅតំបន់កណ្តាលទៀតផង។
នាសន្និសីទសារព័ត៌មានក្រោយការប្រកួតគ្រូបង្វឹកជនជាតិអ៊ីតាលីរូបនេះបានបញ្ជាក់ថា៖«ខ្ញុំជឿជាក់ថា បើកម្ពុជាលេងដូចនេះ គូប្រកួតផ្សេងទៀតរបស់កម្ពុជាដូចជាជប៉ុន និងហ្វីលីពីនជាដើមក៏មានការលំបាកដូចគ្នា។ សម្រាប់ខ្ញុំចំពោះលទ្ធផលស្មើ ០-០ ខ្ញុំមិនមិនពេញចិត្តក្នុងការទទួលទាល់តែសោះ»។
តែយ៉ាងណា លោក Massiniliano Maddaloni សង្កេតឃើញថា កីឡាករនៅក្នុងក្រុម U23 ចិននៅមានភាពខ្វះចន្លោះច្រើនដែលត្រូវកែតម្រូវ ដើម្បីត្រៀមតទល់ជាមួយហ្វីលីពីន និងជប៉ុនជាបន្តបន្ទាប់ទៀត ជាពិសេសការធ្វើម្ចាស់ផ្ទះជុំផ្តាច់ព្រ័ត្រនៅលើទឹកខ្លួន។
ការអះអាងរបស់គ្រូបង្វឹក U23 ចិន បន្ទាប់ពីក្រុមខ្លាំងនៅតំបន់អាស៊ីមួយនេះ បានបញ្ចប់លទ្ធផលដោយគ្មានការស៊ុតបញ្ចូលទីជាមួយ U23 កម្ពុជានាជំនួបបើកឆាកពូល J នៃព្រឹត្តិការណ៍ AFC U23 Championship 2018 ក្រោមដំណក់ភ្លៀងនៅពហុកីឡដ្ឋានជាតិ កាលពីល្ងាចថ្ងៃទី១៩ កក្កដា ម្សិលមិញ។ ចំណែក U23 ជប៉ុនបានលត់ក្រុម U23 ហ្វីលីពីនក្នុងលទ្ធផល ៨-០៕
Tag:
AFC U23
U23 ចិន
U23 កម្ពុជា
© រក្សាសិទ្ធិដោយ thmeythmey.com