កម្ពុជារំពឹងទាក់ទាញទេសចរមូស្លីមច្រើនក្រោយប្រព័ន្ធស្តង់ដារហាឡាលត្រូវបានបង្កើត

ជាតិ

កម្ពុជារំពឹងទាក់ទាញទេសចរមូស្លីមច្រើនក្រោយប្រព័ន្ធស្តង់ដារហាឡាលត្រូវបានបង្កើត

20, Jul 2017 , 2:43 pm

រូបភាព

លោក ម៉ៅ ថូរ៉ា រដ្ឋលេខាធិការក្រសួងពាណិជ្ជកម្ម។

ដោយ: អុីសា រ៉ហានី (Isa Rohany)

ភ្នំពេញ៖ កម្ពុជាកំពុងសម្លឹងមើលឃើញពីឳកាសជាច្រើន ពីការរៀបចំប្រព័ន្ធស្តង់ដាហាឡាល។ ការចំណេញទាំងនោះ មានទាំងផ្នែកពាណិជ្ជកម្ម និងវិស័យទេសចរណ៍។ ទាក់ទងនឹង វិស័យទេសចរណ៍ កម្ពុជារំពឹងថា នឹងអាចទាក់ទាញភ្ញៀវទេសចរជាជនមូស្លីម (អ្នកកាន់ សាសនាឥស្លាម) កាន់តែច្រើន ទាំងនៅអាស៊ី និងមជ្ឈឹមបូព៌ា ក្រោយប្រព័ន្ធស្តង់ដារហាឡាល បានបង្កើតជាស្ថាពរ។

រដ្ឋលេខាធិការក្រសួងពាណិជ្ជកម្ម លោក ម៉ៅ ថូរ៉ា បានឲ្យដឹងថា កម្ពុជាបានចាប់ផ្តើមរៀបចំ ប្រព័ន្ធស្តង់ដារអាហារហាឡាលនេះ តាំងពី៥ ឬ៦ឆ្នាំមកហើយ។ លោកថ្លែងថា ដំណើរការនៃ ការរៀបចំនេះ គឺមានភាពស្មុគស្មាញ និងទាមទារឲ្យមានការទំនុកចិត្តខ្ពស់។

លោករដ្ឋលេខាធិការថ្លែងបន្តថា ទោះមានការលំបាកយ៉ាងណាក្តី ក៏កម្ពុជានឹងខិតខំប្រឹងប្រែង ស្វែងរកដៃគូសហការ ដើម្បីរៀបបចំប្រព័ន្ធស្តង់ដារមួយនេះ ព្រោះវានឹងផ្តល់ផលប្រយោជន៍ជាច្រើន ក្រោយរៀបចំវាបានជោគជ័យ។ ទាំងបង្កើនផលិតផលនាំចេញ កម្ពុជាក៏រំពឹងខ្ពស់ក្នុងការទាក់ទាញទេសចរជាអ្នកកាន់សាសនាឥស្លាមច្រើនផងដែរ ទាំងប្រទេសម៉ាឡេស៊ី ថៃ ឥណ្ឌូនេស៊ី និងប្រជាជននៅ ប្រទេសអារ៉ាប់ផងដែរ។ នេះជាការបញ្ជាក់របស់លោករដ្ឋលេខាធិ ការ។

រដ្ឋមន្ត្រីប្រតិភូអមនាយករដ្ឋមន្ត្រី លោក អូស្មាន ហាស្សាន់ បានប្រាប់ក្រុមអ្នកសារព័តមានក្នុង សិក្ខាសាលានិយាយពីស្តង់ដារហាឡាលនៅព្រឹកថ្ងៃទី២០ កក្កដា ថា វាពិតជាមានសារ ប្រយោជន៍ណាស់ ដែលគេត្រូវដឹង និងទាញប្រយោជន៍ពីការប្រើប្រាស់ស្តង់ដារហាឡាល។ លោកបញ្ជាក់ថា ស្តង់ដារនេះមិនសំដៅតែទៅលើអាហារនោះទេ ក្នុងនោះរួមទាំងសម្ភារប្រើ ប្រាស់ប្រចាំថ្ងៃផងដែរ។

លោក អូស្មាន ហាស្សាន់ បញ្ជាក់ទៀតថា កម្ពុជាមានទាំងវត្ថុធាតុដើម និងធនធានមនុស្សគ្រប់ គ្រាន់ ដើម្បីដំណើររៀបចំប្រព័ន្ធស្តង់ដារហាឡាលនេះ។ លោកបញ្ជាក់ទៀតថា ការរៀបចំនេះ មិនមែនសម្រាប់តែការផ្គត់ផ្គង់ក្នុងស្រុកទេ គឺដើម្បីការនាំចេញទៅក្រៅប្រទេសផងដែរ ហើយគោលដៅក៏មិនមែនសម្រាប់តែសាសនិកឥស្លាមតែមួយនោះដែរ។

ពាណិជ្ជករខ្មែរឥស្លាមមួយរូប លោក យូណេស បានបង្ហាញពីចំណាប់អារម្មណ៍រីករាយ និង ស្វាគមន៍ដល់គណៈកម្មការអាហារហាឡាលកម្ពុជា។ លោកបន្តថា បច្ចុប្បន្នទីផ្សារហាឡាល គឺមានភាពទូលំទូលាយនៅលើសាកលលោក ហើយអាហារហាឡាលក៏មិនសម្រាប់តែជន មូស្លីមនោះដែរ វាជាប្រព័ន្ធស្តង់ដារអនាម័យមួយ ដែលគិតពីគុណភាពជាសំខាន់។

លោក យូណេស មានសុទិដ្ឋិនិយមថា នៅពេលស្តង់ដារហាឡាលកម្ពុជាត្រូវបានបង្កើត វានឹង ផ្តល់អត្ថប្រយោជន៍ជាច្រើន ទាំងវិស័យទេសចរណ៍ និងទាក់ទាញពាណិជ្ជករជាច្រើន មកវិនិយោគ។

សិក្ខាសាលាស្តីពីការបង្កើតស្តង់ដារផលិតផលហាឡាលកម្ពុជា ត្រូវបានធ្វើឡើងនៅព្រឹកថ្ងៃទី ២០ កក្កដា នៅសណ្ឋាគារ ឡឺរ៉ូយ៉ាល់ ភ្នំពេញ។ គោលបំណងសំខាន់ គឺដើម្បីដើម្បីចែករំលែក បទពិសោធន៍ពីអ្នកជំនាញមកពីប្រទេសថៃ។ សិក្ខាសាលានេះ សហការរៀបចំដោយក្រសួង ពាណិជ្ជកម្ម និងស្ថានទូតថៃប្រចាំកម្ពុជា។

កម្ពុជាកំពុងរៀនសូត្រពីដំណើរការរៀបចំស្តង់ដារអាហារហាឡាលពីប្រទេសម៉ាឡេស៊ី និង ថៃ។ តាមរបាយការណ៍បង្ហាញថា ក្នុងមួយឆ្នាំ នាំចេញផលិតផលហាឡាលរបស់ថៃ គិតជាទឹកប្រាក់ប្រហាក់ប្រហែលជាង ៦ប៊ីលានដុល្លារអាមេរិក ទៅកាន់ទីផ្សារអាស៊ាន ក្នុងនោះក៏ មានទៅទីផ្សារមជ្ឈឹមបូព៌ាផងដែរ។ ក្នុងនោះដែរ មានបណ្តារោងចក្រ សហគ្រាសតូច ធំ និងមធ្យម ប្រមាណ ៤០០០ សហគ្រាស បានដាក់ពាក្យស្នើសុំអាជ្ញាប័ណ្ណ និងស្នើសុំវិញ្ញាបនបត្រ ប្រើប្រាស់ស្លាកសញ្ញាហាឡាល ដាក់លើផលិតផល និងសេវាកម្មចំនួនជាង ១០០,០០០ប្រភេទ ក្នុងឆ្នាំកន្លងទៅ។

ដោយឡែកសម្រាប់ប្រទេសម៉ាឡេស៊ី ដែលកាន់សាសនាឥស្លាមនោះវិញ ការនាំចេញផលិតផលដែលមានដាក់ស្លាកសញ្ញាហាឡាល ទៅទីផ្សារពិភពលោក គិតជាទឹកប្រាក់ប្រមាណ ១១ប៊ីលានដុល្លារអាមេរិក ក្នុងមួយឆ្នាំៗ។ ព្រោះថា ម៉ាឡេស៊ី បានផ្តល់ការគាំទ្រយ៉ាងពេញលេញ ក្នុងការរៀបចំឲ្យមានប្រព័ន្ធត្រួតពិនិត្យស្តង់ដាហាឡាលបានល្អត្រឹមត្រូវ និងគ្រប់គ្រងដោយរាជរដ្ឋាភិបាល ដែលស្លាកសញ្ញាហាឡាលនេះ មានការទទួលស្គាល់ពេញសាកលលោក។

យោងតាមការចុះផ្សាយរបស់សារព័ត៌មាន Thomson Reuters បានបង្ហាញពីសន្ទស្សន៍ នៃការលក់ផលិតផលម្ហូបហាឡាល ដែលកំណើនមានរហូតដល់ទៅ ២.៥ ទ្រីលានដុល្លារអាមេរិក នៅឆ្នាំ២០១៩ខាងមុខ ហើយក្នុងនោះ ប្រមាណ ២១.២% គឺជាការចំណាយទៅលើការទិញម្ហូប អាហារហាឡាល របស់ប្រជាជនទូទាំងពិភពលោក។ ការកាត់ចំណែកថ្នាក់ទីផ្សារ ក្នុងឧស្សាហកម្មម្ហូបអាហារហាឡាលពិភពលោក នៅតែបន្តកើនឡើង ដែលបញ្ជាក់ថា ជនមូស្លីម ផ្តោតការយកចិត្តទុកដាក់ខ្ពស់លើសុវត្ថិភាពម្ហូបអាហារ សុវត្ថិភាពទាំងធនធាន សម្រាប់ផលិត និងសុវត្ថិភាពផលិតផលម្ហូបអាហារដែលផលិតរួចសម្រាប់បម្រើទីផ្សារ៕