ជាតិ
កម្ពុជានិងវៀតណាមបើកច្រកទ្វារអន្តរជាតិព្រំដែនថ្មីរួមគ្នា
× ប្រទេសកម្ពុជា និងវៀតណាមដែលជាប្រទេសជិតខាងនិងគ្នាបានសម្ពោធបើកច្រកទ្វារព្រំដែនអន្តរជាតិរួមគ្នារវាងច្រកទ្វារអន្តរជាតិអូរយ៉ាដាវ ខេត្តរតនគិរី និងព្រំប្រទល់ស្រុកឡេថាញ់ ខេត្តយ៉ាឡាយ។ ការបើកច្រកទ្វារព្រំដែនអន្តរជាតិនេះ គឺរាជរដ្ឋាភិបាលកម្ពុជា និងរដ្ឋាភិបាលវៀតណាម បានចុះហត្ថលេខាលើកិច្ចព្រមព្រៀង ស្ដីពីការដឹកជញ្ជូនផ្លូវគោកនៅឆ្នាំ១៩៩៨-២០០៥។ នេះជាច្រកទ្វារអន្តរជាតិទីបួនហើយដែលបានបើកសម្ពោធ។
គេហទំព័ររបស់អគ្គស្នងការដ្ឋាននគរបាលជាតិដែលបានផ្សាយនៅថ្ងៃទី២០ កក្កដា ឆ្នាំ២០១៧ បានឲ្យដឹងថា ការបើកសម្ពោធច្រកទ្វារព្រំដែនអន្តរជាតិនេះ គឺលោក កែវ គឹមយ៉ាន ដំណាងឲ្យរាជរដ្ឋាភិបាលកម្ពុជា និង លោក ផាំ ប៊ិញមិញ តំណាងឲ្យរដ្ឋាភិបាលវៀតណាម កាលពីព្រឹកថ្ងៃទី១៩ ខែកក្កដា ឆ្នាំ២០១៧។
នគរបាលជាតិ បានបន្ថែមទៀតថា ពិធីជាប្រវត្តិសាស្ត្រនេះ ត្រូវបានប្រារពធ្វើនៅច្រកទ្វារអន្តរជាតិ នៃប្រទេសទាំងពីរ ដោយមានការចូលរួមពីមន្ត្រីរាជការ និងប្រជាពលរដ្ឋខេត្តទាំងពីរដែលនៅជាប់ព្រំប្រទល់ច្រកទ្វារអន្តរជាតិនេះ អ្នកចូលរួមប្រមាណ១០០០នាក់។
អគ្គស្នងការដ្ឋាននគរបាលជាតិបាន បញ្ជាក់ទៀតថា ក្នុងកិច្ចព្រមព្រៀងស្ដីពីការដឹកជញ្ជូនផ្លូវគោកនៅឆ្នាំ១៩៩៨-២០០៥ មានច្រកទ្វារចំនួន៧ សម្រាប់ដឹកជញ្ជូនឆ្លងកាត់ច្រកទ្វារអន្តរជាតិ រវាងប្រទេសទាំងពីរ។ អគ្គស្នងការនេះបន្ថែមទៀតថា ប្រត្តិបត្តិការដឹកជញ្ជូននេះបានអនុវត្តនៅតាមច្រកទ្វារចំនួន៣ រួចមកហើយ គឺច្រកទ្វារអន្តរជាតិបាវិតជាប់ជាមួយនឹងច្រកទ្វារម៉ុកបាយ ច្រកទ្វារអន្តរជាតិត្រពាំងថ្លុងជាប់ជាមួយនឹងច្រកទ្វារសាម៉ាត ច្រកទ្វារអន្តរជាតិព្រែកចាកជាប់ជាមួយនឹងច្រកទ្វារហាទៀង ហើយនិងទី៤ ច្រកទ្វារអន្តរជាតិអូរយ៉ាដាវជាប់ជាមួយនឹងច្រកទ្វារឡេថាញ់ ដែលបានសម្ភោធថ្មីៗនេះ។
Tag:
កម្ពុជា
វៀតណាម
ច្រកព្រំដែនអន្តរជាតិ
© រក្សាសិទ្ធិដោយ thmeythmey.com