ពីនេះ ពីនោះ
កុំលេងសើច រឿងលុយកើតកូន!
× កំណាព្យបទ បថ្យាវត្ត
ដោយ ប៉ាកកាខ្មៅ
-គិតរឿងដើមទុនកាលមុនលំបាក
គិតមិនស្រាន្តស្រាកថាបានពីណា
ឃើញគេរកស៊ីកបកើតផ្លែផ្កា
ខ្លះសួរខ្លួនថាធ្វើម៉េចដូចគេ?
-មុនខ្លះត្រឹមគិតស៊ូនៅទំនេរ
មិនងាយស្រួលទេរកប្រភពទុន
ឥឡូវឥណទានមានមិនដូចមុន
អាចខ្ចីធ្វើទុនរកស៊ីគ្រប់ស្រុក។
-មានផែនការច្បាស់ៗជាស្រណុក
គ្មានឡើយស្មាញស្មុគរឿងប្រាក់កម្ចី
តូចពង្រីកធំឬបង្កើតថ្មី
មិនបាច់លក់ដីដូរផ្ទះសម្បែង។
-ស្ថាប័នឥណទានមានគ្រប់កន្លែង
ជួយបានជាក់ស្តែងមិនថ្លែងបោកប្រាស់
ប្រជាចម្រើនថ្កើនជោគជ័យច្បាស់
តែកុំប្រើប្រាស់ទៅលេងល្បែងណា។
-ខ្ចីទៅរកស៊ីមីរមូលផ្លែផ្កា
កបកើតដុល្លារវីឡាឡានថ្មី
បើប្រើខុសខ្ទង់ផុងធ្លាក់ក្រក្រី
កុំលេងសើចអីរឿងលុយកើតកូន៕
© រក្សាសិទ្ធិដោយ thmeythmey.com