ជាតិ
ព័ត៍មានសុខភាព
CDC ប្រាប់ឲ្យពលរដ្ឋប្រុងប្រយ័ត្ន ពីជំងឺផ្ដាសាយបក្សី H5N1 និង H7N9 លោក លី សូវ៉ាន់
× ភ្នំពេញ៖ នាយកដ្ឋានប្រយុទ្ធនឹងជំងឺឆ្លង CDC បានផ្សព្វផ្សាយ និងក្រើនរំលឹកដល់ប្រជាពលរដ្ឋទាំងអស់នៅកម្ពុជា ឲ្យប្រុងប្រយ័ត្នពីជំងឺផ្ដាសាយបក្សី H5N1 និង ជំងឺផ្ដាសាយបក្សី H7N9។ ជំងឺផ្ដាសាយបក្សី H5N1 និង ជំងឺផ្ដាសាយបក្សី H7N9 ជាប្រភេទនៃវីរុសផ្ដាសាយ។ ម្យ៉ាងទៀត ជំងឺនេះ បណ្ដាលឲ្យមានការឆ្លងយ៉ាងខ្ពស់លើបសុបក្សី។ ជាពិសេស ជំងឺផ្ដាសាយបក្សីនៅកម្ពុជា ភាគច្រើនកើតឡើងចាប់ពីខែ ធ្នូ ដល់ខែមេសា។
ជំងឺផ្ដាសាយបក្សី H5N1 និង ជំងឺផ្ដាសាយបក្សី H7N9 ជាប្រភេទនៃវីរុសផ្ដាសាយ។ សម្រាប់ជំងឺផ្ដាសាយបក្សី H5N1នេះ បណ្ដាលឲ្យមានការឆ្លងយ៉ាងខ្ពស់លើបសុបក្សី ហៅថាជំងឺផ្ដាសាយបក្សីលើសត្វ។ ករណីជំងឺផ្ដាសាយបក្សី H5N1 ដែលកើតឡើងជារឿយៗ គឺជាការចម្លងមកមនុស្ស ប៉ុន្តែការចម្លងនេះ មិនងាយឆ្លងពីមនុស្សម្នាក់ទៅមនុស្សម្នាក់ទៀតទេ។ ម្យ៉ាងទៀត មនុស្សឆ្លងជំងឺនេះ មានអត្រាស្លាប់ ប្រហែល ៦០ភាគរយ។
ចំណែកឯ ជំងឺផ្ដាសាយបក្សី H7N9 វិញ វាជាវីរុសធម្មតា ដែលចរាចរលើសត្វស្លាប។ ជាមួយគ្នានេះ ករណី H7N9 លើកដំបូង គឺបានឆ្លងមកមនុស្សនៅក្នុងឆ្នាំ ២០១៣ នាប្រទេសចិន ប៉ុន្តែសម្រាប់ប្រទេសកម្ពុជា មិនមានករណីនេះទេ។ ចំពោះជំងឺផ្ដាសាយបក្សី H7N9 គិតត្រឹមថ្ងៃទី ១៥ មិថុនា ២០១៧នេះ នៅលើពិភពលោកមានករណីសុរប ១៥៣៣ ដោយក្នុងនោះមានស្លាប់ចំនួន ៥៩២នាក់។
ក្នុងសិក្ខាសាលាផ្សព្វផ្សាយព័ត៌មាន ស្ដីពីស្ថានភាពជំងឺផ្ដាសាយបក្សី នៅមន្ទីរពេទ្យកុមារជាតិ លោក លី សូវ៉ាន់ ប្រធាននាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាល បានមានប្រសាសន៍ថា ជំងឺផ្ដាសាយបក្សី នៅពេលដែលឆ្លងទៅមនុស្ស គឺភាគច្រើនបណ្ដាលឲ្យស្លាប់។ លោក លី សូវ៉ាន់ បានបន្តថា ជំងឺផ្ដាសាយបក្សី កើតឡើងនៅកម្ពុជា ភាគច្រើន គឺចាប់ពីខែ ធ្នូ ដល់ខែ មេសា ដោយសារតែខែទាំងនេះ មានពិធីបុណ្យច្រើន។
ប្រធាននាយកដ្ឋានប្រយុទ្ធនឹងជំងឺឆ្លងរូបនេះ បន្ថែមថា នៅកម្ពុជា មានមន្ទីរពិសោធន៍ចំនួន ២ សម្រាប់ពិសោធន៍លើសារធាតុពាក់ព័ន្ធផ្សេងៗ ដែលធ្វើតេស្តគ្រប់ពេលវេលា។ ទន្ទឹមនឹងនេះ សម្រាប់សុវត្ថិភាពចំណីអាហារវិញ មានក្រសួងពាក់ព័ន្ធចំនួន ៦ចូលរួមដូចជា ក្រសួងសុខាភិបាល ក្រសួងកសិកម្ម ក្រសួងពាណិជ្ជកិច្ច ក្រសួងទេសចរណ៍ ក្រសួងឧស្សាហកម្ម និងសិប្បកម្ម ក្រសួងសេដ្ឋកិច្ច និងហរិញ្ញវត្ថុ។
សូមបញ្ជាក់ថា ជំងឺផ្ដាសាយបក្សី H5N1 បានផ្ទុះឡើងនៅកម្ពុជា លើបសុបក្សី មានលើខេត្តស្វាយរៀង កំពត សៀមរាប បាត់ដំបង កំពង់ចាម កំពង់ស្ពឺ កណ្ដាល។ ជំងឺ H5N1 មានរោគសញ្ញាលើមនុស្ស ដូចជា គ្រុនក្ដៅ អស់កំលាំង ក្អក ឈឺបំពង់ក និងឈឺសាច់ដុំ អាចវិវត្តទៅជាជំងឺផ្លូវដង្ហើមធ្ងន់ធ្ងរ។ ជំងឺផ្ដាសាយបក្សី ចាប់ពីឆ្នាំ២០១៣មក ករណីនេះ បានកើតឡើងចំនួន ៨៥៩ ករណី ដែលអះអាងដោយមន្ទីរពិសោធន៍ពី ១៦ ប្រទេសទូទាំងពិភពលោក។
Tag:
ផ្ដាសាយបក្សី H5N1
H7N9
© រក្សាសិទ្ធិដោយ thmeythmey.com