រថយន្ត
ជិះរថយន្តអត់លាងទឹកក្នុងក្រុងអាប៊ូដាប៊ី នឹងត្រូវរងពិន័យចាប់ពី៨០០ដុល្លារអាមេរិកឡើងទៅ
× រថយន្តរាប់រយគ្រឿង ត្រូវបានរឹបអូស និងម្ចាស់រថយន្តជាច្រើនត្រូវបានពិន័យចាប់ពី៣០០០ដាហាម (ជាង៨០០ដុល្លារអាមេរិក) ខណៈអាជ្ញាធរក្រុងអាប៊ូដាប៊ី ប្រទេសអារ៉ាប់រួម អេមីរ៉េត បើកយុទ្ធនាការប្រឆាំងនឹងអ្នកជិះរថយន្តមិនលាងទឹក។ នេះបើតាមការផ្សាយរបស់កាសែត The National របស់អារ៉ាប់រួម អេមីរ៉េត។
កាលពីពេលថ្មីៗកន្លងទៅនេះ មន្ត្រីអធិការកិច្ចនៃក្រុងអាប៊ូដាប៊ី បានរូបអូសរថយន្តចំនួន១៤១គ្រឿងនៅតំបន់ឧស្សាហកម្ម Mussaffah និង Mafraq ដោយដាក់ពិន័យលើម្ចាស់រថយន្ត៣១នាក់ និងម្ចាស់រថយន្ត២៨៩នាក់ទៀត ត្រូវបានព្រមានឲ្យបោះបង់រថយន្តចាស់ៗរបស់ខ្លួនចោល។ វិធានការកាន់តែតឹងរឹងបន្ថែមទៀត ដោយអាជ្ញាធរក្រុង បានកំណត់ការដាក់ពិន័យអ្នកដែលជិះរថយន្តមិនលាងទឹក ក្រោយវិលត្រឡប់ពីវិស្សមកាល។
មន្ត្រីអាជ្ញាធរម្នាក់ បានលើកឡើងថា ការសម្រេចពិន័យលើអ្នកជិះរថយន្តកខ្វក់ គឺក្នុងគោលបំណងរឹងបន្តឹងសុវត្ថិភាព និងភាពស្រស់ស្អាតនៅក្នុងទីក្រុង។ បើតាម The National មន្ត្រីរូបនេះ បានអះអាងថា ការជិះរថយន្តកខ្វក់នៅក្នុងទីក្រុងបង្កហានីភ័យជាច្រើន ជាពិសេសនៅពេលមានខ្យល់បោកបក់ វាបង្កគ្រោះថ្នាក់ដល់រថយន្ត និងមនុស្សទូទៅ។
លោកបានបន្ថែមថា ច្បាប់នៅក្នុងប្រទេស មិនអនុញ្ញាតឲ្យធ្វើចរាចរណ៍រថយន្តកខ្វក់ឡើយ ដោយអាជ្ញាធរនឹងចុះធ្វើអធិការកិច្ច ដើម្បីឲ្យដឹងច្បាស់ថា ភាពកខ្វក់នោះ បណ្តាលមកពីទុកចោលយូរ ឬក៏ដោយសារម្ចាស់ទើបជិះវិលត្រឡប់ពីវិស្សមកាល។ លោកបានបន្ថែមថា អ្នកដែលចេញពីផ្ទះ ក៏មិនត្រូវទុករថយន្តចោលទាំងស្ថានភាពកខ្វក់នោះដែរ។
តាមច្បាប់មួយដែលបានដាក់ឲ្យប្រើប្រាស់តាំងពីឆ្នាំ២០១២ អាជ្ញាធរក្រុងអាប៊ូដាប៊ី បានតម្រូវឲ្យយានយន្តទាំងមានស្ថានភាពស្អាត បើមិនដូច្នោះទេ ម្ចាស់យានយន្តទាំងនោះ ត្រូវរងពិន័យចាប់ពី៣០០០ដាហាម (លុយអារ៉ាប់) ឬជាង៨០០ដុល្លារអាមេរិកឡើងទៅ។
ទោះបីជាយ៉ាងណាក៏ដោយ អាជ្ញាធរក៏មានការបញ្ចុះតម្លៃពិន័យផងដែរ ក្នុងករណីអ្នកបើកបរនោះទទួលស្គាល់កំហុសរបស់ខ្លួន លើការបញ្ជាយានយន្តកខ្វក់ដែលបង្ករូបភាពមិនល្អនៅក្នុងទីក្រុង៕
© រក្សាសិទ្ធិដោយ thmeythmey.com