ព័ត៌មានជាតិ
ខ្មែរក្រហម
កំណាព្យ
ONE Championship
ចំណេះដឹងទូទៅ
ពន្យល់ពាក្យ
នយោបាយ
សេដ្ឋកិច្ច
សង្គម
ព័ត៌មានកីឡាជាតិ
វិទ្យុ
ព័ត៌មានសុខភាព
រូបត្លុក
ពីនេះ ពីនោះ
ព័ត៌មានអន្តរជាតិ
នយោបាយ
សិល្បៈ
COVID-19
សេដ្ឋកិច្ច
សង្គម
វប្បធម៌
FIFA
កីឡាអន្តរជាតិ
សង្រ្កាន្តឆ្នាំថ្មី
អត្ថបទពាណិជ្ជកម្ម
បទយកការណ៍/សម្ភាស
ជាតិ
ឌុច គ្រូលត់ដំនៅឋាននរក!
27, Jul 2017 ,
8:39 am
រូបភាព
×
ដោយ:
«ឌុច គ្រូលត់ដំនៅឋាននរក» គឺជាចំណងជើងនៃខ្សែភាពយន្តឯកសារ ដែលផលិតដោយលោក ប៉ាន់ រិទ្ធី។ ខ្សែភាពយន្តនេះ ត្រូវបានមជ្ឈមណ្ឌលតម្កល់ឯកសារកម្ពុជា យកមកចាក់បញ្ចាំងជូនយុវជនទស្សនា នៅថ្ងៃទី ២៦ ខែកក្កដា។
ខ្សែភាពយន្តឯកសារ «ឌុច គ្រូលត់ដំនៅឋាននរក» (Duch, Master of the forges of hell) មានរយៈពេល ១ ម៉ោង និង ៣៨ នាទី ដែលផលិតករ ប៉ាន់ រិទ្ធី ផលិតចប់នៅឆ្នាំ ២០១២។ សាច់រឿងនេះ ផលិតករ បានផ្តោតសំខាន់ ទៅលើតួអង្គ កាំង ហ្កេចអ៊ាវ ហៅឌុច អតីតប្រធានគុកទួលស្លែងក្នុងរបបកម្ពុជាប្រជាធិបតេយ្យ។
ចាប់តាំងពីការចាប់ផ្តើមរហូតដល់បញ្ចប់នៃសាច់រឿង ផលិតករ បានបង្ហាញ ពីការរៀបរាប់របស់លោក ឌុច អំពីសកម្មភាពឧក្រិដ្ឋរបស់ខ្លួន ក្នុងរបបខ្មែរក្រហម ក្នុងនាមលោកជាប្រធានគុកទួលស្លែង។ ជាមួយគ្នានេះ ផលិតករ ក៏បានបង្ហាញពីការលើកឡើងរបស់សាក្សី ដែលបានឃើញនូវអំពើឃោរឃៅលើជនរងគ្រោះនៅក្នុងមន្ទីរសន្តិសុខ ស-២១ ( គុកទួលស្លែង) នាពេលនោះ ដើម្បីឲ្យលោក ឌុច បកស្រាយរ។
យ៉ាងណាតាមរយៈខ្សែភាពយន្តនេះ លោកអតីតមេគុកទួលស្លែង ក៏ទទួលស្គាល់ពីកំហុសរបស់ខ្លួន និងមានវិប្បដិសារីចំពោះអំពើឧក្រិដ្ឋរបស់ខ្លួនផងដែរ។
កញ្ញា ស សុភាវឌ្ឍនា ជានិស្សិតនៅវិទ្យាស្ថានភាសាបរទេស(IFL) និយាយថា ពីមុននាងស្រពិចស្រពិលនៅពេលដែលគេនិយាយពីឈ្មោះ លោក ឌុច អតីតមេគុកទូលស្លែង តែក្រោយកញ្ញាបានទស្សនាខ្សែភាពយន្ត«ឌុច គ្រូលត់ដំនៅឋាននរក» ធ្វើឲ្យខ្លួនកាន់ដឹងជាងមុនពីសកម្មភាពរបស់លោកឌុច ដែលបានធ្វើនៅក្នុងរបបខ្មែរក្រហម។ « ជាងនេះទៅទៀត ក្រោយពីស្តាប់សម្តីលោកឌុច ធ្វើឲ្យខ្ញុំគិតពិចារណា កាន់តែច្រើនអំពីមូលហេតុដែលខ្មែរក្រហមសម្លាប់មនុស្ស។ ខ្ញុំមិនទាន់អាចនិយាយបានថា បែបណាទេ តែខ្ញុំយល់ច្រើនជាងមុន»។ នេះជាការបន្ថែមរបស់ សុភាវឌ្ឍនា ។
ជាមួយគ្នានេះ មិត្តភក្តិ សុភាវឌ្ឍនា គឺកញ្ញា ឈឿន គឹមលាង ដែលបានទស្សនារឿងនេះដែរ យល់ថា លោក ឌុច គឺជាមនុស្សសាហាវឃោរឃៅ ដែលធ្វើឲ្យជីវិតប្រជាជនខ្មែរប្រមាណ ១ ម៉ឺន ២ ពាន់នាក់បាត់បង់ជីវិត នៅមន្ទីរសន្តិសុខ ស-២១ ដែលលោកបានគ្រប់គ្រងនាសម័យនោះ។ គឹមលាង បន្ថែមដូច្នេះថា៖« ពេលខ្លះយើងស្តាប់ការបកស្រាយរបស់លោកឌុចមួយភ្លែត ដូចគាត់ ជាមនុស្សល្អ តែនៅពេលស្តាប់សាក្សី និងពិចារណាបន្ថែម ទើបយល់ថា គាត់ជាឧក្រិដ្ឋជនដ៏ឃោរឃៅ។ ខ្ញុំជឿថា នៅក្នុងរបបកម្ពុជាប្រជាធិបតេយ្យ មានការសម្លាប់មនុស្សសហាវមែន បើទោះខ្ញុំកើតមិនទាន់»។
ទោះជាយ៉ាងណា បើស្តាប់ការលើកឡើងរបស់និស្សិតនៃសកលវិទ្យាល័យភូមិន្ទភ្នំពេញ កញ្ញា កើត សុគន្ធា ឯណេះវិញ ហាក់ប្លែកបន្តិចពីនិស្សិតទាំងពីរខាងលើ។ និស្សិតរូបនេះ យល់ស្របថា ទោសកំហុសរបស់លោកឌុច ធ្ងន់ធ្ងរមែន តែនាងហាក់មានអារម្មណ៍អាណិតលោកឌុច ខ្លះដែរ ដោយសារ ពេលនេះលោកចាស់ហើយ។ សុគន្ធា ពន្យល់យ៉ាងនេះថា៖« កំហុសរបស់គាត់ វាមិនអាចនឹងលើកលែងទោសឲ្យបានទេ តែខ្ញុំគ្រាន់តែមានចិត្តមួយអាណិតគាត់ខ្លះដែរ ព្រោះគាត់(ឌុច)ចាស់ហើយ និងជាប់ពន្ធនាគារ គ្មានកូនចៅថែរក្សា»។
ផលិតករ ប៉ាន់ រិទ្ធី បានថ្លែងនៅក្នុងពិធីចាក់បញ្ចាំងភាពយន្ត « ឌុច គ្រូលត់ដំនៅឋានរក» នៅថ្ងៃទី ២៦ ខែកក្កដា ថា លោកផលិតរឿង«ឌុច គ្រូលត់ដំនៅឋាននរក» មិនមានចេតនា ដើម្បីឲ្យប្រជាជនខ្មែរចងកំហឹងនោះទេ។ « ការរម្លឹករបស់ខ្ញុំតាមរយៈខ្សែភាពយន្តនេះ មិនមែនដើម្បីយកកំហឹងមកដាក់ក្នុងខ្លួនទេ តែជាការរម្លឹក ដើម្បីដឹងគុណដល់អ្នកស្លាប់។ អ្នកស្លាប់ជាអ្នកជួយយើងឲ្យនៅរស់ដល់ពេលបច្ចុប្បន្ន»។ លោក រិទ្ធី បញ្ជាក់ដូច្នេះ ក៏បន្ថែមយ៉ាងនេះទៀតថា៖ «ខ្ញុំផលិតរឿងនេះ គ្រាន់តែចូលរួមចំណែក ដើម្បីស្វែករកជនដែលសម្លាប់ប្រជាជនខ្មែរជាង ១ លាន ៦ សែន នាក់ ពិតប្រាកដ។ ហើយថា ពួកគេសម្លាប់មនុស្សដើម្បីអ្វី? ហើយអង្គការជាអ្វី? ខ្ញុំគិតថា វាជាផ្នែកមួយសម្រាប់អ្នកចង់ដឹងពីរបបនេះ»។
សូមបញ្ជាក់ថា បច្ចុប្បន្ន កាំង ហ្កេចអ៊ាវ ហៅ ឌុច មានអាយុ ៧៥ ឆ្នាំ។ លោក កាំង ហ្កេកអ៊ាវ គឺជាជនជាប់ចោទទី១ ដែលត្រូវបានវិនិច្ឆ័យសេចក្តីនៅចំពោះមុខ អ.វ.ត.ក។ នៅថ្ងៃទី៣ ខែកុម្ភៈ ឆ្នាំ២០១២ អង្គជំនុំជម្រះតុលាការកំពូល នៃ អ.វ.ត.ក បានសម្រេចតម្កល់ពិរុទ្ធភាពរបស់លោក ឌុច ពាក់ព័ន្ធនឹងបទឧក្រិដ្ឋកម្មប្រឆាំងនឹងមនុស្សជាតិ និងការបំពារបំពានយ៉ាងធ្ងន់ធ្ងរលើអនុសញ្ញាទីក្រុងហ្សឺណែវឆ្នាំ ១៩៤៩ ហើយអង្គជំនុំជម្រះតុលាការកំពូលបានសម្រេចបង្កើនការផ្តន្ទាទោសដាក់ពន្ធនាគារអស់មួយជីវិត។ សព្វថ្ងៃនេះ លោក ឌុច កំពុងឃុំខ្លួននៅពន្ធនាគារខេត្តកណ្តាល៕
សូមចុចត្រង់នេះដើម្បីអានថ្មីៗជាភាសាអង់គ្លេស (Cambodianess.com)
Tag:
ឌុច
ប៉ាន់ រិទ្ធី
ខ្មែរក្រហម
© រក្សាសិទ្ធិដោយ thmeythmey.com
អត្ថបទពេញនិយម
នាយទាហាន ៨រូប ត្រូវបានព្រះមហាក្សត្រដំឡើងឋានន្តរស័ក្តិផ្កាយ៤
5 ថ្ងៃ
សត្វជាង ៧០០ប្រភេទ ត្រូវបានរកឃើញក្នុងតំបន់ព្រៃកោងកាងខេត្តកោះកុង
1 សប្តាហ៍
«មជ្ឈការ»មានន័យខុសពី«វិមជ្ឈការ»ដូចម្តេច?
3 ថ្ងៃ
អាចសរសេរបានថា «រួញរា» ឬ «រញ់រា» ប៉ុន្តែមិនមែន «រុញរា» ឡើយ
5 ថ្ងៃ
«ប្រេសិត»មានន័យដូចម្តេច?
4 ថ្ងៃ
អត្ថបទពេញនិយមបន្ថែម