បដិមាកម្ពស់ជិត២ម៉ែត្រ ត្រូវបានប្រទះឃើញនៅជិតបរិវេណក្រុងអង្គរធំ

ជាតិ

បដិមាកម្ពស់ជិត២ម៉ែត្រ ត្រូវបានប្រទះឃើញនៅជិតបរិវេណក្រុងអង្គរធំ

31, Jul 2017 , 11:07 am

រូបភាព

ដោយ: អុីសា រ៉ហានី (Isa Rohany)

សៀមរាប៖ ចម្លាក់បដិមាដែលមានកម្ពស់រហូតដល់ទៅ ១,៩០ម៉ែត្រ និងស្មាទទឹងរហូតដល់ទៅ ០,៥៨ម៉ែត្រ ត្រូវបានប្រទះឃើញនៅមន្ទីរពេទ្យទន្លេស្ងួត ខាងជើងក្រុងអង្គរធំ។ នេះជាការចៃដន្យ នៅពេលដែលក្រុមអ្នកសិក្សាស្រាវជ្រាវ បាននិងកំពុងចាប់ផ្តើមលើគម្រោងសិក្សាពី មន្ទីរពេទ្យដែលកសាងក្នុងរជ្ជកាលព្រះបាទជ័យវរ្ម័នទី៧។

ចម្លាក់ដែលបានរកឃើញនៅពេលនេះ ត្រូវបានក្រុមអ្នកស្រាវជ្រាវប្រទះឃើញនៅថ្ងៃទី២៨ កក្កដា ឆ្នាំ២០១៧ និងត្រូវបានធ្វើពិធីសាសនាលើកបដិមាចេញពីក្នុងដី នៅថ្ងៃទី៣០ កក្កដា។ ការរកឃើញរូបបដិមាដ៏ធំនេះ ត្រូវបានក្រុមអ្នកជំនាញចាត់ទុកជារឿងចៃដន្យមួយ ខណៈដែលគម្រោងស្វែងយល់ពីមន្ទីរពេទ្យដែលកសាងក្នុងរាជ្យ ព្រះបាទជ័យវរ្ម័នទី៧ ដែលជាកិច្ចសហប្រតិបត្តិការរវាងអាជ្ញាធរជាតិអប្សរា មហាវិទ្យាល័យបច្ចេកវិទ្យា និងវិទ្យាស្ថានស្រាវជ្រាវអាស៊ីអាគ្នេយ៍នៃប្រទេសសិង្ហបុរី។

យោងតាមហ្វេសប៊ុកអាជ្ញាធរជាតិអប្សរា បដិមានេះ មានកម្ពស់១,៩០ ម៉ែត្រ ស្មាទទឹង ០,៥៨ ម៉ែត្រ ហើយស្ថិតក្នុងរចនាបថបាយ័ន។ បដិមានេះមានសណ្ឋានកំបុតដៃទាំងពីរត្រឹមស្មា កំបុត ជើងស្តាំត្រឹមកជើង និងជើងឆ្វេងត្រឹមគល់ភ្លៅ ហើយដងខ្លួន និងព្រះកេសនៅមានក្បាច់ចម្លាក់ សម្លៀកបំពាក់ និងក្បាំងសក់នៅស្អាតទាំងអស់។ បដិមានេះ កប់ក្នុងដីជម្រៅប្រមាណ ៤ តឹក ប៉ុណ្ណោះ អំឡុងពេលអ្នកស្រាវជ្រាវធ្វើកំណាយរកឃើញ ដោយដេកផ្ញារពោះបែរព្រះកេសទៅ ទិសខាងលិចទៅព្រះវិហារនៃមន្ទីរពេទ្យទន្លេស្ងួត។ នេះបើតាមការបញ្ជាក់របស់អាជ្ញាធរជាតិ អប្សរា។

លោក ខៀវ ច័ន្ទ អ្នកបុរាណវិទ្យានៃអាជ្ញាធរជាតិអប្សរានៅការដ្ឋានកំណាយ បានឲ្យដឹងថា នេះចាត់ទុកជាសំណាងមួយ ដែលអាចឲ្យគេយកបដិមាដ៏ធំនេះទៅរក្សាទុកនៅទីមានសុវត្ថិភាព និងសិក្សាពីវាលម្អិត។ លោកបន្ថែមថា បដិមានេះនឹងត្រូវនាំទៅរក្សាទុកនៅ សារមន្ទីរព្រះនរោត្តមសីហនុ-អង្គរ ដើម្បីសុវត្ថិភាព ដុសលាង ព្យាបាលនៅផ្នែកខ្លះ ពិសេស នោះ គឺយកជាតិអំបិលចេញដើម្បីកុំឲ្យមានការខូចគុណភាពថ្ម ឬរងប្រតិកម្មនៅពេលចម្លាក់ ត្រូវដាក់តាំងក្នុងលំហបរិយាកាសថ្មី៕