បទយកការណ៍ / បទសម្ភាសន៍
លោក សុខ ទូច៖ តំណែងមិនមែនជាគ្រឿងលម្អទេ តែជាអម្រែកដ៏ធ្ងន់សម្រាប់ខ្ញុំ! លោក សុខ ទូច ប្រធានរាជបណ្ឌិត្យសភាកម្ពុជា
× លោក សុខ ទូច ដែលទើបទទួលបានតំណែងជាប្រធានរាជបណ្ឌិត្យសភាកម្ពុជាថ្មីថ្មោង បានអរគុណរដ្ឋាភិបាល ដែលផ្តល់តួនាទីនេះដល់រូបលោក។ ក៏ប៉ុន្តែនៅក្នុងបទសម្ភាសជាមួយលោក ជា ធីរិទ្ធ និពន្ធនាយករងនៃសារព័ត៌មានថ្មីៗ លោក សុខ ទូច ដែលមានគោរម្យងារជា បណ្ឌិតសភាចារ្យផងនោះ លើកឡើងថា តំណែងថ្មីនេះ គឺជាអម្រែកដ៏ធ្ងន់ធ្ងរមួយទៀតសម្រាប់រូបលោក។ តើហេតុអ្វីបានជាលោកចាត់ទុកតំណែងនេះថា ជាអម្រែក? ហើយថាលោកបណ្ឌិតសភាចារ្យរូបនេះ នឹងមានផែនការថ្មីអ្វីខ្លះ ដើម្បីដឹកនាំស្ថាប័នមួយនេះ? សូមអានបទសម្ភាសខាងក្រោម៖
លោក ជា ធីរិទ្ធ៖ លោក សុខ ទូច ប្រាកដជាសប្បាយចិត្តហើយមែនទេ ដែលទទួលបានតំណែងថ្មីជាប្រធានរាជបណ្ឌិត្យសភាកម្ពុជា?
លោក សុខ ទូច៖ ខ្ញុំអរគុណ ដែលរដ្ឋាភិបាលផ្តល់សេចក្តីទុកចិត្តដល់ខ្ញុំ ដោយឲ្យខ្ញុំកាន់តំណែងជាប្រធានរាជបណ្ឌិត្យសភាកម្ពុជានៅពេលនេះ។ ខ្ញុំគិតថា តំណែងនេះ គឺជាអម្រែកដ៏ធ្ងន់ធ្ងរសម្រាប់ខ្ញុំវិញទេ។
លោក ជា ធីរិទ្ធ៖ ហេតុអ្វីបានជាលោកថា វាជាអម្រែក? លោកមិនចង់បានតួនាទីនេះទេឬ?
លោក សុខ ទូច៖ យើងដឹងហើយថា តួនាទី ឬតំណែងនេះ មិនមែនជាគ្រឿងលម្អ ឬយកមកធ្វើជាទីសក្ការៈសម្រាប់បូជាទេ តែវាជាអម្រែក ដែលតម្រូវឲ្យខ្ញុំខិតខំធ្វើយ៉ាងណា ដើម្បីដឹកនាំរាជបណ្ឌិត្យសភាកម្ពុជារីកចម្រើន។
លោក ជា ធីរិទ្ធ៖ តើលោកចង់ឲ្យស្ថាប័ននេះ រីកចម្រើនដូចម្តេច?
លោក សុខ ទូច៖ ខ្ញុំនឹងធ្វើឲ្យស្ថាប័នមួយនេះ ក្លាយជាកន្លែងផ្តល់គំនិតដ៏ល្អសម្រាប់អភិវឌ្ឍប្រទេស។ បច្ចុប្បន្នយើងមានវិទ្យាស្ថានចំនួន ៦ ដើម្បីសិក្សាស្រាវជ្រាវ ហើយស្ថាប័នទាំង ៦ នេះ គ្រប់ដណ្តប់លើក្រសួងនានា។ យើងនឹងផ្តល់គំនិត និងទ្រឹស្តី ដែលបានរកឃើញ ដាក់ជូនក្រសួងនានា ដើម្បីយកទៅអនុវត្ត។ ម្យ៉ាងទៀត ខ្ញុំនឹងធ្វើឲ្យរាជបណ្ឌិត្យសភាកម្ពុជា ក្លាយជាទីដែលបញ្ញវន្ត ឬអ្នកប្រាជ្ញ អាចបញ្ចេញយោបល់ បញ្ចេញនូវបញ្ហាដែលបញ្ញវន្តតឹងទ្រូងកន្លងមក ជាជាងពួកគាត់ដើរនិយាយតែនៅតាមចិញ្ចើមថ្នល់ ឬតាមផ្លូវ។
លោក ជា ធីរិទ្ធ៖ តើលោកធ្វើដូចម្តេច ដើម្បីឲ្យអ្នកទាំងនោះ ចូលមកបញ្ចេញយោបល់តាមរយៈរាជបណ្ឌិតសភាកម្ពុជា?
លោក សុខ ទូច៖ ទី ១ យើងនឹងកែសម្រួលរចនាសម្ព័ន្ធឡើងវិញ។ ទី ២ យើងនឹងរៀបចំលក្ខន្តិកៈថ្មី ដើម្បីសម្រួលឲ្យបញ្ញវន្ត ឬអ្នកប្រាជ្ញ អាចចូលរួមជាមួយយើង កាន់តែច្រើន។ ខ្ញុំសូមបញ្ជាក់ថា «ទ្វារសម្រាប់បញ្ញវន្ត បើកហើយពេលនេះ សូមអញ្ជើញចូលមករាជបណ្ឌិត្យសភាកម្ពុជា»។
លោក ជា ធីរិទ្ធ៖ ជាចុងក្រោយ ខ្ញុំមិនអាចមិនសួរលោកនោះទេ។ លោកប្រហែលជាដឹងហើយថា រាជ្យបណ្ឌិត្យសភាកម្ពុជា ហាក់បាត់ទំនុកចិត្តពីប្រជាពលរដ្ឋមួយចំនួន។ ពួកគេយល់ថា ស្ថាប័ននេះ មិនមែនជាស្ថាប័នបញ្ញវន្តពិតប្រាកដ ឬជាស្ថាប័នដែលនិយាយការពិតទេ តែស្ថាប័ននេះបម្រើគណបក្សប្រជាជនកម្ពុជា។ លោកឆ្លើយតបបែបណា?
លោក សុខ ទូច៖ ជាការពិត ស្ថាប័ននេះ បង្កើតដោយរដ្ឋាភិបាល។ ដូច្នេះយើងត្រូវបម្រើរដ្ឋាភិបាល។ ក៏ប៉ុន្តែ ខ្ញុំចង់ឲ្យអ្នកដែលរិះគន់ចេះគិតផង កុំឲ្យតែពេលគេនិយាយការពិត ផ្អែកតាមឯកសារ តាមច្បាប់ ឬរដ្ឋធម្មនុញ្ញ ហើយចំណេញខាងបក្សប្រជាជនកម្ពុជា មកចោទគេថា បម្រើបក្សប្រជាជននោះ។ តើលុះត្រាតែគេនិយាយការពារបក្សប្រឆាំង បានថា គេល្អឬយ៉ាងម៉េច? ខ្ញុំសូមបញ្ជាក់ ពួកយើងធ្វើការឈរលើវិជ្ជាជីវៈពិតប្រាកដ ហើយយើងក៏មិនអាចតម្រូវចិត្តអ្នកដែលរិះគន់យើងអស់នោះទេ៕
Tag:
សុខ ទូច
រាជបណ្ឌិត្យសភាកម្ពុជា
© រក្សាសិទ្ធិដោយ thmeythmey.com